ICIPANDE ICIKALAMBA | BUSHE UMUNTU ABA SHANI NGA AFWA?
Bushe Mwalishininkisha Ukuti Abafwa Bakabuuka?
Bushe tufwile ukulatontonkanya ukuti abafwa tabakabuuke? Umutumwa Paulo te fyo aletontonkanya, pantu alembele ukuti: “Nga ca kuti isubilo lyesu muli Kristu lya muli buno bwine fye ubwikashi, ninshi pa bantu bonse ni fwe twingaba ne nkumbabulili icine cine. Lelo, nomba Kristu alibuuka ku bafwa, e cisabo ca ntanshi ku bafwa.” (1 Abena Korinti 15:19, 20) Paulo alishininkishe ukuti abafwa bakabuuka. Icalengele ashininkishe ni co alishibe ukuti Yesu alibuukile. * (Imilimo 17:31) Ici e calengele Paulo alande ukuti Yesu “cisabo ca ntanshi” pantu e wabalilepo ukuya ku muulu ilyo abuukile. Nga ca kuti Yesu e wabalilepo ukuya ku muulu, ninshi kwaliba na bambi abakaya ku muulu.
Yobo aebele Lesa ati: “Mukafuluka umulimo wa minwe yenu.”—Yobo 14:14, 15
Kwaliba na cimbi icalenga tushininkishe ukuti abafwa bakabuuka. Yehova ni Lesa uulanda icishinka. Baibolo itila: ‘Lesa tabepa.’ (Tito 1:2) Yehova tabepa, kabili takatale abepa. Bushe Yehova uwalaya ukuti akabuusha abafwa, e lyo atulanga no kutila kuti ababuusha, kuti akaana ukufikilisha ifyo alaya? Yehova takafilwe ukufikilisha ifyo alaya!
Cinshi Yehova akabuushisha abafwa? Pantu alitutemwa. Yobo aipwishe ati: “Umuntu nga afwa bushe kuti aba no mweo na kabili? Muketa, na ine nkaasuka. Pantu mukafuluka umulimo wa minwe yenu.” (Yobo 14:14, 15) Yobo alishininkishe ukuti Wishi wa ku muulu uwaba no kutemwa akamufuluka. Bushe Lesa alyaluka? Baibolo itila: “Nine Yehova; nshayaluka iyo.” (Malaki 3:6) Lesa na nomba alafwaisha ukubuusha abafwa, pa kuti bakabe no bumi ubusuma e lyo ne nsansa. Ifi fine e fyo no mufyashi uwatemwa umwana engacita nga ca kuti umwana alifwile. Lelo Lesa ena alikwata na maka ya kubuusha abafwa, ukupusanako ku mufyashi umuntunse.—Amalumbo 135:6.
Abantu abengi balafwa, lelo Lesa alilaya ukuti akafumyapo imfwa
Yehova akabomfya Umwana wakwe pa kubuusha abafwa pa kuti akasansamushe bonse abafwilwa balupwa ne fibusa. Bushe Yesu na o alafwaisha ukubuusha abafwa? Ilyo Yesu talabuusha Lasaro, alimwene ifyo bankashi ya kwa Lasaro ne fibusa bali no bulanda ica kuti na o “aponeshe ifilamba.” (Yohane 11:35) Ubushiku bumbi Yesu asangile mukamfwilwa wa ku Naini, uwafwililwe umwana uo akwete fye. Yesu “amumfwilile uluse, kabili amwebele ati: ‘Leka ukulila.’” Lilya line fye, Yesu alibuushishe umwana wakwe. (Luka 7:13) Kanshi Yesu alomfwa ubulanda umuntu nga afwa kabili alipata imfwa. Yesu akatemwa sana ilyo akalenga abantu ukusekelela, mu nshita ya kuti baleloosha.
Bushe na imwe mwalifwilwapo? Nalimo mumona kwati takuli uwingafumyapo imfwa, lelo Lesa alilaya ukuti akabomfya Umwana wakwe ukufumyapo imfwa. Lesa afwaya mukamoneko ilyo akalabuusha abafwa, kabili alafwaya no kuti mukasengele balupwa lwenu ne fibusa ilyo bakabuuka. Elenganyeni ifyo cikawama ukulacitila ifintu pamo umuyayaya, ukwabula ukufwa.
Ba Lionel abo tulandilepo mu cipande cifumineko, batile: “Nasukile naishiba ukuti abafwa bakabuuka. Pa kubala, nshaleumfwikisha, kabili nshacetekele ne fyalelanda uwalensambilisha. Lelo ilyo nabelengele mu Baibolo, nalishininkishe ukuti abafwa bakabuuka. Kanshi ndalolela ukumona bashikulu ilyo bakabuuka.”
Bushe kuti mwatemwa ukwishibilapo na fimbi pa bafwa? Inte sha kwa Yehova bakatemwa ukumweba ifyo Baibolo yalanda ifyalenga bashininkisha ukuti abafwa bakabuuka. *
^ par. 3 Nga mulefwaya ukwishiba nga ca kuti Yesu alibuukile, belengeni icitabo icitila Baibolo—Cebo ca kwa Lesa Nelyo ca Muntu? pa mabuula 78-86. Abalemba ici icitabo ni Nte sha kwa Yehova.
^ par. 9 Belengeni icipandwa 7 mu citabo icitila Bushe Cinshi Baibolo Isambilisha? Abalemba ici icitabo ni Nte sha kwa Yehova kabili ici icitabo kuti
