Baibolo ilanda ukuti kukaba ubonaushi ilyo impela ikesa. Itila: “Kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba . . . Isho nshiku nga tashakepifiwe, takuli umuntu nangu umo uukapusuka.” (Mateo 24:21, 22) Nangu cibe ifyo, Lesa alilaya ukuti abantu abengi bakapusuka. Baibolo isosa ukuti: “Icalo cileya . . . , lelo uucita ukufwaya kwa kwa Lesa akekalilila umuyayaya.”—1 Yohane 2:17.

Nga mulefwaya ukupusuka ilyo impela ikesa no ‘kwikala umuyayaya,’ finshi mufwile ukulacita? Bushe mufwile ukutendeka ukulashita ifintu no kufisunga pa kuti fikamwafwe ilyo impela ikesa? Awe, pantu Baibolo te fyo itweba. Lelo itila: “Apo ifi fyonse fikasunguluka umusango yu, imwe mufwile ukuba ne mibele ya mushilo ne milimo ya bukapepa, abalolela kabili abafulukisha ukubapo kwa bushiku bwa kwa Yehova.” (2 Petro 3:10-12) Amashiwi ya pali ili ilembo yalelanga ukuti pa “fintu fyonse” ifikasunguluka pakaba na mabuteko yonse aya muli cino calo cabipa e lyo na bonse abafwaya ukutungululwa na aya amabuteko, mu nshita ya kutungululwa na Lesa. E ico, nga twasunga ifintu pa kuti tukafibomfye ku ntanshi, ifyo fintu te fingatupususha ilyo ubonaushi bukesa.

Kanshi nga tuleipeelesha ukubombela Yehova Lesa kabili nga tuli ne mibele iyo Lesa afwaya, e lyo twingapusuka impela. (Sefania 2:3) Tatufwile ukulakonkelela ifyo abantu abengi bacita kabili tatufwile ukulalaba ukuti tuleikala mu nshita sha mpela, lelo tufwile ‘ukufulukisha ukubapo kwa bushiku bwa kwa Yehova.’ Inte sha kwa Yehova kuti bamwafwa ukwishiba ifyo Baibolo ilanda ifingalenga mukapusuke ilyo impela ikesa.