“Nga ulefwaisha ukwishiba Lesa, utwalilile ukusambilila ne Nte sha kwa Yehova.” Nalipapile ilyo naumfwile aya mashiwi. Pali iyi nshita ninshi tapalakokola ukutula apo natendekele ukusambilila Baibolo ne Nte sha kwa Yehova. Nomba pa kuti mwishibe icalengele mpape, lekeni imushimikileko ifyo inkulilo yandi yali.

 Nafyalilwe mwi tauni lya Quezaltepeque ku El Salvador. Nine walenga 6 pa bana 15. Abafyashi bandi balyeseshe ukunkusha bwino pa kuti ndeba uwa cishinka kabili ndekonka amafunde. Na kabili, ba Leonardo na ba Nte babili baleisa mu kutusambilisha Baibolo. Lelo nshalekonka ifyo balensambilisha kabili natwalilile fye ukucita ifyabipa. Ilyo nali ne myaka 14, nalitendeke ukunwa ubwalwa no kubomfya imiti iyo babinda pamo na banandi nalesambilila nabo pa sukulu. Aba abanandi bonse baleleka fye isukulu umo umo pa kuti babe mwi bumba lya fipondo kabili na ine nalilekele. Twaleendauka mu misebo tulepoka abantu indalama ku maka kabili twaleiba pa kuti tulekwata indalama sha kushitamo ifyo twalefwaya.

 Abo nali nabo mwi bumba lya fipondo baishileba ngo lupwa lwandi. Nalemona ukuti nalingile ukuba uwa cishinka kuli bena. Kamwebeko cimo icacitike icilelanga ifi nalanda. Bushiku bumo, uo nali nankwe muli ili ibumba alikolelwe imiti kabili alicenene umwina mupalamano wandi. Ilyo balelwishanya, umwina mupalamano alicilile umunandi amaka kabili alitile na bakapokola. Nalikalipe ica kuti natampile ukutobaula motoka ya mwina mupalamano ne cishimbi pa kuti aleke umunandi. Uyu mwina mupalamano alimpaapeete ukuti ndeke ukutobaula motoka, lelo natwalilile fye ukutobaula amawindo ya motoka mpaka natobaula yonse.

 Ilyo nali ne myaka 18, ine na abo nali nabo mwi bumba lya fipondo twalilwile na bakapokola. Ilyo nali mu kupoosa ibomba ilyapangilwe fye pa ng’anda, nshaishibe ifyacitike, ili ibomba lyapuulikile mu minwe. Njibukisha fye ukuti nalifwile akafwa kanono ilyo namwene ukuboko kwandi nakusansaika. Ilyo nabuukile mu cipatala, nasangile ukuti balimputwile ukuboko kwa ku kulyo, ukutwi kwa ku kulyo kwalikomene kabili ilinso lya ku kulyo talyalemwenekesha.

 Nangu ca kuti ifi fyonse fyalincitikile, ilyo nafumine fye mu cipatala nalitwalilile ukuba mwi bumba lya fipondo. Tapakokwele, bakapokola balinjikete kabili balinkakile mu cifungo. Ilyo nali mu cifungo, twalikatene sana ne fipondo finandi. Cila bushiku twaleliila pamo umwikulo ilyo twaletendeka ukupeepa ibange mpaka bwaila twaya na mu kulaala.

 Ilyo nali mu cifungo, ba Leonardo balishile mu kumona. Ilyo twalelanshanya, balimwene fimo ifyalembelwe pa kuboko kwandi ukwa ku kulyo kabili banjipwishe abati, “Bushe nawishiba umwalola uto tumatoni tuli pa kuboko kobe?” Nayaswike nati, “Ee. Twimininako ukulaalana, imiti babinda, e lyo ne nyimbo.” Lelo ba Leonardo batile: “Ine kuti natila uto utumatoni twimininako icipatala, icifungo e lyo ne mfwa. Walipo mu cipatala, nomba uli mu cifungo. Ufwile nawishiba icili no kukonkapo.”

 Ifyo ba Leonardo balandile fyalimpapwishe sana ica kuti nshakwete na mashiwi. Ifyo balandile fyali fya cine. Naleilapwila umulilo pa makasa. Ba Leonardo banjebele ukuti balefwaya ukuti batendeke ukunsambilisha Baibolo kabili nalisumine. Ifyo nalesambilila mu Baibolo fyalengele njaluke. Ku ca kumwenako, Baibolo itila “ukwampana pamo na babi kulonaula imibele isuma.” (1 Abena Korinti 15:33) Kanshi cimo pa fyo nabalilepo ukucita kufwaya ifibusa fimbi. E ico nalilekele ukuya mu kukumana na bo nali nabo mwi bumba lya fipondo lelo naleya mu kulongana kwa Nte sha kwa Yehova ukwalebela mu cifungo. Ilyo twalelongana, naishibene na Andrés uwabatishiwilwe mu cifungo mwine aba ne Nte ya kwa Yehova. Alinjebele ukuyalya umwikulo nankwe. Pa numa nalilekele no kulapeepa ibange. Nomba twatendeke ukulalanshanya na Andrés ifya mu Baibolo cila lucelo.

 Abo nali nabo mwi bumba lya fipondo balimwene ukuti nalitendeke ukwaluka. E ico umo pa bakalamba ba ili ibumba anjebele ukuti alefwaya ukulanda na ine. Nalitiinine. Nshaishibe ifyo ali no kuncita nga aishiba ukuti nalefwaya ukuba Inte ya kwa Yehova pantu calikosa sana ukufuma mwi bumba lya fipondo. Atile: “Natumona ukuti walileka ukwisa ku kukumana kwesu lelo uya mu kulongana ne Nte sha kwa Yehova. Finshi ulefwaya ukucita?” Namwebele nati nalefwaya ukutwalilila ukusambilila Baibolo no kwaluka. Nalipapile ilyo anjebele ukuti aba mwi bumba lya fipondo baali no kundeka naba Inte, kulila fye natwalilila ukulanga ukuti nalefwaisha ukuba Inte ya kwa Yehova. Lyena atile: “Nga ulefwaisha ukwishiba Lesa, utwalilile ukusambilila ne Nte sha kwa Yehova. Tatuletwishika ukaleka ukucita ifyabipa. Wacita bwino sana, twalilila. Ukwabula no kutwishika ba Nte bakakwafwa. Balinsambilishepo Baibolo ku United States kabili balupwa lwandi bamo ni Nte sha kwa Yehova. Witiina, utwalilile fye.” Na lintu anjebele ifi naletiina, lelo pa nshita imo ine nalitemenwe sana. Mu mutima wandi nalitashishe sana Yehova Lesa. Naumfwile kwati cuni ico bafumya muli kasalanga kabili nalishininkishe ukuti amashiwi Yesu alandile ya cine. Atile: “Mukeshiba icine, ne cine cikamulenga ukuba abantungwa.”—Yohane 8:32.

 Bamo abo naleyangala nabo kale ilyo nali mwi bumba lya fipondo balempeelako imiti babinda kabili ukulanda fye icishinka, limo nalepoka. Mu kupita kwa nshita, kabili pa numa ya kupepa no mukosha nasukile naleka imibele yonse iyabipa.—Amalumbo 51:10, 11.

 Ilyo nafumine mu cifungo, abengi balemona kwati nkatwalilila ne misango yandi iya kale, lelo nshatwalilile. Nomba nalebwelela ku cifungo mu kushimikilako abafungwa ifyo nalesambilila mu Baibolo. Abanandi abo naleyangala nabo kale basukile bashininkisha ukuti nalyalwike. Ku ca bulanda, abalwani bandi aba kale bena tabashininkishe ukuti nalyalwike.

 Bushiku bumo ilyo ine no wa bwananyina twaile mu kubila imbila nsuma, aba mwi bumba limbi ilya fipondo abo tushaleumfwana nabo kale balishile ninshi bali ne fyanso no kutushinguluka pantu balefwaya ukunjipaya. Uwa bwananyina nali nankwe alishipile kabili alibalondolwelele mu mucinshi ukuti nalilekele ukuba mwi bumba lya fipondo. Ilyo alebalondolwela, nali fye tondolo. Pa numa ya kumpuma no kunsoka ukuti nikabwelela kuli ilya ncende, aba bantu tababomfeshe ifyanso fyabo kabili balitulekele twaya. Cine cine Baibolo yalilengele nayaluka. Nga ni filya nali kale, nga nalilandwile pali ifi bancitile. Lelo ndakonka ifyo Baibolo yalanda pali 1 Abena Tesalonika 5:15 apatila: “Cenjeleni ukuti umuntu nangu umo ebwesesha ububi pa bubi ku munankwe, lelo lyonse mulecita icisuma ku banenu na kuli bonse.”

 Ukutula fye apo nabela Inte ya kwa Yehova, ndesha na maka yandi yonse ukuba umufumacumi. Kwena tacayanguka. Lelo apo Yehova Lesa na ba bwananyina balangafwa kabili ndakonka ifyo nsambilila mu Baibolo, naliba umufumacumi. Nshifwaya ukubwelela ku misango nakwete kale.—2 Petro 2:22.

 Nali uwa lubuli sana kabili uwa cipyu. Nalishininkisha ukuti ino nshita nga nalifwa ntwalilila ukuba icipondo. Ifyo nasambilila mu Baibolo fyalilenga nayaluka. Nalilekele ukucita ifyabipa. Nalisambilila ifya kulaumfwana na bali abalwani bandi. (Luka 6:27) Pali ino nshita nalikwata ifibusa ifisuma ifingafwa ukuba ne mibele iisuma. (Amapinda 13:20) Naliba ne nsansa sana kabili mombela Lesa uwanjeleela pali fyonse ifyabipa ifyo nalecita.—Esaya 1:18.

 Mu 2006, nalile kwi sukulu lyaibela ilya bamunyinefwe abashimbe. Ilyo papitile imyaka imo, nalyupile umwanakashi uo natemwa sana kabili twalikwata umwana umo umukashana. Pali nomba mpoosa inshita iikalamba ku kusambilisha abantu amashinte ya mafunde aya mu Baibolo ayalengele njaluke. Na kabili nine eluda pa cilonganino kabili ndesha ukwafwa abacaice pa kuti bekaba ne misango iyo nali nayo ilyo nali umwaice. Mu cifulo ca kulailapwila umulilo pa makasa, nomba ndabombesha pa kuti nkakwate umweo wa muyayaya uo Lesa atulaya mu Baibolo.