Nafyalilwe mu musumba wa Ciudad Obregón uwabela ku kapinda ka ku kuso aka Mexico. Twafyelwe abali 9, kabili nine namba 5. Twaleikala ku nse ye tauni uko batata bakwete ifamu ilinono fye. Kwali ukusuma sana kabili ulupwa lwesu lwalikatene kabili lwali ne nsansa. Ku ca bulanda ilyo nali ne myaka 5 icimwela icikalamba calishile no konaula ifamu lyonse, ici calengele ukuti tukuukile kwi tauni limbi.

 Batata balitendeke ukulakwata indalama. Nomba balitampile ukunwa sana ubwalwa. Balilekele ukumfwana bwino na bamayo, kabili ici calengele mu lupwa lwesu mwaba sana amafya. Twatampile ukwibila batata fwaka no kulapeepa. Ilyo nali fye ne myaka 6 nalinwene ubwalwa pa muku wa kubalilapo kabili nalikolelwe icine cine. Ilyo papitile fye inshita inono abafyashi bandi balipaatukene kabili imibele yandi yalibipileko.

 Bamayo balitusendele uko baile mu kwikala no mwaume umbi. Bamayo tabalekwata sana indalama sha kushitamo ifyo twalekabila pantu umwaume baleikala nankwe talebapeela. Kanshi ine na bana banandi twalebomba incito ishili fye shonse pa kuti fye tukwate ifyo twalekabila. Nalepolisha insapato sha bantu, kabili naleshitisha umukate, inyunshipepala, cungamu, e lyo ne fintu fye fimbi. Kabili nalelulumba mu musumba no kulafwaya ifya kulya mu ng’ungulu sha bakankaala.

 Ilyo nali ne myaka 10 umwaume umo alinjitile ukuti tulebomba nankwe pa cishala ico balepoosapo ifisoso fya mu musumba. Nalisumine, nalilekele isukulu kabili nalifumine na pa ng’anda. Indalama nalebombela pa bushiku bumo yali iinono sana ica kuti tayalekumana na dola imo, kabili alempeela ne fya kulya ifyo twalefumya mu fisooso. Naleikala mu kamusakuta ako napangile ukubomfya ifisooso ifyo nafumishe pa cishala. Abantu abalesangwa uko nali bali ne milandile iyabipa kabili balecita ubulalelale. Abengi balikunkwime mu kubomfya imiti bubi bubi kabili bali ni bacakolwa. Ala iyi e nshita iyabipishe sana mu bumi bwandi ica kuti nalelila lyonse nga bwaila kabili naleikala fye mwenso mwenso. Pa mulandu wa kuti nalecula kabili nshasambilile, naleumfwa kwati ndi wa cabe cabe fye. Nalikele pali cilya icishala mupepi ne myaka itatu lyena nakukiile ku musumba umbi mu Mexico. Nailetendeka ukubomba mu mabala ya bantu, ukulatoola amaluba, ubutonge, ukulonganika ifisali no kusombola ifyumbu fya cilashi.

 Ilyo papitile imyaka ine, nalibwelelemo ku Ciudad Obregón. Bamayo senge abali ing’anga balimpeeleko umuputule mu ng’anda yabo. Natendeke ukulalota ifiloto ifyabipa nga nshi kabili nalesakamikwa sana ica kuti natampile ukutontonkanya pa kuyipaya. Bushiku bumo napepele kuli Lesa nati: “Mwe Lesa nga e ko mwaba, ndefwaya ukumwishiba kabili nkalamubombela ubumi bwandi bonse. Kabili nga kwaliba ukupepa kwa cine ndefwaya ukukwishiba.”

 Lyonse fye nalefwaisha sana ukwishiba ifingi pali Lesa. Na lintu nali umwaice naleya ku macalici yalekanalekana kabili ifyo basuminemo fyali ifyapusanapusana. Na lyo line tapali nangu kumo ukwansekeshe. Konse fye tabalelanda sana pali Baibolo kabili tabalelanda ifyali no kulenga namona ukuti ndesambilila pali Lesa. Bambi balelanda fye pa ndalama e lyo bambi nabo balecita sana ubulalelale.

 Ilyo nali ne myaka 19, mulamu wandi anjebele ukuti, Inte sha kwa Yehova balimulangile ifyo Baibolo ilanda ukuti tatufwile ukubomfya ifimpashanya pa kupepa. Ambelengele ilembo lya Ukufuma 20:4, 5. Ili ilembo lilanda ukuti twilabasa ifipasho. Icikomo  5 citila: “Wilafishinshimuna, nangu kufibombela; pantu ne Yehova Lesa obe ndi Lesa wa kalumwa.” Lyena mulamu wandi alinjipwishe ati, “Nga ca kuti Lesa alabomfya ifipasho pa kucita ifisungusho nangu nga ca kuti alafwaya tulefibomfya, mulandu nshi engakanisha ukuti tulefibomfya?” Ici cipusho calengele nalafwaya ukwishibilapo na fimbi. Ukufuma lilya line twalelanshanya imiku iingi pa malyashi ya mu Baibolo. Naleumfwa bwino sana ica kuti inshita twalelanshanya yalepita bwangu sana.

 Pa numa alinsendele mu kulongana kwa Nte sha kwa Yehova. Nalitemenwe sana ifyo balesambilisha ne fyo balecita. Ica kuti na baice nabo baleya na ku ntanshi no kulandako amalyashi, kabili balelanda bwino sana! Namwene ukuti kwena kuno abantu balasambilila amasambililo ayasuma icine cine! Nangu ca kuti nali no mushishi uutali uwabula no kusakula kabili nshalemoneka bwino, ba Nte balimpokelele bwino sana, ica kuti ulupwa lumo lwalinjitile na ku ca kulya ca cungulo pa numa ya kulongana.

 Ilyo nalesambilila Baibolo na ba Nte, naishileishiba ukuti Yehova Lesa ni Shifwe uwa tutemwa te mulandu tuli bapiina nelyo tuli bakankaala, twalishibikwa nelyo tatwaishibikwa, twalibuuta inkanda nelyo twalifiita inkanda, twalisambilila nelyo tatwasambilila. Takwata akapaatulula. (Imilimo 10:34, 35) Nalimwene ukuti nomba ninsanga icine. Nalilekele ukumfwa ububi filya naleumfwa ukuti kwali icacindama ico nabulishe mu bumi bwandi.

 Ubumi bwandi bwatendeke ukuwama kwati fye bufi! Nalilekele ukupeepa fwaka, ukunwensha ubwalwa, ne milandile yabipa yonse. Ubukali ubo naleumfwa ukufuma ku bwaice bwaile bulepwa nga filya fine nalekele ukulota ifyabipa. Kabili nshumfwa ukuti ndi wacabecabe fye nga filya naleumfwa ukufuma ku bwaice pa mulandu wa fyo nalecula na pa mulandu wa kuti nshasambilila.

 Nalyupa umukashi umusuma uwatemwa Yehova kabili alantungilila icine cine. Pali ino nshita nine kangalila wa muputule uwa Nte sha kwa Yehova, kabili ndatandalila ifilonganino pa kuti nkoseleshe no kusambilisha bakapepa banandi ababa ni bamunyinane na bankashi yandi aba ku mupashi. Ndatasha pa fyo Baibolo yangafwa na pa masambililo ayasuma nga nshi ayo Yehova atusambilisha. Nalileka ukumfwa ukuti ndi wa cabecabe.