“Ala balitulangile sana ukutemwa!” E fyaumfwile umwanakashi umo uwa ku Ukraine uwakutike ku mashiwi yacindama sana ayali muli kalata iyabelengele munyinefwe Stephen Lett uwa mwi Bumba Litungulula ilya Nte sha kwa Yehova. Uyu mwanakashi ali pali ba Nte 165,000 abakutike ku lyashi munyinefwe Lett alandile ilyo atandalile cilya calo pa 10 na pa 11 May, mu 2014.

Amalyashi ya mu Baibolo e lyo na kalata yabelengelwe balifipilibwile mu ndimi 5 kabili abalongene mu Mayanda ya Bufumu 700 mu Ukraine balikutike kuli programu.

Pa nshiku shimo shine, munyinefwe Mark Sanderson, na o uwa mwi Bumba Litungulula, alibelengele kalata pali programu iyo bamunyinefwe mu Russia yonse bakutikeko. Iyi programu yapilibwilwe mu ndimi 14, kabili bamunyinefwe 180,413 mu filonganino ukucila pali 2,500 mu Belarus na mu Russia balikutike kuli programu.

Kalata, iyafumine kwi Bumba Litungulula, yalembelwe ku filonganino fyonse ifya mu Russia na mu Ukraine. Munyinefwe Sanderson aibelengele mu lulimi lwa bena Russia, kabili ici calengele iofeshi lya Nte sha kwa Yehova ilya mu Russia ukulemba ukuti: “Bamunyinefwe ne nkashi calibafikile sana pa mutima ilyo bamwene ukuti Ibumba Litungulula lyalibika sana amano ku ba bwananyina abekala kuli iyi ncende. Ifwe bonse twaumfwile kwati nabatukumbatila ku ba mwi Bumba Litungulula.”

Iyi kalata bailembele ku kusansamusha no kukosha ba Nte ababa mu fyalo umwaba ifimfulunganya. Yakoseleshe bamunyinefwe ukutwalilila ukukanaba “aba muli ici calo” pa kukanaipoosa mu fikansa fya mu mitekele ya muli cino calo.—Yohane 17:16.

Ibumba Litungulula lyalikoseleshe ba Nte ukutwalilila ukulapepa lyonse, ukulaisambilisha, no kulatontonkanya pa Cebo ca kwa Lesa pa kuti baleba na bucibusa busuma na Yehova. Bamunyinefwe babacinkwileko ukuti te mulandu na mesho ayengesa pali bena, balingile ukucetekela ubulayo bwa kwa Lesa ubwaba pali Esaya 54:17, apatila: “Icanso conse ico bakupangila tacakabombe.”

Amashiwi ya kulekeleshako muli kalata Ibumba Litungulula lyalembele yaleti: “Twalimutemwa nga nshi imwe bonse. Muleibukisha ukuti tulamutontonkanyapo lyonse kabili tulamupepelako no kumupapaatilako kuli Yehova.”

Ilyo iofeshi lya Nte sha kwa Yehova mu Ukraine lyalelanda pali uku kutandala, lyatile: “Bamunyinefwe balisansamwike nga nshi ilyo bamwene ifyo aba mwi Bumba Litungulula babatemwa no kubabikako sana amano. Ukutandalilwa na munyinefwe Lett kuno ku Ukraine e lyo munyinefwe Sanderson ku Russia pa nshiku shimo shine kwalangile fye ifyo abantu ba kwa Lesa baikatana ne fyo Yehova na Yesu batubikako amano. Bonse fye twamwene ukuti baishile pa nshita yalinga, kabili natukoshiwa ukutwalilila ukubombela Yehova te mulandu na mafya ayo twingapitamo.”