Nafyalilwe mu musumba wa Bilbao, mu calo ca Spain umwaleikala abakankaala. Twafyelwe 4 kabili nali uwalenga bubili. Twali baKatolika bakamamo na menshi kabili lyonse naleya ku Minsa. Ilyo nali ne myaka 23, natendeke bukafundisha, umulimo uo natemenwe sana kabili uo nabombele pa myaka 40. Nalitemenwe sana ukusambilisha ifisumino fya baKatolika e lyo mu cungulo nalesambilisha abakashana abalepoka ulukaristiya pa muku wa kubalilapo.

Pa numa ya kwikala mu cupo pa myaka 12, abena mwandi balifwile kabili banshile na bana abakashana 4. Nali fye ne myaka 33. Ifyo twalesambilila ku calici tafyalensansamusha lelo fyalelenga ndekwata amepusho ayengi. Naleyipusha ati: ‘Cinshi abantu bafwila nga ca kuti Kristu alitufwilile? Cinshi tupepela ukuti Ubufumu bwa kwa Lesa bwise nga ca kuti abantu abasuma balaya ku muulu?’ Naleyipusha no kuti: ‘Nga ca kuti Lesa alapingula abantu nga bafwa, mulandu nshi twingafumina ku muulu, twingela ku mutwala nelyo ku mulilo wa pe pa kuti tukayepingulwa na kabili?’

Nalipwishe ifi fipusho kuli bashimapepo bamo. Umo atile: “Nshaishiba, ukepushe shikofu. Cinshi uleipushisha pantu walisumina muli Lesa. Fimo nangu tawishibe!” Lelo nalefwaya ukwishibe ifyasuko. Natendeke ukuya mu kupepa kuli baJesuit, baPente e lyo na baGnostic. Lelo, takwali abaleasuka bwino bwino ifipusho nakwete.

Ilyo nacilile imyaka 60, akakashana nalesambilisha akali ne myaka 7 kalinjebele ukuti nkasangweko ku kulongana kwa ba Nte. Nalitemenwe ifyo namwene no kumfwa, lelo apo nshalekwata sana inshita, nshabweleleko na kabili. Ilyo papitile imyaka ibili, ba Juan na bena mwabo ba Maite balintandalile. Twalilanshenye ifingi pa myeshi itatu kabili nasukile natendeka ukusambilila Baibolo.

Nalefwaisha sana ukusambilila. Apo nalefwaisha ukushininkisha nga ca kuti ba Nte balesambilisha ifya cine, nalebomfya amaBaibolo yatatu. E lyo naishibe ukuti kanshi  ifyo nasambilile pa myaka iingi fyali fya bufi. Nalipapile no kumfwa ububi ilyo namwene ifyo ifisambilisho fya baKatolika fyapusene ne fyo ba Nte balesambilisha. E ico namwene ukuti mfwile fye ukuleka ukusumina mu fisambilisho fya musango uyu nangu ca kuti calyafishe sana ukucita ifi.

Abena mwandi naishileupwako balilwele no kufwa kabili nalilekele incito no kuya mu kwikala kumbi. Ba Juan na ba Maite nabo baile mu kwikala kumbi. Ku ca bulanda nalilekele ukusambilila Baibolo. Lelo nalishibe ukuti nalisangile icine kabili nshalekele ukutontonkanyapo.

Ilyo papitile imyaka 20, ninshi ndi ne myaka 82, ba Juan na ba Maite balishile mu kwikala ku Bilbao kabili balintandalile. Nalitemenwe ukumonana nabo na kabili! Nalishibe ukuti Yehova tandabile, e co natendeke ukusambilila Baibolo na kabili. Nangu ca kuti naleipusha amepusho yamo yene, ba Juan na ba Maite tabaletendwa. Pa kuti ndabeko ku fisambilisho fya ku Katolika, nalefwaisha ukulasambilila Baibolo libili libili. Nalefwaisha no kwishiba ifya kulondolola bwino Baibolo ku fibusa na balupwa.

Nabatishiwe ilyo nali ne myaka 87 pa kulongana kukalamba ukwa ba Nte kabili nalitemenwe sana. Eluda umo alilandile ilyashi lya mu Baibolo kuli fwe balebatishiwa. Lyalimfikile pa mutima ica kuti nalililile. Nalemona kwati Yehova alelanda na ine. Ilyo nabatishiwe, ba Nte abengi kumo na bo nshaishibe, balintashishe pa fyo nacitile.

Nalishibe ukutula na kale ukuti Yesu Kristu e “nshila.” (Yohane 14:6) Lelo ilyo nalesambilila Baibolo, nalishibe no kuti Yesu e ulenga twishibe Yehova. Nomba ndapepa kuli Lesa, Umufyashi kabili Cibusa wandi. Ilyo nabelengele icitabo ca Palameni Kuli Yehova * nalyalwike. Nalibelengele ici citabo ubushiku bonse, no kupwisha nacipwisha! Ala nalitemenwe ukwishiba ifyo Yehova akwatisha uluse!

Nga natontonkanya pa nshita napoosele pa kufwaya ukwishiba icine, njibukisha amashiwi Yesu alandile aya kuti: “Mulelomba, kabili mukapeelwa; mulefwaya, kabili mukasanga; mulekonkonsha, kabili bakamwiswila.” (Mateo 7:7) Apo nomba nalishiba icine, ndomfwa bwino ukwebako bambi ifyo nasambilila.

Nangu ca kuti ndi ne myaka 90, imona ukuti fingi mfwile ukusambilila pali Yehova. Lyonse nga naya ku kulongana, ndomfwa bwino sana pa fyo tusambilila e lyo ne fyo ngumfwana na babwananyina. Apo nali kafundisha, ndafwaisha ukwisaba kafundisha mu Paradaise pano calo. (Ukusokolola 21:3, 4) Ndafwaisha no kumona balupwa ne fibusa abakabuuka kabili nkatemwa ukubasambilisha Baibolo. (Imilimo 24:15) Kuti natemwa ukwisabalondolwela icintu icacindama ico Yehova ampeele mu bukote!