IFYO BAIBOLO ILANDA: “Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe [Yesu] no kufumamo.”—Yohane 5:28, 29.

Yesu alisobeele ukuti ilyo akalateka mu Bufumu bwakwe, ababa mu Nshiishi bakafumamo. Ba Fernando abo tulandilepo mu cipande cifumineko batile: “Nalipapile sana ilyo nabelengele Yohane 5:28, 29 pa muku wa kubalilapo. Ili ilembo lyalengele nacetekela ukuti abafwa bakabuuka, kabili natendeke ukutontonkanya pa fyo ifintu fikawama ku ntanshi.”

Yobo, umuntu wa citetekelo, alishibe ukuti nga afwa Lesa aali no kumubuusha. Aipwishe ati: “Umuntu nga afwa bushe kuti aba no mweo na kabili?” Lyena ayaswike ati: “Ninshi inshiku shonse isha kucucutika kwandi [inshita inkaba mu Nshiishi] nkalolela, mpaka ukutuusha kwandi kukese. Muketa, na ine nkaasuka.”—Yobo 14:14, 15.

Marita, nkashi ya kwa Lasaro alishibe ukuti abafwa bakabuuka. Ilyo Lasaro afwile, Yesu aebele Marita ati: “Ndume yobe alabuuka.” Na o Marita atile: “Ninjishiba ukuti akema ilyo kukaba ukubuuka pa bushiku bwa kulekelesha.” Lyena Yesu amwebele ati: “Nine kubuuka kabili umweo. Uuntetekela, nangu afwa, akaba no mweo na kabili.” (Yohane 11:23-25) Lyena Yesu alibuushishe Lasaro pali bulya bwine ubushiku. Filya Yesu abuushishe Lasaro fyalelangilila ukuti abantu abengi bakabuuka ku ntanshi. Elenganyeni ifyo cikawama ilyo abantu mwi sonde lyonse bakabuushiwa!

IFYO BAIBOLO ILANDA: Baibolo itweba ukuti ukubuuka kwa kwa Yesu kwalipusana no kubuuka kwa bantu 8 abo Baibolo yalandapo. Aba abantu 8 babuukiile pano calo, lelo Baibolo ilanda pa kubuuka kwa kwa Yesu aiti: “Yesu Kristu . . . aile ku muulu uko nomba aikala ku kwa ku kulyo kwa kwa Lesa.” (1 Petro 3:21, 22) Bushe ni Yesu fye eka uwaya ku muulu? Yesu aebele abatumwa bakwe ati: “Nga naya no kumupekanishisha apa kwikala, nkesa na kabili, no kumupokelela ku mwandi, ukuti uko nkaba e ko na imwe mukabe.”—Yohane 14:3.

Ilyo Kristu aile ku muulu, alipekenye ukuti abasambi bakwe bakabe nankwe. Impendwa ya bantu abakaya ku muulu ni 144,000. (Ukusokolola 14:1, 3) Finshi aba abasambi ba kwa Yesu bakalacita ku muulu?

Bakalabomba imilimo iingi. Baibolo itila:  “Alipaalwa kabili wa mushilo onse uukabuuka mu kubuuka kwa ntanshi; pali aba imfwa ya cibili taikwetepo amaka, lelo bakaba bashimapepo ba kwa Lesa kabili aba kwa Kristu, kabili bakateka pamo nankwe imyaka ikana limo (1,000).” (Ukusokolola 20:6) Abakabuukila ku muulu bakaba ishamfumu kabili bashimapepo pamo na Kristu kabili bakalateka abakekala pe sonde.

IFYO BAIBOLO ILANDA: Mu Baibolo mwaliba amashiwi ayo umutumwa Paulo alandile ayatila: “Nalicetekela Lesa, ifyo na bo bene bacetekela, ukuti kukaba ukubuuka kwa balungama na bashalungama.”—Imilimo 24:15.

Bushe “abalungama” abo Paulo alandilepo ukuti bakabuuka ni bani? Natulande pa muntu wa citetekelo Daniele. Ilyo Daniele ali mupepi no kufwa, bamwebele ukuti: “Ukatuusha, lelo ukema no kuya ku cipendwilo cobe ku mpela ya nshiku.” (Daniele 12:13) Ni kwi Daniele akaba nga abuuka? Baibolo itila: “Abalungama e bakekala mu calo, kabili bakekalamo umuyayaya.” (Amalumbo 37:29) Yesu na o atile: “Balipaalwa abafuuka, pantu bakapyana isonde.” (Mateo 5:5) Daniele kumo na baume na banakashi ba cishinka bambi bakabuushiwa kabili bakekala pe sonde umuyayaya.

Bushe “abashalungama” abo Paulo alandilepo ukuti bakabuuka ni bani? Bantu abengi abashakwete ishuko lya kusambilila no kukonka ifyo Baibolo ilanda ilyo bashilafwa. Nga babuushiwa, bakasambilila kabili bakeshiba Yehova * na Yesu. (Yohane 17:3) Abakasalapo ukulabombela Yehova bakekala umuyayaya nga filya fine Yehova aabako umuyayaya.

IFYO BAIBOLO ILANDA: Lesa “akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili.” (Ukusokolola 21:4) “Bakakuula amayanda no kwikalamo; bakalima na mabala ya myangashi no kulya ifisabo fya yako.”—Esaya 65:21.

Elenganyeni ukuti muleikala mu calo icisuma na balupwa wenu ne fibusa abakabuuka! Na lyo line, icipusho cimbi tufwile ukwasuka ca kuti, Bushe kuti mwaishiba shani ukuti abafwa bakabuuka?