Fwe Nte sha kwa Yehova, tulesha na maka ukucita ifyo Abena Kristu balingile ukucita ukulinga ne fyo Yesu alesambilisha, e lyo ne fyo abatumwa balecita. Cino cipande cilelanda pali fimo ifyo twasuminamo.

1.   Lesa. Tupepa Lesa wa cine uwa Maka Yonse umo fye, Kabumba uwakwata ishina lya kuti Yehova. (Amalumbo 83:18; Ukusokolola 4:11) Ni Lesa wa kwa Abrahamu, Mose, na Yesu.—Ukufuma 3:6; 32:11; Yohane 20:17.

2.   Baibolo. Tumona Baibolo ukuti mwaba amashiwi ya kwa Lesa ayo alembela abantunse. (Yohane 17:17; 2 Timote 3:16) Ifyo twasuminamo fifuma mu mabuuku yonse 66, apaba “Icipingo Ca Kale” na “Icipingo Cipya.” Baprofesa Jason D.BeDuhn balilondolwele bwino sana ilyo balembele ukuti ifyo Inte sha kwa Yehova “basuminamo ne fyo bacita fifuma muli Baibolo kabili tabasalila libela ifyo balefwaya Baibolo ilande.” a

    Nangu ca kuti twalisumina muli fyonse ifyaba muli Baibolo, tatwaumina kumo. Twalishiba ukuti ifiputulwa fimo ifyaba muli Baibolo tabafilemba mu kulungatika, lelo fimo fibafishibilo kabili pa kumfwa ifyo ilelandapo taufwile ukupelela fye pa kubelenga kano waishiba ubupilibulo nelyo umo baloseshe.—Ukusokolola 1:1.

3.   Yesu. Tulakonka ifyo Yesu Kristu alesambilisha ne fyo alecita. Na kabili twalishiba ukuti ni Kalubula wesu kabili Mwana wa kwa Lesa. (Mateo 20:28; Imilimo 5:31) Kanshi tuli Bena Kristu. (Imilimo 11:26) Na lyo line, twalisambilila muli Baibolo ukuti Yesu te Lesa wa Maka Yonse kabili takwaba Amalembo ayalanga ukuti kwaba ba Lesa batatu.—Yohane 14:28.

4.   Ubufumu bwa kwa Lesa. Ubufumu bwa kwa Lesa buteko bwa ku muulu, tabwaba mu mitima ya bena Kristu. Bukafumyapo amabuteko ya bantunse kabili bukacita ifyo Lesa afwaya ukucitila abantunse. (Daniele 2:44; Mateo 6:9, 10) Ifi fine e fyo bwalacita nomba line fye, pantu amasesemo ya mu Baibolo yalanda ukuti tuleikala mu “nshiku sha kulekelesha.”—2 Timote 3:1-5; Mateo 24:3-14.

    Yesu e Mfumu ya Bufumu bwa kwa Lesa ku muulu. Atendeke ukuteka mu 1914.—Ukusokolola 11:15.

5.   Ipusukilo. Ilambo lya cilubula ilya kwa Yesu e lyalenga tulubuke ku lubembu ne mfwa. (Mateo 20:28; Imilimo 4:12) Pa kuti abantu bakanonkelemo mu cilubula ca kwa Yesu, balingile ukuba ne citetekelo muli Yesu e lyo no kwalula imibele yabo no kubatishiwa. (Mateo 28:19, 20; Yohane 3:16; Imilimo 3:19, 20) Ifyo Umuntu acita e filanga nga ca kuti icitetekelo cakwe tacafwa. (Yakobo 2:24, 26) Nomba ipusukilo lyesu talisa pa mulandu wa kuti tulebombesha, lisa pa mulandu wa “cikuuku ca kwa Lesa.”—Abena Galatia 2:16, 21.

6.   Ku muulu. Yehova Lesa, Yesu Kristu, na bamalaika aba cishinka fibumbwa fya mupashi kabili bekala ku muulu. b (Amalumbo 103:19-21; Imilimo 7:55) Abantu abanono abali 144,000 bakabuukila ku muulu, e bakalateka na Yesu mu Bufumu.—Daniele 7:27; 2 Timote 2:12; Ukusokolola 5:9, 10; 14:1, 3.

7.   Isonde. Lesa abumbile isonde ukuti abantu baleikalamo. (Amalumbo 104:5; 115:16; Lukala Milandu 1:4) Lesa akapaala abantu abacumfwila, akalenga bakabe no bumi ubusuma kabili bakekala umuyayaya pano isonde muli paradaise.—Amalumbo 37:11, 34.

8.   Ububifi no kucula. Ukucula no bubifi fyatendeke ilyo malaika wa kwa Lesa umo apondweke. (Yohane 8:44) Uyu malaika uo batendeke ukwita ati “Satana Kaseebanya,” alisembeleke abantu bakubalilapo ukuti babe ku lubali lwakwe, kabili ifyo bacitile fyalilenga abana babo balacula. (Ukutendeka 3:1-6; Abena Roma 5:12) Pa kupwisha bwino bwino ilyashi ilyo Satana alandile, Lesa alileka ifyabipa no kucula ukubako, lelo takaleke fikatwalilile ukubako.

9.   Imfwa. Abantu abafwa balaleka ukubako. (Amalumbo 146:4; Lukala Milandu 9:5, 10) Tabacula mu mulilo wa helo.

    Lesa akabuusha abantu abengi nga nshi abafwa. (Imilimo 24:15) Nomba abo Lesa akabuusha abakakaana ukusambilila inshila shakwe bakonaulwa umuyayaya kabili takababuushe na kabili.—Ukusokolola 20:14, 15.

10.   Ulupwa. Tulakonka ifyo Lesa acitile pa cupo ca kubalilapo. Icilanga ukuti mu cupo mufwile ukuba umwaume umo no mwanakashi umo, kabili kuti balekana fye nga umo acita ubucende. (Mateo 19:4-9) Twalishininkisha ukuti amano yaba mu Baibolo yalafwa indupwa ukuba ne nsansa.—Abena Efese 5:22–6:1.

11.   Ukupepa kwesu. Tatubomfya umusalaba pa kupepa nelyo ifilubi fimbi. (Amalango 4:15-19; 1 Yohane 5:21) Ifyo tucita pa kupepa Lesa paba ifyakonkapo:

    •   Ukupepa kuli Lesa.—Abena Filipi 4:6.

    •   Ukubelenga no kusambilila Baibolo.—Amalumbo 1:1-3.

    •   Ukulatontonkanya sana pa fyo tulesambilila mu Baibolo.—Amalumbo 77:12.

    •   Ukulongana pamo ku kupepa, ukusambilila Baibolo, ukwimba, ukwasukapo, no kukoselesha ba Nte banensu na bantu bambi.—Abena Kolose 3:16; AbaHebere 10:23-25.

    •   Ukubila “imbila nsuma iyi iya bufumu.”—Mateo 24:14.

    •   Ukwafwa abalekabila ubwafwilisho.—Yakobo 2:14-17.

    •   Ukukuula no kuwamya Amayanda ya Bufumu ne fifulo fimbi ifyo tubomfya pa kusambililamo Baibolo.—Amalumbo 127:1.

    •   Ukwafwa abaponenwe na masanso ayakalamba.—Imilimo 11:27-30.

12.   Icilonganino cesu. Twalikwata ifilonganino ifyalekanalekana, cila cilonganino baeluda e batungulula. Na lyo line, baeluda tabapanga utumabumba twa baeluda kabili tababafolesha indalama. (Mateo 10:8; 23:8) Tatupeela ica pe kumi, nelyo ukupoka umutulo ilyo tulelongana. (2 Abena Korinti 9:7) Indalama tubomfya pa kubomba imilimo yonse iyo tubomba shifuma ku misangulo abantu basangula mu kuitemenwa.

     Ibumba Litungulula, libumba ilinono umwaba Abena Kristu abakalamba mu fya kwa Lesa, ababombela pa maofeshi yakalamba, kabili e batungulula Inte sha kwa Yehova mwi sonde lyonse.—Mateo 24:45.

13.   Ifyo twaikatana. Bonse twasumina fye mu fintu fimo fine. (1 Abena Korinti 1:10) Na kabili tulabombesha pa kuti tatuli na kapaatulula ka mushobo, kabili tatupaatulula abantu pa mulandu ne fyo bakwata nelyo uko bafuma. (Imilimo 10:34, 35; Yakobo 2:4) Na lyo line nangu twalikatana tatucita ifintu fimo fine pantu ifyo twatemwa fyalipusana. Inte umo na umo alaisalilapo ifya kucita ukulingana na kampingu yakwe iyo asambilisha Baibolo.—Abena Roma 14:1-4; AbaHebere 5:14.

14.   Imibele yesu. Tulesha ukulanga ukutemwa kwa cine cine muli fyonse ifyo tucita. (Yohane 13:34, 35) Tulesha na maka ukukanacita ifintu ifyo Lesa apata, apaba no kubikwamo umulopa. (Imilimo 15:28, 29; Abena Galatia 5:19-21) Tuli bantu bamutende kabili tatulwako inkondo. (Mateo 5:9; Esaya 2:4) Twalicindika ubuteko konse uko twikala kabili tulomfwila amafunde ya buteko cikulu fye tayalelenga twacita ifipusene na mafunde ya kwa Lesa.—Mateo 22:21; Imilimo 5:29.

15.   Ifyo tumfwana na bantu banensu. Yesu atweba ati: “Uletemwa umunobe nge fyo waitemwa we mwine.” Alandile no kuti Abena Kristu: “Te ba muli ici calo.” (Mateo 22:39; Yohane 17:16) E ico tulesha ‘ukucite ifisuma kuli bonse.’ Na lyo line tatuitumpa mu fikansa fya calo kabili tatwikatana na macalici yambi pa kuti tubombele pamo. (Abena Galatia 6:10; 2 Abena Korinti 6:14) Kabili tulacindika ifyo abantu basalapo ukucita.—Abena Roma 14:12.

 Nga namukwata ifipusho pa fyo Inte sha kwa Yehova twasuminamo, kuti mwabelenga na fimbi pa webusaiti yesu, kuti mwatumina ku maofeshi yesu, kuti mwaya ku kulongana pa Ng’anda ya Bufumu mupepi na uko mwikala, nelyo kuti mwalanda na Nte uwaba ku ncende mwaba.