Ubufi: Inte sha kwa Yehova balakaana umuti kabili tabafwaya ukubondapa ku cipatala.

 Icishinka: Fwe Nte sha kwa Yehova tulafwaya sana ukutundapa bwino ne ndupwa shesu. Nga natulwala, tulaya kuli badokota abaishiba ukundapa kabili abaishiba ukulepula ukwabula ukubomfya umulopa. Tulatasha pa buyantanshi bwabako mu fya cipatala. Na kuba, icalengele ukuti bafwaye inshila sha kundapilamo ukwabula ukubomfya umulopa ni co balefwaya ukwafwa ba Nte. Lelo ino nshita balabomfya ishi nshila na ku kundapilako bambi. Muno nshiku abantu mu fyalo ifingi, balakaana ukubabikamo umulopa pantu tabafwaya ukwambula amalwele ayapitila mu mulopa, ukukwata amafya e lyo na mafya yabako pa mulandu wa kulufyanya pa kundapa.

 Ubufi: Inte sha kwa Yehova basumina ukuti icitetekelo kuti calenga umuntu ukupola.

 Icishinka: Tatupepelela abantu pa kuti bapoole mu cisungusho.

 Ubufi: Ukubomfya inshila shimbi isha kundapilamo ukwabula ukubomfya umulopa kwa mutengo sana.

 Icishinka: Imyundapilwe iyo bashibomfya umulopa te ya mutengo sana. a

 Ubufi: Ba Nte abengi, ukubikako fye na bana, balafwa cila mwaka pantu balakaana ukubabikamo umulopa.

 Icishinka: Ubu bufi ubwafita fititi. Badokota ilingi balacita ama opareshoni ayakalamba pamo nga aya mutima, amafupa, e lyo no kukuusha ifilundwa fya mubili ukwabula ukubomfya umulopa. b Abalwele, ukubikako fye na bana abanono abo bashibikamo umulopa, ilingi line balapola bwangu kwati fye ni balya bene babikamo umulopa, e lyo limo abo bashibikamo balapolapo na bwangu. c Takwaba uwashininkisha ukutila umuntu kuti afwa nga tabamubikilemo umulopa, nelyo ukuti nga bamubikamo te kuti afwe.

 Balaakana pa mulandu wa fyo basuminamo. Baibolo mu Cipangano ca Kale ne Cipangano Cipya itweba ukuti tufwile ukutaluka ku mulopa. (Ukutendeka 9:4; Ubwina Lebi 17:10; Amalango 12:23; Imilimo 15:​28, 29)) Na kabili, Lesa amona umulopa ukuti e bumi. (Ubwina Lebi 17:14) Kanshi tulakaana umulopa pa mulandu wa kuti tufwaya ukumfwila Lesa e lyo tufwaya no ku mucindika pantu e watupeela ubumi.

 Kale badokota balemona kwati ukundapa ukwabula ukubomfya umulopa kwalyafya sana, kabili abantu balafwa. Nomba ino nshita balileka ukutontonkanya ifi. Ku ca kumwenako, mu 2004, magazini yalelanda pa fya bumi yatile “inshila ishingi isho tubomfya pa kundapa Inte sha kwa Yehova e sho tukalabomfya sana mu myaka ya ku ntanshi.” d Icipande cali muli magazini ya kuti Heart, Lung and Circulation calandile ifi mu 2010: “‘Tatwakulaundapa fye Inte sha kwa Yehova ukwabula ukubomfya umulopa,’ tukalabomfya inshila shimo shine na pa kundapa abantu bambi.”’

 Pali ino nshita badokota abengi mu calo conse nga balebombela umuntu babomfya inshila isha kuti umulopa wa mulwele tauleonaika sana ilyo balemubombela. Inshila sha musango ifi ishakundapilamo balashibomfya na mu fyalo ifipiina kabili na balwele abengi abashili Inte sha kwa Yehova balafwaya ukubondapa mu nshila imo ine.