IFIPANDE IFIKALAMBA | BUSHE SATANA EKO ABA?
Bushe Satana Eko Aba?
Ico bapanga mu Madrid, ku Spain, icimininako Satana napona ukufuma mu muulu
“Nakuliile mu El Salvador. Nga nshileumfwa bamayo balenjeba abati ‘Satana alaisa kusenda!’ Lelo, naleasuka nati, ‘Nga alefwaya ese!’ Ico nalebasukila ifi ni co nasumine muli Lesa, nshasumine muli Satana.”—BA ROGELIO.
Bushe na imwe mutontonkanya nge fyo ba Rogelio baletontonkanya? Ni cili kwi pali ifi fyakonkapo ico mwasuminamo?
Satana taabako, bubifi fye ubwaba konse.
Satana eko aba, lelo tabika amano ku bantunse.
Satana cibumbwa ica maka ico tushingamona icilenga abantu ukulacita ifyabipa.
Kwaliba abantu abengi abasumina muli cimo pali ifi fitatu twalandapo. Lelo bushe nacicindama ukwishiba icine? Cisuma, nga takwaba Satana, abasumina ukuti eko aba balilufiwa. Nga Satana eko aba, lelo tabika amano ku bantunse, abengi bamutiina fye ukwabula no kwishiba ico bamutiinina. Nomba nga Satana cibumbwa icilenga abantu ukulacita ifyabipa, ninshi alibipisha ukucila ne fyo abantu abengi batontonkanya.
Natumone ifyo Amalembo ya Mushilo yayasuka aya mepusho: Bushe Satana ni ani? Bushe bubifi fye ubwaba konse nelyo cibumbwa ico tushingamona? Nga eko aba, bushe kuti amusansa? Nga kuti amusansa, bushe kuti mwaicingilila shani?
