Nakuliile ku Ancram, itauni ilinono mu musumba wa New York, mu America. Muli ili itauni mwaliba sana amafarmu umo bateka ing’ombe. Na kuba, muli ili itauni ing’ombe shalifula sana ukucila abantu.

Apo muli ili itauni mwali fye icalici limo, eko twalepepa. Cila lucelo pa Mulungu, bashikulu balengwamisha insapato, lyena naleya ku Sunday school ninshi ninsenda na ka Baibolo kabuuta akanono ako bamama bampeele. Ine na baice bandi babili balitusambilishe ukulabombesha sana, ukulacindika no kulayafwa abantu bambi, e lyo no kulatasha Lesa pa fyo atupaala.

Ilyo nakulile, natendeke ukuikaliila kabili nalebomba incito ya bukafundisha. Nalikwete amepusho ayengi pali Lesa na pa bumi. Abana be sukulu bamo abo nalesambilisha bali aba mano sana, e lyo bambi tabali na mano sana, lelo baleibikilishako. Bamo bali abalemana, e lyo bambi bali fye abatuntulu. Nalemona ukuti mu calo tamwaba mulinganya. Limo abafyashi abakwete abana abalemana balelanda abati, “Ifi fine e fyo Lesa afwaya umwana wandi ukuba.” Nshaishibe ico Lesa asuminishisha abana bamo ukufyalwa abalemana, pantu abana tabacitapo icili conse icabipa.

Naleyipusha no kuti, ‘Fintu nshi ifyacindama ifyo ningacita mu bumi?’ Nalemona ukuti ifintu fyalecitika lubilo lubilo. Nakuliile mu lupwa ulusuma, nalesambilila pa masukulu ayasuma, kabili nalebomba ne ncito iyo natemenwe sana. Lelo nalemona kwati tapali icacindama ico nkacitapo. Naletontonkanya ukuti nkopwa, nkakwate ng’anda isuma na bana, nkatwalilila fye ukulabomba mpaka nkapoke penshoni, e lyo nga nakota bakantwale na kulya basungila abakote.

Mu lusuba, twaile mu kutandala ku Bulaya na ba kafundisha banandi. Twaile ku Westminster Abbey, Notre-Dame de Paris, ku Vatican, e lyo na ku macalici yambi ayanono. Konse uko naleya, naleipusha amepusho nakwete. Ilyo nabwelelemo ku ng’anda ku Sloatsburg, mu New York, naile ku macalici ayalekanalekana,  lelo takwali nangu umo uwaleyasuka bwino amepusho nalebepusha.

Bushiku bumo, umwana we sukulu uwali ne myaka 12 anjipwishe amepusho yatatu. Abalile anjipusha nga ca kuti nalishiba ukuti ni Nte ya kwa Yehova. Nalisumiine, kabili anjipwishe nga kuti natemwa ukwishibilapo na fimbi pa Nte sha kwa Yehova. Nshakeene, kabili mu kulekelesha anjipwishe uko naleikala. Ilyo namwebele uko naleikala, naishileishiba ukuti twali fye abena mupalamano. Nshaishibe ukuti amepusho yatatu ayanjipwishe uyu umukashana yali no kulenga ubumi bwandi ukwaluka.

Tapakokwele, alishile ku ng’anda ne ncinga kabili alitendeke ukunsambilisha Baibolo. Nalimwipwishe amepusho ayo naleipusha bashimapepo abengi. Tali nga bashimapepo, lelo alyaswike bwino amepusho namwipwishe ukubomfya Baibolo. Ifyo anjaswike ukubomfya Baibolo nshatalile mfyumfwapo.

Ifyo nalesambilila mu Baibolo fyalengele naba sana ne nsansa. Nalitemenwe ilyo nabelengele 1 Yohane 5:19 apatila: “Icalo conse calaala mu maka ya mubifi.” Nalyumfwile bwino pa kusambilila ukuti te Lesa ulenga ifyabipa ificitika mu calo, lelo Satana e ulenga. Nalitemenwe no kwishiba ukuti Lesa akapwisha ifyabipa fyonse ificitika. (Ukusokolola 21:3, 4) Nasangile ukuti ifyaba mu Baibolo filomfwika ukuti fya cine nga ca kuti umuntu afilondolola bwino. Nangu ca kuti Nte uwalensambilisha Baibolo ali fye ne myaka 12, nasangile ukuti ifyo nalesambilila e cine.

Nomba nalefwaisha ukushininkisha nga ca kuti Inte sha kwa Yehova balacita ifyo basambilisha. Umukashana alelanda sana ukuti Abena Kristu balingile ukuba abatekanya kabili aba cikuuku. (Abena Galatia 5:22, 23) E ico nalefwaya ukwishiba nga aliba ne yi mibele. Bushiku bumo nalicelelwe ukubwelelamo ku ng’anda mu kusambilila Baibolo ku mufulo fye. Natendeke ukuyipusha nati: ‘Bushe alandolela? Nga alandolela, bushe alafulwa ifi nacelwa?’ Ilyo nafikile na motoka pa ng’anda, nasangile alendolela. Alinkonkeele ku motoka kabili atile: “Nacilafwaya ukuya ku ng’anda mukweba bamayo ukuti batumine foni ku cipatala na ku kapokola pa kuti twishibe nga muli fye bwino, pantu tamucelwa ukubwela nga tulesambilila Baibolo. Ala nacisakamana!”

Ubushiku bumbi namwipwishe icipusho ico nalemona ukuti umwaice uwa myaka 12 te kuti asuke. Nalefwaya ukumona nga alayasuka fye ifyo umwine aishibe. Ilyo namwipwishe, alindolekeshe kabili anjebele ati: “Icipusho mwanjipusha nacafya. Nalalemba ifyo mwanjipusha pa kuti njeipusha abafyashi.” Na cine, ilyo aishile ukuti tusambilile, aliletele Ulupungu lwa kwa Kalinda umwali icasuko ku cipusho namwipwishe. Ici e calengele ukuti ntemwe ba Nte pantu ifitabo fyabo ifilanda pa fya mu Baibolo fyalikwete amasuko yonse ku mepusho nakwete. Nalitwalilile ukusambilila na uyu mukashana, kabili ilyo papitile fye umwaka umo nalibatishiwe, naba ne Nte ya kwa Yehova. *

Ilyo naishibe amasuko ku mepusho nakwete, nalefwaisha ukulaebako bambi. (Mateo 12:35) Pa kubalilapo, ba lupwa lwandi tabatemenwe ifyo nasumiinemo. Lelo mu kuya kwa nshita, balyalwike. Ilyo bamayo bali mupepi no kufwa, balitendeke ukusambilila Baibolo. Nangu ca kuti bafwile ilyo tabalabatishiwa, nalishibe ukuti balisalilepo ukubombela Yehova.

Mu 1978, nalyupilwe kuli ba Elias Kazan, abali Inte ya kwa Yehova. Mu 1981, ine naba Elias balitwitile ukuya mu kubombela pa Bethel, mu America. * Ku ca bulanda, ba Elias balifwile ilyo twabombele fye nabo imyaka 4 pa Bethel. Nangu nashele mukamfwilwa, nalitwalilile ukubombela pa Bethel, pantu umulimo nalebomba walelenga ndebika amano ku fya kwa Lesa kabili walelenga ndesansamuka.

Mu 2006, nalyupilwe kuli ba Richard Eldred, aba pa Bethel kabili twalitwalilila ukubombela pa Bethel. Ukwishiba icine pali Lesa kwalenga nasanga amasuko ku mepusho nakwete, kabili kwalilenga naba ne nsansa sha cine cine. Amepusho yatatu fye ayo umukashana anjipwishe yalilenga naishiba icine pali Lesa kabili naliba ne nsansa.