Ubufi: Umulandu Inte sha kwa Yehova bashisefeshako Isita ni co te Bena Kristu.

 Icishinka: Twalisumina ukuti Yesu Kristu Mupusushi wesu, kabili tulesha na maka ‘ukukonka sana mu ntampulo shakwe.’—1 Petro 2:21; Luka 2:11.

 Ubufi: Tamwasumina ukuti Yesu balimubuushishe ku bafwa.

 Icishinka: Twalisumina ukuti Yesu alibuukile ku bafwa; ukubuuka kwakwe kwaba pa fyo twasuminamo kabili e co tulandapo sana ilyo tuleshimikila.—1 Korinti 15:3, 4, 12-15.

 Ubufi: Tamusakamana ukuti abana benu balaipusula ifi bashisefyako Isita.

 Icishinka: Twalitemwa sana abana besu, tule-esha na maka ukubasambilisha no kubafwa pa kuti baleba ne nsansa.—Tito 2:4.

•   Baibolo tayalandapo pa kusefya Isita.

•   Yesu atwebele ukulaibukisha imfwa yakwe, te kubuuka kwakwe iyo. Cila mwaka, tulebukisha imfwa ya kwa Yesu pa bushiku afwililepo ukulingana no kupenda inshita ukwa mu Baibolo.—Luka 22:19, 20.

•   Twasumina ukuti ifyo bacita pa kusefya Isita, fyafuma ku ntambi isho balekonka pa mitebeto balesefya kale pa kuti babe no bufyashi, kanshi Lesa tafwaya abantu bakwe ukulasefya Isita. Lesa afwaya ukuti e o “tulepepa fye eka,” kabili alakalipa nga tulecita ifyo ashifwaya.—Ukufuma 20:5; 1 Ishamfumu 18:21.

 Twasumina ukuti ukukanasefyako Isita kulomfwana ne fyo Baibolo yalanda. Itweba ukulabomfya “amano yene yene no kulingulula” ukucila ukulakonka fye intambi sha bantu. (Amapinda 3:21; Mateo 15:3) Nangu ca kuti tulebako abantu ifyo twasuminamo pali Isita nga batwipusha, tulacindika ifyo abantu abene basalapo ukucita.—1 Petro 3:15.