Ba Janet abaupilwe kabili abakwata abana babili bashimika ukuti: “Ilyo batata bafwile fye, abena mwandi banjebele ukuti balikwete umwanakashi umbi. Lyena tapakokwele, abena mwandi balilongele ifipe ukwabula ukunjeba kabili balinshile na bana.” Nangu ca kuti ba Janet balingiile incito, indalama balefola shaleba ishinono ica kuti balefilwa ukushita ifya pa ng’anda fyonse. Ba Janet balesakamikwa sana na pa fintu fimbi. Batile: “Nalesakamikwa sana pantu natendeke ukufwaya fyonse ifyalefwaikwa pa ng’anda neka. Naleumfwa ububi pantu nalefilwa ukupeela abana bandi fyonse ifyo balekabila nga fintu abafyashi bambi bacita. Na pali ino ine inshita, ndasakamikwa pa fyo abantu bambi batontonkanya pa lupwa lwesu. Bushe nalimo batontonkanya ukuti nalingile ukucitapo fimo pa kuti icupo cesu cipwa?”

Ukupepa kuli Yehova kwalilenga ba Janet ukukanalasakamikwa sana kabili kwalilenga baba cibusa wa kwa Lesa. Bashimika ukuti: “Ubushiku e lyo nsakamikwa sana pantu e lyo mba neka. Ndalalaako nga ca kuti napepa no kubelenga Baibolo. Ilembo ilyo natemwa sana lya Abena Filipi 4:6, 7. Litila: ‘Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu.’ Ndapepa ilingi line ubushiku kabili Yehova alakonsha pantu nga napepa ndomfwako bwino.”

Amashiwi ya kusansamusha ayo Yesu alandile mu Lyashi lya pa Lupili yalafwa abasakamikwa pa fintu ifyalekanalekana. Atile: “Shinwe alishiba ifyo mukabila na lintu fye tamulamulomba.” (Mateo 6:8) Tulingile ukulapepa pa kuti ‘twapalama kuli Lesa.’ Nga tulepepa ninshi Lesa ‘akapalama kuli ifwe.’—Yakobo 4:8.

Nga tulepepa kuli Yehova no kumweba ifiletusakamika, tulomfwako bwino kabili Yehova ‘uumfwa ipepo,’ alatwafwa nga tulemupepa ne citetekelo.  (Amalumbo 65:2) E calengele Yesu ebe abasambi bakwe ukuti bafwile “ukulapepa lyonse no kukanaleka.” (Luka 18:1) Tulingile lyonse ukulalomba Lesa ukuti aletutungulula no kulatwafwa kabili tulingile ukucetekela ukuti akulatwafwa. Tatulingile ukutwishika ukuti Yehova alafwaisha ukutwafwa. Kanshi nga ‘tulepepa ukwabula ukuleka,’ ninshi tulelanga ukuti twaliba ne citetekelo.—1 Abena Tesalonika 5:17.

Bushe ukuba ne citetekelo kwalola mwi? Ukuba ne citetekelo ‘kwishiba’ ukuti cine cine Lesa e ko aba. (Yohane 17:3) Kuti twaishiba Lesa nga ca kuti tulebelenga Baibolo. Twalishiba ukuti Lesa alamona ifyo tucita kabili alafwaya no kutwafwa. Ukuba ne citetekelo te kwishiba fye ukuti Lesa eko aaba, lelo cipilibula no kuti tufwile ukuba cibusa wakwe uwa pa mutima. Nga filya fine papita inshita pa kuti umuntu abe cibusa wesu uwa pa mutima, e fyo ciba na pa kuti tube ifibusa fya kwa Lesa. Mu kupita kwa nshita, ‘icitetekelo cesu cilakula’ nga ‘tulecita ifisekesha’ Lesa, tulesambilila pali ena e lyo na lintu tulemona ifyo atwafwa ilyo tuli na mafya. (2 Abena Korinti 10:15; Yohane 8:29) Icitetekelo ca musango uyu, e cayafwa ba Janet ukukanalasakamikwa sana.

Ba Janet batile: “Icalenga ukuti nkwate icitetekelo icakosa, kumona ifyo Yehova angafwa muli fyonse ifyo ncita. Pa tushita utwingi, abantu baletufyenga ica kuti tatwaleishiba ne fya kucita. Na lyo line, ukupepa kuli Yehova lyonse kwalengafwa ukwishiba ifya kucita. Nga ndetasha Yehova pa fyo ancitila, ndatontonkanya na pa fintu na fimbi ifyo ancitila. Alatwafwa pa nshita ilya ine fye tulefwaya ubwafwilisho. Alilenga nakwata ne fibusa fya cine cine, e kutila bamunyinane ne nkashi. Aba bamunyinane balangafwa lyonse kabili abana bandi balafwaya ukubapashanya.” *

“Nalishiba ico Yehova alandila pe lembo lya kwa Malaki 2:16 ukuti, “nalipata ukulekana.” Cilakalipa sana nga ca kuti umwina mobe akupondokela apabula umulandu. Napapita imyaka iingi ukutula apo abena mwandi banshila, lelo ncili ndomfwa ububi. Nga naumfwa sana ububi, ndacitilako umuntu umo icintu icisuma, ne ci cilangafwa ukulabako.” E ico ba Janet balakonka ifyo Baibolo ilanda ukuti tabafwile ukuitalusha ku bantu bambi, ne ci cilalenga belasakamikwa sana. *—Amapinda 18:1.

Ba Janet batwalilila ukushimika abati: “Icinkoselesha sana kwishiba ukuti Lesa ni ‘wishi wa bana ba nshiwa kabili uwa kulubulwilako bamukamfwilwa.’ Lesa takatale ansha nga filya abena mwandi banshile.” (Amalumbo 68:5) Ba Janet balishiba ukuti Lesa te kuti atutunke “ukucita ifyabipa.” Lelo “Lesa apeela fye kuli bonse” amano kabili alapeela na “maka yacila aya bantunse” ayatwafwa ukukanalasakamikwa sana.—Yakobo 1:5, 13; 2 Abena Korinti 4:7.

Inga nga ca kuti tulasakamikwa pa mulandu wa kuti ubumi bwesu bwaliba mu busanso?