UUFWAILISHA ilyashi aipwishe abacaice 800 aba mu mipepele yalekanalekana nga balisumina ukuti Yesu alasuka amapepo. Abacaice ukucila pali 400 balandile ukuti balisumina ukutila Yesu alasuka amapepo. Umukashana umo ena atile tasumina ukuti Yesu alasuka amapepo, lelo atile “Lesa” e wasuka fye.

Inga imwe finshi mwaishibapo? Bushe tulingile ukupepa kuli Yesu nelyo kuli Lesa? * Pa kuti twishibe icasuko, natubale tulande pa fyo Yesu asambilishe abasambi bakwe pa fyo balingile ukulapepa.

Yesu alitusambilishe no kutulanga uo tulingile ukulapepako.

IFYO ATUSAMBILISHE: Ilyo umusambi wa kwa Yesu amwebele ukuti, “Mwe Shikulu, tusambilisheni ifya kupepa,” Yesu atile: “Lyonse ilyo mulepepa, muletila, ‘Mwe Shifwe.’” (Luka 11:1, 2) Na kabili, ilyo Yesu alelanda Ilyashi lya pa Lupili, aebele abantu ukulapepa. Abebele ukulapepa kuli Lesa. Abebele no kuti: “Shinwe alishiba ifyo mukabila na lintu fye tamulamulomba.” (Mateo 6:6, 8) Ilyo kwashele ubushiku bumo ukuti Yesu bamwipaye, aebele abasambi mu nshita ya bushiku ati: “Nga mwalomba icintu conse kuli Tata, akamupeela mwi shina lyandi.” (Yohane 16:23) Kanshi Yesu atusambilishe ukutila tulingile ukulapepa kuli Wishi kabili Shifwe, Yehova Lesa.—Yohane 20:17.

IFYO ALECITA: Nga filya fine Yesu alesambilisha abantu ifya kupepa, e fyo na o wine alecita. Apepele ati: “Ndemulumbanya pa cintubwingi, mwe Tata, Shikulu wa muulu ne sonde.” (Luka 10:21) Pa nshita imbi, “Yesu ainwine amenso mu muulu, no kutila: ‘Tata, ndemutootela ukuti mwang’umfwa.’” (Yohane 11:41) Na kabili, ilyo Yesu ali mupepi no kufwa, apepele ati: “Mwe Tata, mu minwe yenu e mo natuula umweo wandi.” (Luka 23:46) Filya Yesu alepepa kuli Wishi wa ku muulu, “Shikulu wa muulu ne sonde,” filanga ukuti na ifwe tufwile ukulapepa fye kuli Lesa. (Mateo 11:25; 26:41, 42; 1 Yohane 2:6) Bushe abasambi ba kwa Yesu balepepa kuli Lesa nga filya fine Yesu alecita?

Ilyo papitile fye imilungu iinono ukutula apo Yesu abwelelemo ku muulu, abasambi bakwe batendeke ukubacusha no kubatiinya. (Imilimo 4:18) Balipepele pa kuti abafwe, nomba ni kuli ani balepepa? “Bapepele pamo kuli Lesa” ukuti atwalilile ukubafwa “mwi shina lya mubomfi [wakwe] uwa mushilo Yesu.” (Imilimo 4:24, 30) Kanshi abasambi balecita ifyo Yesu abasambilishe pa kupepa. Tabalepepa kuli Yesu, lelo balepepa kuli Lesa.

Ilyo papitile imyaka iingi, umutumwa Paulo alandile pa fyo ena na batumwa bambi balepepa. Alembeele Abena Kristu banankwe ukuti: “Lyonse ilyo tumupepelako, tulatootela Lesa, Wishi wa kwa Shikulwifwe Yesu Kristu.” (Abena Kolose 1:3) Paulo alembeele Abena Kristu banankwe ukuti “mwi shina lya kwa Shikulwifwe Yesu Kristu lyonse muletootela pali fyonse kuli Lesa wesu kabili Shifwe.” (Abena  Efese 5:20) Aya amashiwi ayo Paulo alembele yatulanga ukuti alekoselesha Abena Kristu ukulapepa kuli ‘Lesa kabili Shifwe,’ mwi shina lya kwa Yesu.—Abena Kolose 3:17.

Nga filya abasambi ba kwa Yesu balecita, na ifwe kuti tulelanga ukuti twalitemwa Yesu nga tulekonka ifyo atusambilishe pa kupepa. (Yohane 14:15) Nga tulepepa fye kuli Shifwe wa ku muulu, tukalaumfwa nga filya uwaimbile Amalumbo 116:1, 2 aumfwile, uwalandile ukuti: “Natemwa, pantu Yehova alomfwa Ishiwi lyandi. . . Kabili mu nshiku shandi shonse nakulalilila kuli ena.” *