Nafyalilwe mu musumba wa Montreal. Uyu e musumba wakulisha mu citungu ca Quebec mu calo ca Canada. Twafyelwe bane. Abafyashi besu balitutemenwe sana kabili batukushishe mu mushi uusuma nga nshi uwa Rosemont. Twaleikala bwino sana.

 Ilyo nali umwaice nalitemenwe Baibolo. Ndebukisha ukuti ilyo nali ne myaka 12 nalebelenga mu Icipingo Cipya pa fyo Yesu alecita kabili nalitemenwe nga nshi ifyo nalebelenga. Apo nalitemenwe sana ifyo Yesu atemenwe abantu ne fyo alebalangulukilako, nalefwaya ukuba nga ena. Ku ca bulanda, ilyo nakulile, ifi nalefwaya fyaile filepwa pantu natendeke ukwangala na bantu abalelenga ndecita ifyabipa.

 Batata bali ni bakalisha ba filimba. Balimpeele icilimba balelisha kabili balengele nabika sana amano ku kwimba inyimbo. Nalitemenwe sana ukwimba ica kuti bwangu bwangu nalishibe ifya kulisha icilimba ca nsale. Mu kupita kwa nshita ine na banandi twalipangile ibumba lya bakemba, kabili baletwita ukuyalisha pa fiila ifingi. Bamo abaishibikwe sana pa baletungilila bakemba ba nyimbo balishibe ibumba lyesu kabili balefwaya ukutwafwa pa kuti ibumba lyesu lishibikwe. Nalisaine ifipepala na kampani kamo akakalamba akalekopa inyimbo. Inyimbo nalelisha shalishibikwe sana kabili baleshilisha sana pa milabasa mu citungu ca Quebec.

 Nalemoneka kwati nalikwete fyonse ifyo nalefwaya. Nalishibikwe sana ninshi ncili fye umwaice kabili nalepanga indalama ishingi nga nshi mu kulisha ifilimba. Mu nshita ya kasuba naletukusha umubili mu cikuulwa batukushishamo imibili, bakalemba ba lyashi balenjipusha, naleya mu kusainina abantu abalefwaya mbasainine, kabili naleba na pa TV. Mu nshita ya bushiku nalelisha pa fiila kabili naleya na ku maparte. Natendeke ukunwa ubwalwa pa kuti nilaumfwa nsoni ilyo ndelisha ifilimba. Pali iyi nshita ninshi ncili fye umwaice, lelo panono panono natampile ukubomfya imiti iyo babinda. Na kabili naliilekeleshe kabili nali ne mibele iibi.

 Abantu bamo balenkumbwa pantu balemona kwati nali ne nsansa. Lelo mu kati naleumfwa ukuti tapali ico nali, maka maka nga ndi neka. Nali no bulanda kabili nalesakamikwa. Ku ca bulanda ilyo nalumbwike sana, babili pa balekopa inyimbo shesu balifwile ku bulwele bwa AIDS. Ala calimpeseshe amano! Nangu ca kuti nalitemenwe ukwimba, nalipatile sana ifyo bakemba banyimbo bacita.

 Nangu ca kuti nalelunduluka, nalishibe ukuti ifintu fimo mu calo fyalibipile. Ku ca kumwenako, naleyipusha nati, ‘Cinshi calenga mu calo mube ulufyengo sana? Mulandu nshi Lesa ashingashingila ukucitapo cimo?’ Na kuba, ilingi line nalepepa kuli Lesa pa kuti angasuke. Ilyo nabwelele uko naile mu kutandala, natampile ukubelenga Baibolo na kabili. Nangu ca kuti nshaumfwikishe ifingi ifyo nalebelenga, nalishininkishe ukuti impela ya cino calo yali mupepi.

 Ilyo nalebelenga Baibolo nasangile ukuti inshita imo ilyo Yesu ali mu matololo alilekele ukulya pa nshiku 40. (Mateo 4:1, 2) E co natontonkenye nati nga ca kuti na ine naleka ukulya, nalimo Lesa kuti alenga namwishiba. Kanshi nalisalile ubushiku bwa kuleka ukulya. Ilyo kwashele imilungu ibili ukuti ndeke ukulya, ba Nte babili balikonkonseshe pa ciibi. Ilyo line nalibengishe mu ng’anda. Nalibaloleshe ba Jacques bamo pali aba ba Nte mu menso e lyo nabepusha nati, “Kuti twaishiba shani ukuti tuleikala mu nshiku sha kulekelesha isha cino calo?” Pa kungasuka bakupukwile Baibolo e lyo babelenga pali 2 Timote 3:1-5. Bonse babili nalibepwishe amepusho ayengi kabili nalitemenwe ifyo baleyasuka bwino. Amepusho yonse baleyasuka ukulingana ne fyo Amalembo yalanda. Pa numa ya kulanshanya nabo pa miku iinono, nalilwike ukuti nshalingile ukuleka ukulya.

 Natampile ukusambilila Baibolo ne Nte sha kwa Yehova lyonse. Mu kupita kwa nshita nalibeyele umushishi uwali uutali kabili nalitendeke no kulaya ku kulongana konse ku Ng’anda ya Bufumu. Ifyo balempokelela ne nsansa pa Ng’anda ya Bufumu na fyo fyalengele nashininkisha ukuti ico nalesambilila e cine.

 Kwena nalingile ukwaluka sana pa kuti ndekonka ifyo nalesambilila mu Baibolo. Ica kubalilapo, nalingile ukuleka ukubomfya imiti babinda no kwalula imibele yandi. Na kabili nalingile ukuleka bukaitemwe no kutendeka ukulabika sana amano ku bantu bambi. Apo nalekusha abana bandi babili neka, nalingile ukulababikako amano kabili nalingile no kulabasambilisha ifya kwa Lesa. E ico nalilekele ukulisha ifilimba kabili naingile incito iya kupoka amalipilo ayanono mu cikuulwa umo bapangila ifintu.

 Calingafishe ukwaluka muli ifi fyonse. Ilyo naleibikilishako ukuleka ukubomfya imiti iyo babinda, nalecula sana kabili limo limo nalebwekeshapo ukubomfya iyi imiti. (Abena Roma 7:19, 21-24) Icankosele sana kuleka ifyabipa ifyo nalecita. Na kabili incito iyo naingile yalelenga ndefunshika, kabili nalesakamana sana pantu nalepoka indalama ishinono. Calensendela imyeshi itatu pa kuti nkwate indalama isho nalekwata mu maawala fye yabili ilyo nalelisha ifilimba.

 Ipepo lyalelenga ndeshipikisha ilyo naleyaluka. Na cimbi icangafwile kulabelenga Baibolo lyonse. Kwaliba Amalembo yamo aya mu Baibolo ayangafwile sana. Limo pali aya ni 2 Abena Korinti 7:1, ilitila: “Tuisangulule kuli fyonse ifikowesha umubili no mupashi.” Ilembo na limbi ilyalengele nshininkishe ukutila kuti nayaluka lya Abena Filipi 4:13, ilitila: “Muli fyonse ndi na maka pantu kuli uulenkosha.” Yehova Lesa alyaswike amapepo yandi kabili alingafwile ukwishiba Baibolo no kulakonka ifyo ilanda. Ifi fyalengele naipeela kuli ena. (1 Petro 4:1, 2) Nabatishiwe no kuba Inte ya kwa Yehova mu mwaka wa 1997.

 Nalishininkisha ukuti ntwalilila ne fyo nalecita, ino nshita nga nalifwa. Lelo ncili umumi kabili naliba ne nsansa sha cine cine! Umwina mwandi Elvie alangafwa sana. Tulabombela pamo umulimo wa nshita yonse uwa kusambilisha abantu icine ca mu Baibolo. Ifi tubombela pamo filenga ndesekelela nga nshi kabili filenga ndeteka umutima ku fyo twakwata. Ndatasha sana Yehova pa kunkulila kuli ena.—Yohane 6:44.