Abantu abengi tabafwaya ukulanda pa mfwa. Na lyo line, inshita iili yonse kuti twafwa nelyo ukufwilwa kabili imfwa kuti yalenga twaba sana no bulanda.

Imfwa ya mufyashi, umulume, umukashi nelyo umwana ilakalipa sana. Abantu bamo balafwa mu kupumikisha e lyo bamo balafwa pa mulandu wa kulwala nelyo ukukota. Te mulandu ne calenga umuntu ukufwa, imfwa ilalenga uufwililwe ukuba sana no bulanda.

Ba Antonio, abo bawishi bafwile mu busanso bwa pa musebo batile: “Nga wafwilwa ciba kwati umuntu akoma mu ng’anda yobe, asenda na makii ica kuti te kuti ubwelelemo na kabili. Nangu ca kuti cilafya ukusumina ukuti umuntu obe nafwa, ushala fye ulemwibukisha, nomba tapali ifyo wingacita.”

Ilyo ba Dorothy bafwililwe abalume ninshi bali ne myaka 47, balefwaisha ukwishiba icicitika umuntu nga afwa. Nangu ca kuti bali ni bakafundisha ba ku Sunday-school kabili balesambilisha ukuti umuntu alatwalilila ukubako nga afwa, tabaishibe bwino bwino icicitika umuntu nga afwa. E ico baipwishe shimapepo wa ku Anglican ukuti: “Cinshi cicitika umuntu nga afwa?” Shimapepo ayaswike ati: “Takwaba uwaishiba bwino bwino, lelo tukeshiba ku ntanshi.”

Bushe pali ino nshita ca cine te kuti twishibe icasuko? Bushe kwalibako ifyo twingacita pa kuti twingeshiba icicitika umuntu nga afwa?