Bushe ba Nte Balikwata Baibolo Yabo?
Ba Nte balabomfya amaBaibolo yalekanalekana pa kusambilila Baibolo. Abakwata Baibolo ya Amalembo ya Calo Cipya mu lulimi lwabo, babomfya sana iyi Baibolo pantu mwaliba ishina lya kwa Lesa, ifyebo fyabamo fyalilungama kabili yalyanguka ukumfwa.
Ishina lya kwa Lesa. Mu maBaibolo yambi, tababikamo ishina lya kwa Lesa. Ku ca kumwenako, muli Baibolo imo mwaliba amashina ya bantu 70 abapilibwileko iyo Baibolo, lelo balifumyamo ishina lya walembele Baibolo, Yehova Lesa!
Nomba abapilibwile Baibolo ya Amalembo ya Calo Cipya, bena balibikamo ishina lya kwa Lesa umo lifwile ukuba, lelo tababikamo amashina yabo.
Ifyebo Ifyalungama. Te maBaibolo yonse ayapilibulwa ayalanda filya fine Baibolo ya kubalilapo yalembelwe. Ku ca kumwenako, imo Baibolo, pali Mateo 27:40 itila: “Eya! Te iwe waleti nkabongolola Itempele, e lyo nkalikuula mu nshiku shitatu! Kanshi ipusushe we mwine, nga uli mwana wa kwa Lesa, ika pa musalaba!” Nomba mu malembo ya kubalilapo, tababomfya umusalaba lelo babomfya ishiwi ilipilibula “icimuti.” Nalimo bakapilibula e babikilemo ishiwi lya kuti “umusalaba” pantu basumiine ukuti Yesu afwilile pa musalaba, lelo Baibolo te fyo ilanda. Baibolo ya Amalembo ya Calo Cipya yena yalilungika pantu itila: “We wingabongolola itempele no kulikuula mu nshiku shitatu, kanshi ipusushe we mwine! Nga uli mwana wa kwa Lesa, ika pa cimuti!”
Ukwanguka. Baibolo iyo bapilibula bwino ifwile ukuba filya fine icebo ca kwa Lesa calembelwe pa kubala e lyo ifwile no kuba iya-anguka ukumfwa. Moneni ica kumwenako. Yesu alandile amashiwi yaba pali Mateo 5:3 ayo bapilibula muli Baibolo ya Diocese of Mbala ati, “balishuka abapiina mu mutima.” Apo ifyo bapilibula aya amashiwi tafilenga umuntu ukwishiba umo ilembo lyalola, Baibolo ya Amalembo ya Calo Cipya yena yalyangusha. Itila, “balipaalwa abaishiba ukuti balakabila ifya kwa Lesa.”
Baibolo ya Amalembo ya Calo Cipya isuma pantu mwaliba ishina lya kwa Lesa, kabili ifyebo fyabamo fyalilungama e lyo yalyanguka ukumfwa. Lelo ubusuma bumbi bwa kuti, tabashitisha, ne ci calenga abantu abengi balebelenga Baibolo mu lulimi lwabo, kumo na bashingakwata indalama sha kushita Baibolo.
Nalimo Kuti Mwatemwako ne fi
UMULIMO WESU UWA KUSABANKANYA
Abo Bapeela Ukupilibula “Ifyebo fya Mushilo Ifya kwa Lesa”—Abena Roma 3:2
Pa myaka iingi, Inte sha kwa Yehova balebomfya amaBaibolo ayalekanalekana ayo abantu bapilibula. Nomba mulandu nshi ba Nte bapilibwilile Baibolo mu ciNgeleshi ca muno nshiku?
AMEPUSHO ABANTU BEPUSHA SANA
Bushe Baibolo ya Amalembo ya Calo Cipya Yalipilibulwa Bwino?
Cinshi Baibolo ya Amalembo ya Calo Cipya yapusanina na maBaibolo yambi?
AMEPUSHO ABANTU BEPUSHA SANA
Bushe Inte sha kwa Yehova Balyalula Baibolo pa Kuti Ilelanda Ifyo Basumina?
Imweneni ifishinka.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.