Abatandashi baleisa mu kutamba ifipooma ifyaishibikwa sana ifyaba mupepi na Pagsanjan mu calo ca Philippines. E ko batata ba Nardo Leron bakulile, kabili bali abapiina. Pa mulandu na mafisakanwa ayo abali mu buteko, bakapokola e lyo na pa ncito balebomba balecita, batata baishileba abakali kabili bali ne cipyu.

 Abafyashi bandi balebombesha ukukuusha abana babo 8. Ilingi line tabalesangwa pa ng’anda pa nshiku ishingi, balesakamana ifilimwa ku mpili. Ilingi line ine na ndume nandi ba Rodelio twaleisunga fye, kabili taleikala fye ne nsala. Nangu ca kuti twali abaice tatwaleyangala. Nga twafisha imyaka 7, bonse fwe bana twaleya mu kubomba mu mabala ya kokonati, twalesenda amakokonati ayengi ayafina ninshi tuleendela mu mbali ya lupili. Ifyo tusendele nga fyafina, baletweba ukulafikula.

 Batata baletuuma, lelo icalenkalipa sana ku mona uko baleuma bamayo. Twaleesha ukubalesha, lelo twalefilwa. Ine na ba Rodelio twalipangene ukuti nga twakula tukepaya batata. Nalefwaya ukukwata batata abatutemenwe!

 Pa mulandu ne fyo batata bali abankalwe, nalifumine pa ng’anda ninshi ndi ne myaka 14. Naleikala mu musebo, kabili nalitendeke ukupepa ibange. Mu kupita kwa nshita, natendeke ukubomba no bwato, naletwala abatandashi ku kutamba ifipooma.

 Pa numa ya myaka iinono, natendeke ukusambilila pa universiti ya mu musumba uukalamba uwa Manila. Lelo apo naleya ku Pagsanjan mu kubomba pa mpela ya mulungu, nshalekwata inshita ya kubelenga. Imikalile yalyafishe kabili nshali ne nsansa, ibange lyalilekele ukungafwa ukuleka ukusakamana. Natendeke ukubomfya imiti babinda, cocaine, na heroin. Ilingi line ukubomfya imiti kwalelenga nalacita ubulalelale. Abantu bali abapiina, balecula kabili kwali no lufyengo. Nalipatile ubuteko kabili nalebupeela umulandu ukuti e bwalelenga aya mafya. Naleipusha Lesa nati, “Mulandu nshi ifintu fyabela ifi?” Lelo imipepele iyalekanalekana iyo napepelemo yalefilwa ukwasuka ici cipusho. E ico natendeke ukubomfya imiti iingi pa kuti ubulanda bucepeko.

 Mu 1972, abana besukulu mu Philippines balipekenye ukuti bakailishanye mu musebo pa fyo buteko bwalecita. Na ine nalileko, lelo kwaileba ubunkalwe. Abantu abengi balibekete kabili pa numa ya myeshi, abashilika e batendeke ukusungilila umutende mu calo ukucila bakapokola.

 Natendeke ukulaikala mu musebo na kabili, icalengele ni co naletiina abalashi babuteko pantu naine nali pa bapondweke. Pa kuti ndekwata indalama shakubomfya ku miti nalebomfya, natendeke ukwiba, pa numa natendeke ukulaala na bantu aba ndalama sana e lyo na balefuma ku fyalo fimbi. Nshasakamene ukutila kuti nafwa.

 Ilyo ifi fyalecitika, bamayo na ndume nandi umwaice balitendeke ukusambilila Baibolo ne Nte sha kwa Yehova. Batata balifulilwe sana kabili balyocele ne mpapulo isho bakwete. Lelo tabalekele ukusambilila kabili balibatishiwe no kuba ba Nte.

 Bushiku bumo, Nte alandile na batata pa fyo Baibolo yatulaya ukuti ku ntanshi kukaba umulinganya mwi sonde lyonse. (Amalumbo 72:12-14) Batata balitemenwe sana ubu bulayo ica kuti abene batendeke ukufwailisha ifishinka. (Abena Efese 5:28; 6:4) Tapakokwele sana batata na bana banandi bonse baishileba Inte sha kwa Yehova. Ine apo nali ukutali na ku ng’anda, nshaishibe no kuti ifi fyalicitike.

 Mu 1978, nakukiile ku Australia. Lelo nangu ca kuti muli ici calo mwaliba umutende kabili abantu balikwata icuma, nshakwete umutende. Nshaleke ukunwa ubwalwa no kubomfya imiti babinda. Pa numa ya mwaka umo, Inte sha kwa Yehova balishile pa ng’anda. Nalitemenwe ifyo balebelenga mu Baibolo pa calo ca mutende, lelo shalefwaya ukulaba nabo.

 Tapakokwele, nalibwelelemo ku Philippines pa milungu iinono. Abana banandi banjebele ukuti batata balyaluka, lelo umutima walikalipe sana ica kuti nshalefwaya no kubamona.

 Nkashi yandi umwaice abomfeshe Baibolo pa kunondolwela icilenga tulecula ne cilenga kwaba ulufyengo. Nalipapile ukumona umwaice uushaishiba ne fingi pa calo aleyasuka amepusho nakwete. Ilyo nshilafumako, batata bampeele icitabo citila Kuti Waikala Kuli Pe na pe Muli Paradise Pe Sonde. a Banjebele abati: “Leka ukufwaya ifingalenga waba ne nsansa ku mbi. Ici citabo calakwafwa ukusanga ifyo lefwaya.” Banjebele ukuyafwaya Inte sha kwa Yehova nga nabwelelamo ku Australia.

 Nalicitile ifyo batata banjebele kabili nalisangile Ing’anda ya Bufumu iya Nte sha kwa Yehova mupepi noko naleikala ku Brisbane. Nalitendeke ukusambilila Baibolo. Amasesemo ya mu Baibolo pamo nga ayaba mu cipandwa 7 ice buuku lya kwa Daniele ne cipandwa 9 mwi buuku lya kwa Esaya, fyalilengele naishiba ukuti Ubufumu bwa kwa Lesa umushaba amafisakanwa, e bukalatuteka ku ntanshi. Nalisambilile no kuti tukalaikala bwino mu Paradaise pano isonde. Nalefwaya Lesa antemwe, lelo nalishibe ukuti nalingile ukulalama ubukali, ukuleka ukubomfya imiti iyabindwa no kunwesha ubwalwa, kabili nalingile ukuleka ukucita ubulalelale. Nalilekele ukwikala no mukashana naleikala nankwe, kabili nalilekele no kucita ifyo nalecita kale. Ilyo icitetekelo candi muli Yehova caleya cilekoselako, nalepepa ukuti angafwe ukwaluka na muli fimbi.

 Mu kuya kwa nshita, nalilwike ukuti ifyo nalesambilila kuti fyayalula umuntu. Baibolo itila nga twaibikilishako, kuti twafwala “ubuntu bupya.” (Abena Kolose 3:9, 10) Ilyo naletulukusha ukufwala ubuntu bupya, nalimwene ukuti ifyo naumfwile ukuti batata balyaluka nalimo fya cine. Mu nshita ya kuti ntwalilile ukubapata no kulaenda no bukali ku mutima, nalefwaisha ukupanga umutende nabo. Mu kulekelesha, ba batata nalibelele kabili nalilekele ukwenda ne cinkonko ico nakwete ukufuma ku bwaice.

 Ilyo nali umwaice, ilingi line nalekonkelela abali ne mibele yabipa. Ifyo Baibolo itusoka fya cine, ukwampana pamo na ba mibele iibi kwalilengele naba ne mibele iyabipa. (1 Abena Korinti 15:33) Nomba nalikwata ifibusa ifisuma pa Nte sha kwa Yehova kabili balingafwa ukuba umuntu umusuma. Kabili nalisanga umukashi umusuma, Loretta. Ine no mwina mwandi tulasambilisha abantu ifyo Baibolo ingabafwa.

 Ndatasha sana ukukwata Baibolo, nalimwene ukuti batata balyalwike sana, icintu ico nalemona ukuti te kuti cicitike, balume abasuma, baliicefya kabili ba mutende. Ilyo twakumene na batata pa numa nabatishiwa naba ne Nte ya kwa Yehova mu 1987, batata balinkumbatile pa muku wa kubalilapo ukutula apo nafyalilwe!

 Na pa numa ya myaka ukucila pali 35, batata balitwalilile ukubomba pamo na bamayo umulimo wa kubambilisha abantu Baibolo. Bali abacincila kabili baishibikwe ukuti balitemenwe abantu. Muli iyi myaka, nalisambilile ukulabacindika no kubatemwa. Nalitemenwe sana ukuti nali umwana wabo umwaume! Batata bafwile mu 2016, lelo ndabafuluka sana, nalishiba ukuti bonse babili twalyalwike sana ilyo twalecita ifyo Baibolo isambilisha. Nshabapata nangu fye panono. Na kabili ndatasha ukuti nalisanga Tata wa ku muulu Yehova Lesa, uwalaya ukupwisha ifilenga mu ndupwa mwaba amafya.