ICIPANDE ICIKALAMBA BUSUMA NSHI BWABA MU KUPEPA?
Ico Lesa Atwebela Ukuti Tulepepa
Lesa afwaya ukuti twaba cibusa wakwe.
Pa kuti abantu babe sana ifibusa, balalanshanya. Lesa na o afwaya ukuti tulelanda nankwe pa kuti twaba ifibusa fyakwe sana. Atweba ukuti: “Mukalilila kuli ine, mukesa no kupepa kuli ine, na ine nkomfwa kuli imwe.” (Yeremia 29:12) Nga mulelanda na Lesa, ‘mukapalama kuli [ena], na o akapalama kuli imwe.’ (Yakobo 4:8) Baibolo itila: “Yehova aba mupepi na bonse abalilila kuli ena.” (Amalumbo 145:18) Nga tulepepa sana, bucibusa bwesu na Lesa bukakosa.
“Yehova aba mupepi na bonse abalilila kuli ena.”—Amalumbo 145:1
Lesa alafwaya ukumwafwa.
Yesu atile: “Muntu nshi pali imwe uo umwana wakwe nga alomba umukate, engamupeela ilibwe? Nangu nga alomba isabi, bushe kuti amupeela insoka? E ico, imwe . . . mwalishiba ukupeela abana benu ifya bupe ifisuma, kanshi Shinwe wa mu muulu ena akacilapo nga nshi ukupeela ifisuma ku bamulomba!” (Mateo 7:9-11) Lesa afwaya ukuti mulepepa kuli ena pantu “asakamana imwe” kabili alafwaya ukumwafwa. (1 Petro 5:7) Lesa alimweba ukuti mulemweba amafya yonse ayo mukwete. Baibolo itweba ukuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.”—Abena Filipi 4:6.
Abantu fye bonse balafwaya ukupepa.
Abasambilila sana basanga ukuti abantu abengi balafwaya ukupepa. Nangu fye ni balya abatila Lesa takwaba na balya abatwishika nga ca kuti Lesa eko aba, balafwaya ukupepa. * Ici cilanga fye ukuti abantu bapangilwe ukuti balekabila ifya kwa Lesa. Yesu atile: “Balipaalwa abaishiba ukuti balakabila ifya kwa Lesa.” (Mateo 5:3) Nga tulafwaisha ukwishiba Lesa, tulingile ukulalanda sana nankwe mwi pepo.
Busuma nshi twingasanga nga tulekonka ifyo Lesa atweba ukuti tulepepa kuli ena?
^ par. 8 Mu 2012, abafwailisha pa fintu aba pa Pew Research Center, basangile ukuti abantu 11 pa bantu 100 abashasumina muli Lesa na batwishika ukuti Lesa eko aba, aba mu America, balapepa nangu fye umuku umo cila mweshi.
