ICIPANDE ICIKALAMBA BUSHE LESA AMONA SHANI UKULWA INKONDO?

Ifyo Lesa Amona Ukulwa Inkondo Muno Nshiku

TINIKENI

Muno nshiku, abantu balabacusha kabili balafwaya ukuti Lesa abaafwe, lelo tabaishiba nga ca kutila kuti abaafwa. Bushe cine cine Lesa tafwaya ukubaafwa? Inga balya abantu abalwa inkondo pa kuti baipokolole ku balebacusha? Bushe Lesa alafwaya ukuti bacimfye abanabo pa mulandu fye wa kuti balabacusha?

Inkondo ya Armagedone ikapwisha inkondo shonse pa calo

Mu kubalilapo, mwalaba aba nsansa ukwishiba ukuti: Lesa alamona ifyo abantu bacula muno nshiku, kabili alilanda ukuti akafumyapo amacushi. (Amalumbo 72:13, 14) Mu Cebo cakwe Baibolo, Lesa alilaya abacula ukuti “mwe balecula, akapwisha ukucula kwenu.” Ni lilali akapwisha ukucula? Baibolo itila: “Pa kusokololwa kwa kwa Shikulu Yesu ukufuma mu muulu pamo na bamalaika bakwe aba maka . . . ilyo akaleta icilandushi pa bashaishiba Lesa na bashinakila imbila nsuma iya kwa Shikulwifwe Yesu.” (2 Abena Tesalonika 1:7, 8) Yesu akasokololwa ku nshita ya ku ntanshi, pa nkondo iyo Baibolo ita ukuti “inkondo ya bushiku bukalamba ubwa kwa Lesa Wa Maka Yonse,” kabili Baibolo ita iyi inkondo ukuti Armagedone.—Ukusokolola 16:14, 16.

Muli iyi inkondo, Lesa takabomfye abantu, lelo akabomfya Umwana wakwe, Yesu Kristu, ne fibumbwa fya mupashi ifya maka sana, ku kulwa inkondo na balwani ba kwa Lesa. Ifibumbwa fya mupashi ifya ku muulu fikonaula ababifi.—Esaya 11:4; Ukusokolola 19:11-16.

Ukufika na pali ino nshita, ifyo Lesa amona ukulwa inkondo tafyayaluka. Amona ukutila ukulwa inkondo kuti kwafumyapo ubucushi no bubifi. Nomba nga fintu caleba na ku kale, Lesa umwine e wingalanda fye ilyo kufwile ukuba inkondo e lyo na balingile ukulwa inkondo. Nga fintu tumwene, Lesa alilanda kale ukuti kukaba inkondo iyo Umwana wakwe Yesu Kristu akalwa, iikafumyapo ububifi kabili iikalubula abalanda. Kanshi kuti twatila Lesa tasuminisha inkondo isho abantu balwa pali ino nshita nangu ca kuti bambi balwa pa kuti bafumyepo ubucushi.

Natulangilile: Tutile abana babili batendeka ukulwa ninshi bawishi tabalipo, lelo batala baleka ukulwa e lyo batumina bawishi foni. Umwana umo aeba bawishi ukuti umunankwe e wacitendeka ulubuli, lelo umbi na o atila ni co bacimukalifya. Abana bonse babili balefwaya ukuti bawishi batile umunankwe e ulufyenye. Na lyo line, ilyo bawishi baumfwa ku fyo abana bonse balondolola, baeba abana ukuti baleke ukulwa no kuti balalanshanya nabo bwino nga babwelela ku ng’anda. Aba abana balolelako panono e lyo batendeka ukulwa na kabili. Ilyo bawishi bafika pa ng’anda, bafulwa kabili bakanda abana bonse pantu tabakonkele ifyo babebele.

Mu fyalo umo balwa inkondo, bafwaya ukuti Lesa alebafwa pa kuti bacimfye, lelo Lesa taafwa abali bonse abalwa inkondo pali ino nshita. Icebo cakwe Baibolo citila: “Mwilabwesesha ububi pa bubi” kabili “Mwilalandula.” (Abena Roma 12:17, 19) Lesa afwaya no kutila abantu ‘batekanya pa kumulolela’ pa kuti akonaule ababifi pa Armagedone. (Amalumbo 37:7) Pali ino nshita, Lesa alipata abantu abalwa inkondo mu nshita ya kulolela pali wena, kabili abamona ukuti tabatekanya. E ico pa nkondo ya Armagedone, Lesa akalanga ukuti alikwata amaka ya kupwisha amafya ilyo ‘akalenga inkondo ukupwa ukufika ku mpela sha pano isonde.’ (Amalumbo 46:9; Esaya 34:2) Kanshi inkondo ya Armagedone ikapwisha inkondo shonse pa calo.

Ubufumu bwa kwa Lesa bukafumyapo inkondo kabili bukaleta amapaalo na yambi ayengi. Yesu alandile pa Bufumu bwa kwa Lesa mwi pepo ilyaishibikwa sana, ilyo atile: “Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:10) Ubufumu bwa kwa Lesa bukafumyapo inkondo e lyo no bubifi, ubulenga ukuti kuleba inkondo. * (Amalumbo 37:9, 10, 14, 15) Kanshi abasambi ba kwa Yesu balafwaisha ukuti Ubufumu bwa kwa Lesa bukese pa kuti bukalete amapaalo ayengi.—2 Petro 3:13.

Na lyo line, bushe tulingile ukulolela pa myaka inga pa kuti Ubufumu bwa kwa Lesa bukafumyepo ukucula, umutitikisha e lyo no bubifi? Amasesemo ya mu Baibolo ayengi ayafikilishiwa yalanga ukuti tuleikala “mu nshiku sha kulekelesha.” (2 Timote 3:1-5) * E ico nomba line, Ubufumu bwa kwa Lesa buli no kuleta Armagedone, iikalenga cino calo ukupwa.

Nga fintu tulandilepo kale, abantu abakafwa muli iyi inkondo ya kulekelesha ni balya “abashinakila imbila nsuma iya kwa Shikulwifwe Yesu.” (2 Abena Tesalonika 1:8) Na lyo line, muleibukisha ukuti Lesa tafwaya umuntu nangu umo ukufwa, kumo fye na babifi. (Esekiele 33:11) Apo “tafwaya umuntu nangu umo ukonaika” pa Armagedone, alalenga imbila nsuma pali Shikulwifwe Yesu ‘ilebilwa ku bantu bonse aba pe sonde ku kuba ubunte ku nko shonse’ ilyo impela ishilaisa. (2 Petro 3:8, 9; Mateo 24:14; 1 Timote 2:3, 4) E ico, imbila nsuma iyo Inte sha kwa Yehova babila mwi sonde lyonse, ilalenga abantu muno nshiku baishiba Lesa, bacetekela Yesu kabili ilalenga bakwata ishuko lya kwisabako ilyo Lesa akapwisha inkondo pano calo.

^ par. 9 Ubufumu bwa kwa Lesa bukafumyapo ne mfwa. Nga fintu tulandilepo mu cipande icili pe bula 16, Lesa akabuusha abantu abengi abafwa, ukubikako fye na bantu abalekanalekana abafwile ilyo kwali inkondo.

^ par. 10 Nga mulefwaya ukwishibilapo na fimbi pa fyo Baibolo yalandapo pa nshiku sha kulekelesha, belengeni icipandwa 9 mu citabo icitila Bushe Cinshi Baibolo Isambilisha? Ici icitabo calembwa ne Nte sha kwa Yehova.