Mansei Nari Ḇeyek ḇe Nanggi?
Kankarem ro Refo
Allah dap kwar barbor ro snonggaku Kristen ḇesouser nari sikḇok ro marmar ya fa sek ma sikenem ro nanggi. Sima sibor ḇa. (1 Petrus 1:3, 4) Seḇekinfir kwar ido, fandun fa sfaduru kakyar sena fa nadworen pdef ma kenem sena nasren pdef insama saneraro sena fa sikenem ro nanggi napromes bur si ḇa.—Efesus 5:5; Filipi 3:12-14.
Rosai nari sifrur ro nanggi ya?
Nari suffarmyan fnoḇek Yesus i fa sḇe raja ma imam ro swaf taun 1.000. (Fasasna faro Yohanes (Wahyu) 5:9, 10; 20:6) Nari sḇe ”nanki ḇebabo”, ḇaido pamarenta ro nanggi, na ḇepoik ”supswan ḇebabo”, ḇaido kawasa ro supswan. Raja ḇepoik ro nanggi ine sya nari sifnoḇek snonggaku sya fa sḇe snonggaku ḇemnis kaku raris randak ya, imnis Allah marisen Ḇyena.—Yesaya 65:17; 2 Petrus 3:13.
Snonggaku nari ḇeyek ḇe nanggi sefis?
Refo dapḇair snonggaku ri 144.000 nari sek ma sikenem ro nanggi. (Fasasna 7:4) Ro fasasnai oso ḇefas ro syap Fasasna 14:1-3, Manwawan Yohanes myam ”Rumkun Domba dores ro urek Sion, ma ḇefnoḇekisya snonkaku syaran utin oser samfur rifiak seser rifiak”. Ro fasasnai ani, ”Rumkun Domba” kyur ḇe Yesus. (Yohanes 1:29; 1 Petrus 1:19) ”Urek Sion” ḇyeḇair ḇe nasan ḇepyum ro Yesus ma 144.000 fa sḇe raja-raja ro nanggi.—Mazmur 2:6; Ibrani 12:22.
Snonggaku ”sḇeḇeyor kwar ma sḇeḇekinfir” fa sḇepoik kayam fnoḇek Kristus ro Karajan Allah sor si ḇe ’raryur kasun’. (Fasasna 17:14; Lukas 12:32) Inja kokor ido sima sibor ḇa ḇardibur barbor ro Yesus domba ḇyesya kam.—Yohanes 10:16.
Kakara ḇesasar ḇekur snonggaku nari ḇeyek ḇe nanggi
Kakara ḇesasar: Snonggaku ḇefrur pyum syakam nari sek ḇe nanggi.
Roi ḇekaku: Sinan doḇe snonggaku ḇebor syadi nari sikenem fyoro ro supswan.—Mazmur 37:11, 29, 34.
Yesus ikofen, ”Snon oso ḇaḇeri ḇeyek kwar ḇe boiyaswa.” (Yohanes 3:13) Inja Yesus fyasnaiḇair snar snonggaku ḇefrur pyum ḇemar ḇepon i, raris Abraham, Musa, ma Daud, skoma sek ḇe nanggi ḇa. (Farfyar ro Manwawansya (Kisah) 2:29, 34) Imbape, nari sikḇok fa sikenem kaḇer ro supswan.—Ayub 14:13-15.
Kaḇakḇok faro kankenem ro nanggi sap i ḇe ”kaḇakḇok ḇepon”. (Fasasna 20:6) Inja na kaḇakḇok ḇese wer isya, isoine kaḇakḇok faro kankenem ro suspwan.
Refo doḇe fafisu Karajan Allah ḇyepoik, ”marmarya isyaḇa kwar”. (Fasasna 21:3, 4) Roi Refo ikofen ine nari ndarirya ro supswan, kukro marmar i ipok isya ro nanggi ḇa.
Kakara ḇesasar: Snonggaku oser-oser na kyinfir imbe ikenem ro nanggi ke ro supswan.
Roi ḇekaku: Allah kyinfir mansei monda na ḇesmai ”sasuref, isoine fararyor ro boiyaswa”, iso saneraro fa sikenem ro nanggi. (Filipi 3:14) Snonggaku oso marisen ḇyedi ḇaido dafdif ro sneri napok nakyaren rosai Allah dap kwar na ḇa.—Matius 20:20-23.
Kakara ḇesasar: Saneraro faro kankenem ro supswan ima saneraro ḇepyum syadi ḇa. Sbuk saneraro ine faro snonggaku ḇesyus fa ḇera ḇe nanggi ḇa.
Roi ḇekaku: Manseren Allah dap snonggaku nari ḇekenem ro supswan ḇe “kawasa yesi”, ma ”snonggaku ḇesmai barakas ro Yahwe I”. (Yesaya 65:21-23) Siso nari ḇefrur Allah marisen Ḇyena ro randak ya, isoine imarisen insama snonggaku ḇenapes kaku sikenem fyoro ro firdaus ro supswan. Inema syowi ḇeba kaku diri.—Kejadian 1:28; Mazmur 115:16; Yesaya 45:18.
Kakara ḇesasar: Angka 144.000 ḇeyap ro syap Fasasna baido syap Wahyu nama kakop monda nairi.
Roi ḇekaku: Angka ono ḇero syap Fasasna nama kakop monda, mboi angka ḇesena ḇero syap ine nama nkaku. Imnis raris, syap ani dapḇair ḇekur ”snonsnon manwawan samfur seser risuru ro Rumkun Domba ani”. (Fasasna 21:14) Rosai ḇefnai fa bisa kokofen 144.000 nama angka ḇekaku?
Fasasna 7:4 ikofen ”snonkaku ssḇuk kakop aḇyair Allah ro andar sena [ḇaido, na ḇesmai kaku kankenem ro nanggi], dandonek seja syaran utin oser samfur rifiak seser rifiak”. Mnuk-mnuk ḇeuser na nekofenḇair raryur oso ḇese wer, isoine ’raryur ḇeba ro snonggaku barbor seja oso ipok kyorepen na ḇaḇeri’. ’Raryur ḇeba’ anine Allah fyaspar si kako. (Fasasna 7:9, 10) Angka 144.000 ḇyeḇair ḇe raryur oso sipok sikor dandonek seja ḇa ido, roi ḇefrur fa raryur ansuya suḇese rya nefandun ḇa. a
Oso wer ido, Refo doḇe ḇeḇe 144.000 ansi ’skowes si rofandu kawasa snonggaku ḇe bon ḇerandak’. (Fasasna 14:4) Wos ’bon ḇerandak’ kyurfasnai sima sibor ḇa. Ine nasrow kaku fa ḇeḇair ḇe snonggaku nari ḇepoik kayam fnoḇek Kristus ro nanggi ma kawasa sesi ro supswan sibor kaku rawo sipok sikor dandonek sedi ḇa.—Fasasna 5:10.
a Imnis roi anine, Professor Robert L. Thomas fyasḇair ḇekur angka 144.000 ḇero Fasasna 7:4 ryadine, ”Inema angka ḇekaku diri, iḇese ro angka kofawi dandonek ḇyeja ḇa ḇero [Fasasna] 7:9. Angka 144.000 ima kakop monda ido, angka ḇesena ḇero syap ine skara na ḇe angka ḇekaku ḇa kako.”—Revelation 1-7: An Exegetical Commentary, ram 474.
Wamarisen Ido Mam Ine Kako
ESSENTIAL BIBLE TEACHINGS
Karajan Allah Ido Rosairirya?
Fafisu Yesus fyarmyan ro supswan, dapḇair ker Karajan Allah isyadi ro roi ḇesena. Ro abad ḇe abad, snonkaku sya senadi fa sor insama Karajan ani ryama.
