Nafyalilwe mu La Ceiba, ku Honduras. Twafyelwe 5 kabili nine nali umwaice pali bonse. Nine nali fye umwaume kabili nkoma matwi mu lupwa lwesu. Twali abapiina sana kabili twaleikala mu ncende umwafulile ifipondo. Ilyo nali ne myaka nalimo 4, batata baliponene pa mutenge ilyo balebomba incito kabili balifwile. Ifintu fyalibipile sana.

 Bamayo balebombesha pa kutusakamana na bankashi yandi, lelo ilingi line tabalekwata indalama isha kunshitilamo ifya kufwala. Ilingi line naleumfwa impepo imfula nga yaloka, pantu nshakwete ifya kufwala fya mpepo.

 Ilyo nalekula, nalitendeke ukusambilila ululimi lwa ba nkoma matwi ulwa ku Honduras ulo beta ukuti LESHO, ulwalelenga ndelanda na ba nkoma matwi banandi. Lelo bamayo na bankashi yandi tabaishibe ulu lulimi, kanshi balebomfya fye ifishibilo ifinono ku maboko pa kulanda na ine. Na lyo line, bamayo balintemenwe kabili balencingilila ku fyabipa. Nangu ca kuti tabaishibe sana ululimi lwa ba nkoma matwi, balinsambilishe ukutaluka ku fyabipa pamo nga ukupeepa no kunwisha ubwalwa. Ndatasha sana filya bansambilishe ukutaluka ku fyabipa.

 Ilyo nali umwaice, bamayo balensenda ku Calici lya Bakatolika, lelo nshaleumfwapo fye nangu cimo pantu takwali abakumpilibwila mu lulimi lwa ba nkoma matwi. Naletalalilwa sana ica kuti nalilekele no kuya ku calici ninshi ndi fye ne myaka 10. Na lyo line, nalefwaya ukwishiba ifingi pali Lesa.

 Mu 1999, ilyo nali ne myaka 23, nalikumenye umwanakashi uwafumine ku America uwalepepa kwi calici lya evangelical. Uyu umwanakashi alitendeke ukunsambilisha ifyaba mu Baibolo, e lyo no lulimi lwa ba nkoma matwi ulwa American Sign Language. Nalitemenwe sana ifyo nalesambilila mu Baibolo ica kuti nalisalilepo ukuba shimapepo. E ico nalile ku Puerto Rico kwi sukulu basambilila ifya kwa Lesa mu lulimi lwa ba nkoma matwi. Ilyo nabwelele ku La Ceiba mu 2002, nalipangile icalici lya ba nkoma matwi, kabili abanandi bamo balingafwile ukupanga ili icalici. Umo pali aba abanandi ni Patricia, uo naishileupa mu kupita kwa nshita.

 Apo nali shimapepo mwi calici napangile, nalepepesha mu lulimi lwa ba nkoma matwi ulwa ku Honduras ulo beta ukuti LESHO, nalelanga ba nkoma matwi ifikope fya malyashi ya mu Baibolo, kabili naleangala ne fyangalo pa kuti ba nkoma matwi bomfwe amalyashi ya mu Baibolo. Na kabili, naleya mu matauni yali mupepi mu kukoselesha ba nkoma matwi no kubafwa mu fyo balekabila. Naliilepo na ku America e lyo na ku Zambia pa bulendo bwa bumishonari. Nomba ukulanda fye icishinka, nshaishibe ifingi pali Baibolo. Nalesambilisha fye abantu ifyo bansambilishe e lyo ne fyo nalemona pa fikope. Na kuba, nalikwete amepusho ayengi, lelo nshaishibe amasuko.

 Bushiku bumo, aba mwi calici lyandi balitendeke ukweba abantu ifya bufi pali ine. Balelanda ukuti nali cakolwa kabili nshali uwa cishinka ku mwina mwandi. Nalyumfwile ububi kabili nalikalipe. Papitile fye inshita iinono, ine no mwina mwandi Patricia twalifumine muli lilya icalici.

 Ilingi line Inte sha kwa Yehova baleisa mu kutushimikila, lelo ine no mwina mwandi twalekaana. Nomba ilyo twalekele ukupepa kuli lilya icalici, umwina mwandi Patricia alitendeke ukusambilila Baibolo na ba Nte abaupana, ba Thomas na ba Liccy. Nalitemenwe sana ilyo naishibe ukuti aba abaupana balisambilile ululimi lwa ba nkoma matwi, nangu ca kuti bena tabali ba nkoma matwi. Kanshi na ine nalitendeke ukusambilila Baibolo na ba Nte.

 Twalisambilile na balya ba Nte pa myeshi imo ukubomfya amavidio ya mu lulimi lwa ba nkoma matwi ulwa ku America. Nomba ilyo abanensu batubepele ukuti Inte sha kwa Yehova batungululwa no muntu, twalilekele ukusambilila Baibolo. Nangu ca kuti ba Thomas balinangile ifyalelanga ukuti ba Nte tabatungululwa no muntu, nshasumine ifyo balandile.

 Ilyo papitile imyeshi, Patricia alilwele sana amasakamika kabili alipepele kuli Lesa ukuti Inte sha kwa Yehova bamutandalile na kabili. Tapapitile inshita iitali, Inte ya kwa Yehova umwina mupalamano alitandalile Patricia no kumweba ukuti akeba ba Liccy bakesemupempulako. Ba Liccy balilangile ukuti bali cibusa ca cine. Baletandalila Patricia cila mulungu pa kuti bamukoseleshe no kumusambilisha Baibolo. Na lyo line, nshalekele ukutwishika Inte sha kwa Yehova.

 Mu 2012, Inte sha kwa Yehova balikwete kampeni yaibela iya kupeela abantu vidio ya trakiti itila Bushe Kuti Mwatemwa Ukwishiba Icine? iya mu lulimi lwa ba nkoma matwi ulo beta ukuti LESHO. Ba Liccy balituleteleko iyi vidio. Ilyo natambile iyi vidio, nalipapile sana, pantu nalimwene ukuti ifisambilisho ifingi ifyo nalesambilisha abantu, pamo nge cisambilisho ca mulilo wa pe e lyo ne ca kuti umweo taufwa, tafyabamo mu Baibolo.

 Umulungu wa konkelepo, nalile ku Ng’anda ya Bufumu iya Nte sha kwa Yehova pa kuti ndeya nande na ba Thomas. Nabebele ukuti nalefwaya ukutendeka ukusambilisha ba nkoma matwi icine pali Baibolo, lelo nshalefwaya ukuba Inte ya kwa Yehova. Ico nalefwaya kupanga icalici lyandi ilipya ilya ba nkoma matwi. Ba Thomas balintashishe pa fyo nalefwaisha ukusambilisha ba nkoma matwi icine, lelo balinangile ilembo lya Abena Efese 4:5 ililanda pa co cacindamina ukuti aba mu cilonganino ca Bena Kristu babe abaikatana.

 Ba Thomas balimpeele na vidio itila Jehovah’s Witnesses—Faith in Action, Part 1: Out of Darkness iya mu lulimi lwa ba nkoma matwi ulwa ku America. Iyi vidio yalilangile ifyo ibumba lya baume lyalefwailisha muli Baibolo pa kuti bomfwikishe amasambililo ya kutendekelako aya mu Baibolo. Ilyo naletamba iyi vidio, nalishibe ifyo balya baume baleumfwa. Nalefwaya ukwishiba icine, nga filya fine nabo balefwaya. Ilya vidio yalilengele nashininkisha ukuti Inte sha kwa Yehova basambilisha icine, pantu ifyo basambilisha fyonse fifuma mu Baibolo. E ico nalitendeke ukusambilila Baibolo na kabili. Lyena mu 2014, ine na Patricia twalibatishiwe no kuba Inte sha kwa Yehova.

 Nalitemwa icilonganino ca Nte sha kwa Yehova pantu calisanguluka nga filya fine Lesa aba uwa sanguluka. Ifyo Inte sha kwa Yehova bacita ne fyo balanda fyalisanguluka. Bamutende kabili balakoseleshanya. Inte sha kwa Yehova balikatana kabili bonse basambilisha icine ca mu Baibolo cimo cine te mulandu ne calo bekalako nelyo ululimi balanda.

 Nalitemwa sana ifyo nasambilile mu Baibolo. Ku ca kumwenako, nalisambilile ukuti Yehova e Lesa wa Maka Yonse, Uwalinga ukuteka isonde lyonse. Alitemwa ba nkoma matwi, e lyo na bomfwa. Ndatasha sana pa fyo Lesa antemwa. Nalisambilile no kuti isonde likaba paradaise iisuma, no kuti tukalaikala bwino sana kabili tukaba no bumi ubwapwililika. Ala ndafwaisha ukuti inshita iyo ifi fikacitika ikafike bwangu!

 Ine na Patricia twalitemwa ukwebako ba nkoma matwi pa fyaba mu Baibolo. Pali ino nshita tulasambilishako na bamo aba mwi calici twalepepako kale. Pali ino nshita nshitwishika ifyo nsambilisha nga filya naletwishika ilyo nali shimapepo. Ilyo nalesambilila Baibolo ne Nte sha kwa Yehova nalisukile nasanga amasuko ya mepusho nakwete.