Ba Yanmei ba Nte ba ku Asia, balyafwile ba Mingjie abashimona ukuciluka umusebo. * Ba Mingjie batile: “Natasha, shi Lesa amupaale!” Ba Yanmei baipwishe ba Mingjie nga kuti batemwa ukuti bakalanshanye na bo ifya mu Baibolo. Ba Mingjie baishilelanda ukuti balepepa cila bushiku ukuti bakasange icilonganino ca cine ica kwa Lesa. Mulandu nshi balepepela ifi?

 Ba Mingjie balandile ukuti mu 2008 balibalaalike ku munabo uushimona ukuti baye ku calici uko baleafwa abantu abalemana. Ilyo ba Mingjie baumfwile ifyo shimapepo apepeshe, bamwipwishe ibuuku umo afumishe yalya mashiwi. Abaswike ati ni Baibolo, Icebo ca kwa Lesa ica cine. Ba Mingjie balefwaisha ukubelenga Baibolo. E ico balifwaile Baibolo ya mu ciChinese iya filembo fya bashimona kabili balibelengele amavolyumu 32 mu myeshi fye nalimo 6. Ilyo ba Mingjie balebelenga Baibolo baishileishiba ukuti ifyo balebasambilisha ku calici ukuti muli Lesa umo mwaba abene batatu fya bufi kabili baishileishiba no kuti ishina lya kwa Lesa ni Yehova.

 Mu kuya kwa nshita, ba Mingjie balitendeke ukumfwa ububi pa fyo aba mu calici balecita. Baishileishiba ukuti ifyo balecita tafyalingene ne fyo Baibolo ilanda. Ku ca kumwenako, aba mu calici e balebalilapo ukulya e lyo ifya kulya nga fyashalapo e fyo balepeela abashimona. Ba Mingjie tabatemenwe ifi aba mwi calici balecita e ico batampile ukufwaya uko bengalapepa kumbi. E mulandu wine ba Mingjie balepepela ukuti bengasanga icilonganino umwaba Abena Kristu ba cine.

 Filya baYanmei balangile icikuuku kuli ba Mingjie, fyalengele basumine ukulasambilila Baibolo. Pa numa, ba Mingjie balisangilwe ku kulongana kwa Nte sha kwa Yehova. Batile: “Nshakalabe ifyacitike ilyo naile mu kulongana. Bamunyina na bankashi balimposeshe sana ne nsansa. Nalyumfwile bwino sana. Nangu ca kuti nshimona, nalimwene ukuti balintemenwe icine cine.”

 Ba Mingjie balelunduluka kabili balitendeke ukulalongana lyonse. Balitemenwe sana ukwimba inyimbo sha Bufumu, lelo limo caleafya pantu tabakwete icitabo ca lwimbo mu filembo fya bashimona. E ico aba bwananyina balyafwile ba Mingjie ukupanga icitabo ca lwimbo. Bapooselepo ama-awala 22 pa kuti fye bapange inyimbo shonse 151 ishaba mu citabo ca lwimbo! Mu April 2018 ba Mingjie batendeke ukulabila imbila nsuma ya Bufumu kabili balebomba ama-awala nalimo 30 cila mweshi.

 Pa kuti ba Mingjie baipekanye bwino ukuti bakabatishiwe, ba Yanmei balikopele amashiwi aya fipusho e lyo na malembo ifyaba mu citabo ca Abateyanishiwa ku Kucita Ukufwaya kwa kwa Yehova. Mu July 2018 ba Mingjie balibatishiwe. Batile: “Nshakalabe ukutemwa uko bamunyinane e lyo na bankashi bakwete pali kulya kulongana kwa citungu. Nalililile pantu naishileishiba ukuti nomba naba mu lupwa lwa cine ulwa cilonganino ca kwa Lesa.” (Yoh. 13:34, 35) Apo ba Mingjie balafwaya sana ukulanga ukutemwa uko babalangile, balabila imbila nsuma inshita yonse.