Abantu mwi sonde lyonse nabatemwa jw.org pantu ilebafwa sana. Pe samba pali amashiwi ya kutasha ayo abantu bamo batuma ku maofeshi yakalamba aya Nte sha kwa Yehova ukutula mu May 2014.

“Umwana wandi uuya kwi sukulu lya ku nasari alesendela abanankwe amapensulo, utwa kwangasha, na makalashi ya kufwala ku menso. Twalyeseshe ukumwafwa pa miku iingi ukwishiba ukuti ifyo alecita cimo cine no kwiba no kuti ukwiba kwalipa. Alifililwe ukumfwa mpaka twakopolola vidio ya pa jw.org iitila Ukwiba Kwalibipa. Iyi vidio yalibombele bwino sana kabili yalyafwile umwana wesu. Ilyo atambile, alisumine ukubwekeshamo fyonse ifyo asendele pantu nomba alishininkishe ukuti Lesa alipata ukwiba. Iyi webusaiti yalitwafwile nga nshi!”—D. N., Africa.

“Abana bandi balitemwa iyi webusaiti. Balakopolola amavidio ya bakadoli ayepi ayabafwa ukulankonka amashiwi ya mu Baibolo ayatutungulula ayalanda pa kubepa no kwiba. Balasambililako imibele na imbi iyacindama iyo bengabomfya mu bumi bwabo iingabafwa ukulaikala bwino na bantu.”—O. W., West Indies.

“Nalemona kwati isukulu cisendo sana, kabili nalefwaya ukuleka. Lelo bushiku bumo, nabelengele icipande icaletila ‘Bushe Nkaleke Isukulu?’ pa webusaiti ya jw.org. Calingafwile ukutemwa isukulu. Ici cipande calinsambilishe ukuti ukuya ku sukulu kukangafwa ukulaikala bwino ku ntanshi no kuba umuntu umusuma.”—N. F., Africa.

“Ifyebo ifisuma ifya bacaice ifyaba pali iyi webusaiti fyalingafwa ukutwalilila ukuba ne mibele iisuma pa sukulu. Nalisambilila ukubika amano ku sukulu kabili ndataluka ku fingampumfyanya.”—G., Africa.

“Umuntu uo momba nankwe aleilishanya ukuti umwana wakwe umukashana balemucusha ku banankwe pa sukulu, maka maka ku mukashana umo. Ici calengele umukashana asakamane sana ica kuti alilekele ukuya ku sukulu pa nshiku shimo umulandu no mwenso. Nalilandile no yu mufyashi momba nankwe pali vidio iyaba pa jw.org iitila Ifyo Wingacimfya Uulekucusha Ukwabula No Kulwa Nankwe. Atemenwe sana ukupanda amano kwa kutila kuti abomfya imipuulwe pa kuti takalifye uulemucusha. Alilanshenye no mwana wakwe pa fyo engacita pa kuti abanankwe belamucusha. Icafuminemo ca kuti umukashana alishipile no kuya ku sukulu. Mu kupita kwa nshita, umukashana uwalemucusha alilekele ukumucusha kabili balitendeke no kulaumfwana.”—V. K., Eastern Europe.

“Natootela pa cipande caba pa webusaiti icitila ‘Mulandu Nshi Njicenena ku Mufulo Fye?’ Ubu e bwafya ncula nabo pa myaka iingi. Nalemona kwati nine neka nakwata ubu bwafya kabili naletiina ukwebako bambi pantu nalemona kwati takuli uwingang’umfwikisha. Ifya kumwenako fyaba mu cipande fyalingafwa sana. Ndetasha sana ukungafwa ukwishiba ukuti kanshi kwaliba uwingang’umfwikisha!”—Umwanakashi uwa mu Australia.

“Webusaiti ya jw.org ilangafwa ukusanga bwangu ifyebo ifingafwa abacaice. Icipande cimo calingafwile ukwishiba imisango iyo abaume benganshupilamo, ukwishiba ukuti balenshupa, no kusambilila ifyo ningacita nga ca kuti umwaume alenshupa.”—T. W., West Indies.

“Umwana wandi umwaume alyanga. Ilingi line ifyo acita filampesha amano. Ne ci calengele twilalanshanya bwino. Bushiku bumo naile pa jw.org no kuya pa cipande citila abaupana e lyo na bafyashi. Nalisangilepo ifipande ifyalelanda pa bwafya nakwete kabili nalisambilileko ifya kulanshanya bwino no mwana wandi. Na o wine webusaiti yalimwafwa sana. Pali lelo tamfisa nangu cimo, alanjebako ifilemuletele nsansa ne filemusakamika.”—C. B., Africa.

“Webusaiti ya jw.org ilatwafwa ukusambilisha bwino abana besu kwati tuleangala fye. Ku ca kumwenako, vidio ya bakadoli iilanda pa fya kusanga ifibusa fya cine yalyafwile abana besu ukwishiba ifya kusala ifibusa ifingabafwa ukukwata imibele iisuma. Ilingi line ifiipande fifuma pa jw.org pa nshita ilya ine tulefikabila kabili filatwafwa ukwafwa abana besu nga bali no bwafya. Ala iyi webusaiti yalikwata ifyebo ifisuma nga nshi.”—E. L., Europe.

“Ine no mukashi wandi twaikala imyaka 6 mu cupo. Nga filya fine ciba kuli bonse abaupana, tulakwata amafya pa mulandu wa kuti twalipusana inkulilo, imilanshanishishe, ne fyo tumona ifintu. Icipande caba pa jw.org icitila ‘Ifya Kucita pa Kuti Mulekutikisha’ nalicitemenwe sana. Calikwete ifyebo ifisuma ifingalenga umuntu ukuba kakutika musuma. Nalicibelengele kabili nalishimikileko umukashi wandi ifyo nabelengele. Tulakonka ifyo twasambilile muli cilya cipande.”—B. B., West Indies.

“Nomba napapita umwaka umo ukutula apo natampila ukulongana ne Nte sha kwa Yehova kabili ndefwaya imutashe pali webusaiti ya jw.org. Nalisambilila ifingi sana pali iyi webusaiti pamo nga ifya kuilama, ifya kuba umulume musuma, ne fya kuba umufyashi musuma. Ukulanda fye icishinka, iyi webusaiti yalilenga ukuti icupo cesu cipwa.”—L. G., West Indies.

“Webusaiti ya jw.org yalinenga ukuba ne nsansa. Amavidio ya American Sign Language yalingafwa ukwishiba sana ululimi lwa bankomamatwi. Nalemona kwati nalimo tapali ifyo ningacita mu bumi, lelo ilyo natambile vidio itila Seeing God’s Word in My Language, nalyumfwile bwino sana kabili yalengele ukuti ndetontonkanya sana pa fintu ifindetela insansa.”—J. N., Africa.

“Cine cine iyi webusaiti isuma nga nshi. Imomba umulimo wa kwafwilisha bankomamatwi, maka maka abacaice. Amavidio yaba pa webusaiti yalingafwa ukwishiba sana ululimi lwa bankomamatwi. Iyi webusaiti yalilenga ndeyafwa abafwaya ukulaikala bwino mu ndupwa no kulaumfwana bwino ne fibusa.—K. J., West Indies.

“Nshimona lelo webusaiti ya jw.org yalingafwa. Ndasangapo ifyebo ifya kutila kuti papita imyeshi pa kuti mfipokelele nga kubomfya ba Post Office. Webusaiti yalingafwa pamo no lupwa lwandi kabili yalilenga naba umuntu umusuma mu bwikashi. Na kabili yalilenga ndepokelela ifyebo pa nshita imo ine na banandi abamona.”—C. A., South America.

“Ku bashibelenga ifilembo fya mpofu nelyo abashakwata indalama sha kushita ifitabo fya mu filembo fya mpofu, jw.org yalicindama sana. Ukubomfya impapulo bakopa, abashimona kuti bakutika ku malyashi ayalekanalekana mu fipande ifyafumine nomba line. Iyi webusaiti ilafwa abantu bonse ukwabula umusobolola nelyo akapatulula. Ilenga fwe bashimona tuleumfwa ukuti twalicindama no kuti na ifwe twaba fye nga bantu bonse.—R. D., Africa.

“Webusaiti yenu yalipusana na ya mipepele imbi pantu tapaba amashiwi ayakosa aya kumfwa fye bashimapepo. Kabili ifipande fibapo tafilepa sana ica kuti wafilwa no kumfwa icilelandwapo. Webusaiti yenu yalyanguka kabili ifyebo filomfwika. Tamufusha ifya kulondolola kabili tapaba amano ya bantunse. Tailenga camoneka kwati calyafya ukuba ne citetekelo. Lelo ilanga ukuti umuntu fye uuli onse kuti aba ne citetekelo.”—A. G., Asia.

“Akukanaba Webu saiti ya jw.org nga nali fye cimbi cimbi! Iyi webusaiti ilaafwa sana abantu muli cino calo umo abantu abengi bashaishiba Lesa. Ndabelenga no kukutika ku fipande ifilondolola ifyo Lesa amona ifintu kabili ndasanga amasuko ku mepusho ayengi ayacindama.—J. C., West Indies.

“Ndetasha sana pa fyebo ifingafwa ukwishiba Lesa ifyo mbelenga nangu ca kuti njikala pa kati na nkati aka mutengo wa mu South America. Akukanaba iyi webusaiti, nga nshaishiba nangu kamo.—M. F., South America.