Ba Bryn abekala ku North Carolina, ku U.S.A. baba muli Komiti ya Kumfwaninamo ne Fipatala. Ababa muli iyi komiti balabombela pamo na babomfi ba mu fipatala ku kwafwilishako Inte sha kwa Yehova abalwele.

 Apo kwali icikuko ca COVID-19, aba mu fipatala tabalesuminisha abali bonse ukuya mu kupempula abalwele. Ba Bryn batumine foni ku mukalamba wa pa cipatala uupekanya ukuti abalwele e lyo ne ndupwa shabo balebakoselesha ku ba mapepo.

 Ilyo ba Bryn batumine foni, balanshenye ne nkonkani ya mukalamba wa pa cipatala. Apo tabalesuminisha ukupempula abalwele, ba Bryn balombele nga ca kuti inambala yabo iya foni kuti baipeela kuli ba Nte abalwele abali mu cipatala. Balibasuminishe.

 Lyena ba Bryn batontonkenye pa babomfi ba mu cipatala. Baebele inkonkani ya mukalamba wa pa cipatala ukuti baletesha sana pa fyo aba mu cipatala balebombesha kabili babepwishe ifyo bali. Balandile no kuti balibelengele ifyo abantu fye bonse maka maka ababomfi ba mu cipatala banakile sana no kusakamikwa pa mulandu wa cikuko.

 Inkonkani ya mukalamba wa pa cipatala atile icikuko ca COVID-19 calilenga ababomba pa cipatala ukulanaka icipesha mano.

 Ba Bryn lyena batile: “Pa webusaiti yesu paliba ifyebo ifingafwa abantu nga nabanaka nelyo ukusakamikwa. Nga mwaya pa jw.org e lyo mwaya apatila Fwayeni no kulembamo ati ‘ukunaka’ nelyo ‘ukusakamikwa,’ kuti mwasanga ifyebo ifingafwa ababomfi ba pa cipatala cenu.”

 Ilyo bali balelanda, inkonkani ya mukalamba wa pa cipatala alile pali webusaiti yesu no kufwaya apatila Fwayeni no kulembamo ati “ukunaka,” kabili alisangilepo ifipande ifyalelanda pali ili lyashi. Alipapile e lyo alanda ukuti: “Nalalangako abakalamba ba pa cipatala. Ifi fyebo kuti fyakoselesha sana ababomfi ba pa cipatala e lyo na bantu fye bambi. Nalapulinta no kupeela bonse ababomba pa cipatala.”

 Ilyo papitile imilungu, ba Bryn balitumine foni abakalamba ba cipatala abalandile ukuti balile pa webusaiti kabili balimwene ifipande ifyalelanda pa kunaka no kusakamikwa no kufipulinta. Kabili bafipeele kuli ba nasi e lyo na bambi ababomba pa cipatala.

 Ba Bryn batile: “Umukalamba wa pa cipatala alintashishe pa mulimo tubomba na pa fipande ifisuma ifyaba pa Intaneti. Atile fyalibakoseleshe sana.”