Fyonse ifyo twasuminamo fifuma muli Baibo, ne ci cilalenga tulealulako fimo ifyo twasuminamo nga ca kuti twaumfwikisha ifyo Amalembo yalanda. a

 Ifi twalulako fimo filomfwana ne shinte lya mu Baibo ilyaba pa Amapinda 4:18 apatila: “Inshila ya balungama yaba ngo lubuuto lwa lucelo uluya lulebuutilako fye mpaka akasuba kafika pa kati.” Nga filya fine akasuba ilyo kaletula kalenga tulemona panono panono ifyo incende imoneka, Lesa nao alalenga tuleya tuleumfwikisha icine, pa nshita yakwe umwine. (1 Petro 1:10-12) Nga fintu Baibo yasobele, alilenga twaumfwikisha sana icine muli ino “inshita ya ku mpela.”—Daniele 12:4.

 Uku ukwaluka takufwile ukutupapusha nelyo ukulenga twalaumfwa ububi. Ababomfi ba kwa Lesa ku nshita ya ku numa tabaumfwikishe ifintu fimo e lyo ne fyo bale-enekela tafyacitike, kanshi balingile ukwaluka mu fyo balemona ifintu.

•   Mose alefwaya ukulubula uluko lwa Bena Israele ninshi kucili imyaka 40 ku ntanshi ukulingana ne fyo Lesa alefwaya.—Imilimo 7:23-25, 30, 35.

•   Abatumwa balifililwe ukumfwikisha ubusesemo ubwalelanda pa mfwa no kubuushiwa kwa kwa Mesia.—Esaya 53:8-12; Mateo 16:21-23

•   Abena Kristu bakubalilapo bamo tabaishibe icine pa nshita ilyo “ubushiku bwa kwa Yehova” bwali no kwisa.—2 Abena Tesalonika 2:1, 2.

 Lesa alibalungike ilyo alengele baumfwikisha ifyo bashaumfwikishe, kabili tulapepa ukuti akatwalilile ukucita cimo cine na kuli ifwe.—Yakobo 1:5.