Ulupwa lwandi bena Tonga, icalo icabela ku kapinda ka ku kulyo aka bemba wa Pacific, kabili icakwata ifishi nalimo 170. Ilyo twali mu Tonga, twali abapiina ica kuti ing’anda twaleikalamo tamwali amalaiti kabili tatwakwete motoka. Lelo icawemeko ca kuti twalikwete amenshi ayelefuma ku mipaipi kabili twalitekele ne nkonko ishalinga. Nga twalaalika amasukulu, ine na ba ndume nandi babili twaleafwako batata ukubomba mu mabala ya nkonde, ifyumbu, taro na tute. Pa kusanga indalama sha kusakamaninamo ulupwa, batata baleshitisha ifi ifilimwa kabili balebombako ne milimo na imbi. Nga filya fine abengi abekala pa fishi fya Pacific bacindike sana Baibolo, ulupwa lwesu nalo lwalicindike Baibolo kabili twaleya lyonse ku calici. Na lyo line, twaishibe ukuti nga tulefwaya ukuwamyako imikalile yesu, twalingile ukuya ku calo icikankaala.

 Ilyo nali ne myaka 16, bayama balitwebele ukuti bakatukuushisha ku California, ku America. Apo intambi sha ku America shalipusana sana ne sha ku Tonga, twalingile ukwaluka mu fingi! Nangu ca kuti imikalile yesu yaliwamineko panono, twaleikala mu ncende umwali sana abapiina. Muli iyi ncende mwalifulile ubunkalwe kabili abantu balebomfya sana imiti babinda. Ilingi line ubushiku twaleumfwa imfuti shilelila, kabili abena mupalamano abengi baleumfwa umwenso ukuti ifipondo kuti fya basansa. Abantu abengi bale-enda ne mfuti pa kuti baicingilile nelyo pa kuti bapwishe ifimfulunganya. Bushiku bumo ilyo kwali ifimfulunganya balimpikile imfuti mu cifuba.

 Ilyo nali ku sukulu lya ku sekondari, nalefwaya ukulakonkelela abacaice banandi. Panono panono natendeke ukulasangwa ku ma parte ukwalecitika ifyabipa, nalenwa sana ubwalwa, nali umunkalwe kabili nalitendeke no kubomfya imiti babinda. Mu kupita kwa nshita, nalikunkwime mu kubomfya umuti babinda uo beta ukuti cocaine. Natendeke ukwiba pa kuti ndekwata indalama sha kushitamo imiti babinda. Nangu ca kuti aba mu lupwa lwandi balibikile sana amano ku fya mapepo, tabalengafwa ukuleka ukukonkelela abacaice banandi abalecita ifyabipa. Imiku iingi balenjikata pa mulandu wa kuti nalecita ubunkalwe. Imibele yandi yaleya ilebipilako fye! Basukile bankaka mu cifungo.

 Bushiku bumo mu 1997 ilyo nali mu cifungo, umufungwa munandi amwene ninjikata Baibolo. Bwali bushiku bwa Krisimasi, kabili abengi abekala ku Tonga babumona ukuti bwa mushilo sana. Alinjipwishe ukuti, ‘Bushe walishiba ifyo Baibolo ilanda pa kufyalwa kwa kwa Yesu?’ Lelo nshaishibe nangu fimo pa fyo Baibolo ilanda. Alinangile ifyo Baibolo yalanda pa kufyalwa kwa kwa Yesu, kabili nalimwene ukuti ifingi ifyo abantu balecita pa bushiku bwa Krisimasi tafyalembwa mu Baibolo. (Mateo 2:1-12; Luka 2:5-14) Nalipapile sana, kabili nalefwaya ukwishiba na fimbi ifyo Baibolo ilanda. Uyu mufungwa munandi alesangwa cila mulungu ku kulongana kwa Nte sha kwa Yehova ukwalebako mu cifungo mwine, kabili na ine nalitendeke ukusangwako. Pali ubu bushiku nasangilwe ku kulongana, balelanshanya ifyaba mwi buuku lya Ukusokolola. Nangu ca kuti nshaleumfwa ifingi ifyo balelanda, nalimwene ukuti fyonse ifyo balesambilisha fyalefuma mu Baibolo.

 Nalisumine ukutendeka ukusambilila Baibolo na ba Nte. Wali e muku wakubalilapo, nalisambilile pa fyo Baibolo yalaya ukuti ifintu fikawama mu paradaise pano isonde. (Esaya 35:5-8) Nalimwene ukuti nalingile ukwaluka mu fingi, pa kuti ntendeke ukubombela Yehova. Nalishibe ukuti Yehova te kuti ansuminishe ukwingila mu Paradaise nga ca kuti nshilekele imibele yabipa. (1 Abena Korinti 6:9, 10) E ico nalitendeke ukuilama nga nafulwa, nalilekele ukupeepa, kabili nshalefwaya ukutendeka ukunwesha ubwalwa na kabili nelyo ukulabomfya imiti babinda.

 Mu 1999, ilyo nshilapwisha imyaka bankakile mu cifungo, balintwele ku cifungo cimbi. Palipitile umwaka umo no kucilapo ukwabula ukumonanapo na ba Nte. Lelo nalitwalilile fye ukwaluka. Mu 2000, ubuteko bwalimpokele insambu sha kutwalilila ukwikala mu America, kabili banjebele ukubwelelamo ku Tonga.

 Ilyo nafikile fye ku Tonga, nshaikete na ku cani nalitendeke ukusambilila Baibolo ne Nte sha kwa Yehova. Nalitemenwe ifyo nalesambilila, kabili nalyumfwile bwino ilyo namwene ukuti ba Nte bonse abali pa cishi mu Tonga balebomfya Baibolo pa kusambilisha abantu, nga filya fine ba Nte ba ku America balecita.

 Batata balishibikwe sana pantu balikwete icifulo icikalamba mu calici balepepa. Kanshi ilyo aba mu lupwa lwandi baishibe ukuti nalesambilila ne Nte sha kwa Yehova, balipapile kabili balifulilwe. Lelo mu kupita kwa nshita, abafyashi bandi balitemenwe pantu ifyo nalesambilila mu Baibolo fyalingafwile ukuleka imibele yabipa no kuba umuntu umusuma.

 Cimo icankosele ukuleka, kulabomfya bubi bubi ifya kunwa fimo ifyo abengi mu cifulo naleikala balenwa sana. Abaume abengi mu Tonga cila mulungu balapoosa inshita iikalamba balenwa ifya kunwa beta ukuti kava. Ifi ifya kunwa bafipanga ukubomfya imishila ya cimenwa beta ukuti pepper kabili filalenga umuntu ukulaala. Kanshi ilyo nabwelele ku Tonga, nalitendeke ukuya sana uko baleshitisha kava kabili nalenwa sana ifi ifya kunwa mpaka nakolwa. Cimo icalengele ndenwa kava muli uyu musango ni co ifibusa nakwete tabacindike ifyo Baibolo ilanda. Mu kupita kwa nshita, balingafwile ukwishiba ukuti ifyo nalecita fyalefulwisha Lesa. E ico nalyalwike pa kuti Yehova ampaale na pa kuti mbe cibusa wakwe.

 Nalitendeke ukulasangwa ku kulongana konse ukwa Nte sha kwa Yehova. Ukuba pamo na bantu abale-esha apo bengapesha ukucita ifyo Lesa afwaya kwalingafwile ukulakaana amatunko ya kucita ifyabipa. Mu 2002 nalibatishiwe no kuba Inte ya kwa Yehova.

 Nalinonkelamo mu fyo Lesa antekanishishe nga filya Baibolo ilanda ukuti: “Yehova . . . alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.” (2 Petro 3:9) Ukulanda fye icishinka nga kale sana Yehova aonaula cino calo cabipa, lelo alitekanya pa kuti abantu abacita ifyabipa nga filya nalecita bengaluka no kuba ifibusa fyakwe. Ndomfwa bwino nga natontonkanya ukutila Yehova kuti amomfya ukusambilishako bambi pali ena.

 Ndatasha Yehova pantu alingafwa ukuleka ukucita ifyabipa. Nalileka ukwiba pa kuti ndesanga indalama sha kushitamo imiti babinda iyalengele nkunkume. Pali ino nshita ndesha na maka ukwafwa abantu ukuba ifibusa fya kwa Yehova. Ukuba pamo ne Nte sha kwa Yehova, kwalilengele nasanga umutemwikwa wandi Tea uo naupa. Twalikwata umwana umwaume umunono, kabili twaliba ne nsansa. Tulabombela pamo umulimo wa kusambilisha abantu pe subilo Baibolo yalandapo ilya kuti tukekala umuyayaya mu paradaise umukaba sana umutende.