Refo dap wos ”aborsi” ro mnuk oso ḇa, ḇekur ḇe snonggaku ḇemun kaku kapira ro snekapar ya. Ḇape, mnuk naisya nabor ro Refo ḇefasnaiḇair Allah mamam Ḇyena faro kankenem ro snonggaku, kankenem ro kapira ḇero snekapar kako.

 Kankenem ima roi ḇepyum Allah byuk ḇe ko nairi. (Kejadian 9:6; Mazmur 36:9) Ro mamam Ḇyena kankenem nakam nemaeja, ine kako kankenem ro kapira ḇesya kaker ro snari snekapar ḇyedi. Inja, bin oso kyara ma myun kaku kapira ani ido, smam i ḇe binmamun.

 Ro Sasoser Moses Allah byuk ḇe Israel sya, ikofen, ”Rofyor ono sisya smamunmun ma sifrur bin ḇefadores oso kyapar romawa ḇyeja mboi paik ya isrow baim, imbape bin ani ma kapira ḇyedi sumar ḇa, snonggaku ḇesasar ansi na sbak kaḇer imnis bin ani swari dor na, ḇape mankara sya siso ḇeyap barbor ḇyena. Ḇape bin ani ḇaido romawa kyapar ya imar ido, samamyai ya iso kankenem fyadwer kankenem.”​—Keluaran 21:22, 23. a

•  Ras risai kapira oso irandak ikenem ro snari snekapar ḇyedi?

•  Allah na byuk ampun faro snonggaku ḇefrur aborsi kwar ro fafisu iwara ke?

•  Fyor sifawi nari bin oso ḇaido romawa ḇero snekapar ḇyedi na imar, bisa seaborsi ke?

 Ro Allah mamam Ḇyedi, rofyor kapira oso isya ro snari snekapar ḇyedi, kapira ani ikenem kwar. Ro Refo, romawa skapar ḇaim sya kako smam si ḇe snonggaku kwar. Allah myam kankenem kapira ḇero snekapar siḇese ro kapira ḇeaḇen kwar sya ḇa. Rwama mam conto ḇeḇeso nane.

•   Raja Daud ismai sḇayo ro rur ḇesren fa ikofenḇair sneḇaḇir ḇyena faro Allah, doḇe, ”Yaḇe war kaker yo Mgamsi myam aya.” (Mazmur 139:16) Inja Allah myam Daud i ḇe snonggaku oso fyor snari kyapar i ḇaime.

•   Rofyor Yeremia ḇyeaḇen ḇaim, Allah kyinfir i kwar fa duf fararur ḇefandun kaku. Allah ikofen ḇe i, ”Yafrur au ḇaim ro snami snekapar ḇyedi, Yakinfir au kwar. Snami kyapar au ḇaim, Yakinfir au kwar fa wuf fararur ḇefandun oso, fa ḇe nabi faro er sya.”​—Yeremia 1:5.

•   Manḇefas Refo snori Lukas, ima tabib (dokter) rirya, ḇyepake wos Yunani oso fa fyasnaiḇair ḇekur ḇe kapira ḇero snekapar ma kako faro kapira ḇeaḇen kwar.​—Lukas 1:41; 2:12, 16.

 Snonggaku ḇefrur aborsi kwar ro fafisu iwara na saksmai ampun ro Allah ḇae. Kirine sifawi mboi Allah myam kankenem ro kapira ḇero snekapar ḇyemaeja kaku, sakna kakara ḇerarirya kako ido, sipok sbuk sasar ker ḇe manggunsi awer. Refo doḇe, ”Yahwe ima isawarwar ma ifrur pyum . . . Imnis ra ori dek ḇe ori syun, rarirya ḇye sasar koḇena fa nbinggwan bur ko.” b (Mazmur 103:8-12) Yahwe nari byuk ampun faro snonggaku ḇembror kaku ro sasar sena, ine kako snonggaku ḇesasar snar sifrur aborsi ḇaido smun kaku kapira ro snekapar ya.​—Mazmur 86:5.

 Rofyor sifawi nari rya nafnai samswen bin ḇefadores ḇaido kapira ḇyedi, mboi imnis rosai Refo ikofen ḇekur kankenem ro kapira ḇero snekapar ya, aborsi ima roi sipok sifrur awer na.

 Ḇape rariso fyor kaparpar ya, samswen isya ḇefrur fa snonggaku oso na kyinfir imbe ifnoḇek sna ya ke ḇaido kapira ya? Ro fafisu ḇeradine, imbeswa ansuya ma kina ḇefanam sya na siso ḇefrur snemuk mansei sukinfir ya.