Nafyalilwe mu musumba wa San Juan Chancalaito, mwi tauni ilinono ilya Chiapas, mu calo ca Mexico. Ulupwa lwandi baChol, abatuntwike kuli ba Maya. Abafyashi bandi bakwete abana 12, nine nali uwalenga 5. Ilyo nali umwaice, ine na bana banandi twalesambilila Baibolo ne Nte sha kwa Yehova. Nomba ine nshalekonka ifyo nalesambilila mu Baibolo ilyo nali umwaice.

 Ilyo nafishishe imyaka 13, nalitendeke ukubomfya imiti ikola iyo babinda kabili naleibila na bantu. Pali iyi ine inshita nalifumine pa ng’anda kabili natendeke ukwikala fye icikaleikale. Ilyo nali ne myaka 16, natendeke ukubomba mwi bala lyebange. Nalibombelemo pa mwaka umo nomba bushiku bumo mu nshita ya bushiku, ilyo twaletwala ibange ku ncende imo ukubomfya ubwato, ibumba lya baume abali ne mfuti ishikali abali mwi bumba ilyo twalecimfyanya na lyo batendeke ukutulasa imfuti. Naiposele pa mumana naibila na pa nshi pa kuti mpusuke, e lyo nayaibukila ukutali. Pa numa nabutukiile ku calo ca United States.

 Ilyo nali ku United States nalitwalilile ukushitisha ibange mu calo kabili naleiletela amafya ayengi nga nshi. Ilyo nali ne myaka 19, balinjikete kabili bapingwile ukukakwa, bampeele umulandu wa kwiba no wa kufwaya ukwipaya abantu. Ilyo nali mu cifungo, naileingila mwi bumba lya tupondo kabili nalitwalilile ukucita ubunkalwe. Ici calengele abalashi bantwale ku cifungo uko basungila ifipondo ifyo batiina sana icali mu Lewisburg, mu Pennsylvania.

 Ilyo nali muli ici cifungo, imibele yandi yaile ilebipilako fye. Apo nalilembele inembo pa mubili ishe bumba lya tupondo, tacayafishe ukwingila mwi bumba lya tupondo nalimo. Pali iyi inshita nalebelako fye umunkalwe, kabili lyonse fye nalelwa na bantu. Bushiku bumo nali pe bumba lya tupondo abalelwa mu lubansa lwa cifungo. Twalilwile bulukubuluku, twalebomfya ifibombolo e lyo ne nshimbi bemya pa kutukusha umubili. Pa kuti abalinshi ba cifungo baleshe ulubuli, babomfeshe imfuti sha mpili mpili. Pa numa abalashi bacifungo bantwele uko basungila abafungwa ababipa sana imibele abo bamona ukuti fipondo ifyakamamo na menshi. Nali ne cipyu icibi kabili naletukana sana. Naleuma abantu ilili lyonse. Na kuba naleumfwa bwino ukucita ifi. Nshaleumfwa no bubi pa fyo nalecita.

 Ilyo nali umo balesungila abafungwa ababipa sana abo balemona ukuti fipondo ifya kamamo na menshi, inshita iikalamba balenkomena fye mu muputule bambikile, e ico natendeke ukubelenga Baibolo pa kulesha icitendwe. Pa numa, uwalelinda abafungwa umo ampeele icitabo ca Kuti Waikala Kuli pe na pe muli Paradise pe Sonde. a Ilyo nalebelenga ici citabo, naibukishe ifintu ifingi ifyo nasambilile ilyo nali umwaice ilyo ba Nte balensambilisha Baibolo. Pa numa natontonkenye pa fyo ubumi bwandi bwabipile pa mulandu wa kuba umunkalwe. Natontonkenye na pa lupwa lwandi. Apo bankashi yandi babili bali ni Nte sha kwa Yehova, nailwike ukuti, ‘bakekala umuyayaya.’ Lyena nayipwisha nati, ‘Cinshi cingandesha ukwikala umuyayaya?’ Ukutula ilyo line, nalefwaisha ukwaluka.

 Na lyo line, nalishibe ukuti nalekabila uwakungafwa ukwaluka. E ico pa kubala, nalipepele kuli Yehova Lesa kabili namupaapeete ukuti angafwe. Lyena nalilembele kalata kwi ofeshi lya musambo wa Nte sha kwa Yehova mu calo ca United States kabili nalombele ukuti bamfwaileko aba kunsambilisha Baibolo. Aba ku maofeshi ya ba Nte baebele abali mu cilonganino cali mupepi ne cifungo ukwisamona. Pali iyi nshita, tabalesuminisha abali bonse abashili balupwa ukwisa mu kuntandalila, e ico Nte umwaume alitendeke ukunembela amakalata ya kunkoselesha no kuntuminako impapulo shilanda pali Baibolo, ifi fyalingafwile ukulafwaisha ukwaluka.

 Nasalilepo ukufuma mwi bumba lya tupondo ilyo nalimo pa myaka iingi. Umukalamba wa tupondo na o ali uko balesungila abafungwa ababipa sana, e ico nalilemumona pa nshita ya kwangala kabili namwebele ukuti nalefwaya ukuba Inte ya kwa Yehova. Nalipapile ilyo anjebele ukuti: “Nga taulebepa cita ifyo fine. Te kuti nkuleshe ukubombela Lesa. Nomba nga ulefwaya fye umwakufumina mwi bumba lyesu, walishiba ifikakucitikila.”

 Mu myaka ibili iyakonkelepo, abalashi bacifungo balimwene ukuti nalitendeke ukwaluka. Ici calengele bayalukako mu fyo balensunga. Ku ca kumwenako, abalelinda abafungwa balilekele ukunkanka ku minwe nga ndefuma mu muputule bankakile ndeya mu kusamba. Uwalelinda abafungwa umo alishile no kunjeba ati ntwalilile ukulayaluka. Na kuba mu mwaka wa kulekeleshako, abalashi bacifungo balimfumishe muli ici cifungo no kuntwala ku cifungo uko bashalelinda sana abafungwa icapaleme ku cifungo icikalamba. Mu 2004, pa numa ya kuba mu cifungo pa myaka 10, balimfumishe kabili bantanfiishe ku Mexico uko bantwele na basi ya bafungwa.

 Ilyo nafikile mu Mexico, nailefwaya ukwabelele Ing’anda ya Bufumu iya Nte sha kwa Yehova. Nalile ku kulongana pa muku wa kubalilapo ninshi nimfwala na yuniformu ya mu cifungo pantu e cakufwala fye icaliko bwino ico nakwete. Nangu nshalemoneka bwino, ba Nte balimpokelele ne nsansa. Ilyo namwene ifyo bali ne cikuuku, naumfwile ukuti nali pamo na Bena Kristu ba cine. (Yohane 13:35) Ilyo twalelongana, baeluda balimfwaile uwa kunsambilisha Baibolo. Pa numa ya mwaka umo, nalibatishiwe ukuba Inte ya kwa Yehova pa 3 September, 2005.

 Mu January 2007, nalitendeke ukubomba bupainiya bwa nshita yonse, nalebomba amaawala 70 cila mweshi ukulasambilisha abantu Baibolo. Mu 2011, nalipwishishe amasambililo yandi kwi Sukulu lya Bamunyinefwe Abashimbe (pali ino nshita balita ukuti Isukulu lya Bakabila ba Mbila Nsuma ya Bufumu). Ili sukulu lyalingafwile ukulabomba bwino imilimo mu cilonganino.

 Mu 2013, nalyumpile umwanakashi natemwa sana, Pilar. Umwina mwandi alanda ukuti cilamwafya ukusumina ifyo mushimikila ukuti e fyo nalecita kale. Nshabala mbwelela ku misango nali nayo kale. Ine no mwina mwandi twalisumina ukuti icalenga mbe fino naba pali ino nshita maka ayo Baibolo yakwata.—Abena Roma 12:2.

 Ng’umfwa kwati amashiwi Yesu alandile ayaba pali Luka 19:10 yalanda fye pali ine. Alandile ati: “[Naishile] ku kufwaya no kupususha abaluba.” Pali ino nshita shumfwa ukuti naliluba. Kabili nshuma abantu iyo. Ndatasha pa fyo Baibolo yangafwa ukuba ne nsansa, ukuba uwa mutende na bantu bambi kabili ne ca cindamisha, ukuba cibusa wa kwa Kabumba, Yehova.