Mu Mexico na mu Central America, bakapilibula 290 abekala mu fyalo 6 balapilibula impapulo ishilanda pali Baibolo mu ndimi ukucila pali 60. Mulandu nshi bapilibwila impapulo mu ndimi ishafula ifyo? Pantu abantu nga babelenga impapulo shilanda pali Baibolo mu lulimi ulo balanda, ifyebo filabafika sana pa mutima.—1 Abena Korinti 14:9.

Pa kuti balepilibula bwino, bakapilibula bamo abalebombela pa maofeshi ya Nte sha kwa Yehova ayaba mu Mexico City balibatuma mu kubombela mu ncende umo indimi bapilibula shilandwa. Bushe ici cabafwa shani? Bakapilibula balomfwa ifyo abantu balanda indimi isho bapilibula, ne ci calenga balepilibula impapulo ishaanguka ukumfwa.

Bushe bakapilibula bomfwa shani pali uku kwaluka? Ba Federico abapilibula iciGuerrero Nahuatl batile: “Pa myaka nalimo 10 iyo nali mu Mexico City naishibeko fye ulupwa lumo abalelanda ululimi ulo nanda. Lelo pali ino nshita, abantu mupepi na bonse abekala mu misumba iyabela mupepi na maofeshi ya bakapilibula balanda ulu lulimi!”

Ba Karin abapilibula iciLow German pe ofeshi ilyabela mu citungu ca Chihuahua ku Mexico, batile “Ukwikala mu ncende umwikala abaMenno kwalilenga njishibe bwino ululimi lwabo. Twikala no kubombela mu musumba uunono, kabili nga nalengela pe windo, ndamona abantu abakalabelenga impapulo tulepilibula.”

Ba Neyfi ababombela pe ofeshi lya bakapilibula mu Mérida ku Mexico, batile: “Nga tulesambilisha abantu Baibolo mu ciMaya, tuleshiba amashiwi ayo abena Maya bafilwa ukumfwa. E co tupilibula ifyo abantu balanda mu cifyalilwa.”

Bushe ababelenga impapulo ishapilibulwa bomfwa shani? Moneni ica kumwenako: Pa myaka 40 ba Elena abalanda iciTlapanec, lyonse baleya mu kulongana kwa Nte sha kwa Yehova. Lelo, apo bali mu cilonganino ca ciSpanish, tabaleumfwa ifyo balesambilila. Ba Elena batile “Naleila fye ku kulongana ico cine.” Nomba ilyo batampile ukusambilila Baibolo mu mabroshuwa ya mu ciTlapanec balitemenwe sana Lesa ica kuti baliipeele kuli Yehova kabili balibatishiwe mu 2013. Batile “Ndatasha Yehova pa kungafwa ukwishiba bwino Baibolo.”