Abantu abengi baba nga ba Alex, tabafwaya ukubombesha. Ba Aaron, ababomba incito ya kulungisha imyotoka batile: “Abantu abengi bamona kwati umuntu uubomba incito ya panshi tacindama. Batontonkanya abati: ‘Ico mombela iyi ncito ni co fye nshilasanga incito iisuma.’”

Mulandu nshi abantu abengi bashifwaila ukubombesha? Nalimo icalenga ni filya ilingi batamba pa TV no kumfwa pa cilimba apo batemwa sana ukulanda pa kwikala bwino. Ba Matthew ababomba incito ya kulungisha ifintu batile: “Abantu batontonkanya ukuti nangu ubombeshe shani pa kuti ukwate ifyo ulekabila, te kuti uleikala bwino nakalya.” Ifi fine e fyo na ba Shane abawamya mu fikuulwa batontonkanya. Batile: “Abantu tabafwaya ukubomba akasuba konse, lelo bafwaya ukubafolesha indalama shilya shine balingile ukubafolesha.”

Lelo abantu abengi abakwata icuma balitemwa ukubombesha. Ba Daniel abali ne myaka 25, ababomba imilimo ya makuule batile: “Umuntu nga alebombesha alaba ne nsansa, maka maka nga abomba imilimo iyacindama iyakwafwa abantu.” Ifi ba Daniel balandile e fyo na ba Andre abali ne myaka 23 baishiba. Batile: “Naishiba ukuti umuntu alaba ne nsansa nga ca kuti alebombesha. Lelo nga tabombesha, taba sana ne nsansa!”

Cinshi calenga ukuti ba Daniel na ba Andre batemwe ukubombesha? Balakonka ifyo Baibolo ilanda. Baibolo taikanya abantu ukubombesha, lelo itweba ukuti tulingile ukulabombesha. Baibolo ilatweba ne fyo tulingile ukucita pa kuti tutemwe incito tubomba.

Malembo nshi ayaba mu Baibolo ayengamwafwa ukuba ne nsansa ilyo mulebomba? Mukwai belengeni icipande cikonkelepo pa kuti mumfwe.