Oroḇa, ryarirya ḇa. Refo isya ikofenḇair fawar ḇebor ḇekur agama minsai Manseren Allah imewer na. Roi ri suru naisya.

Roi ḇe 1: Samsyom faro allah-allah ḇekaku ḇa

 Refo ya dapḇair samsyom sbuk faro allah-allah sena ḇe ’anggarkar’, ’nefromo’. (Yeremia 10:3-5; 16:19, 20) Allah Yahwe a iwan faro kawasa Israel ḇepon siwara radine, ”Mgosyom awer allah-allah ḇese.” (Keluaran 20:3, 23; 23:24) Fafisu kawasa Israel sya sisyom allah-allah ḇese, ”Yahwe imsor fafaya si”.​—Bilangan 25:3; Imamat 20:2; Hakim 2:13, 14.

 Manseren Allah imsor kaker fafisu myam snonggaku ḇero baboine sbuk samsyom sena faro roi ’sor ḇe allah ma manseren’ sya. (1 Korintus 8:5, 6; Galatia 4:8) Iwan snonggaku ḇemarisen ḇesyom I fa sḇeoser awer bo sisasyar ro snonggaku ḇero agama ḇekaku ḇa. Ikofen radine, ”Mgosasyar mgobur si, ma mgoḇesisye ro si.” (2 Korintus 6:14-17, NW) Inja agama nakam namnis ma nakam nfarkin ko ḇe Manseren Allah ido, rosai ḇefnai fa Manseren Allah manggundi byuk parenta ine?

Roi ḇe 2: Kosyom faro Allah ḇekaku raris marisen Ḇyena

 Fafisu ono, snonggaku Israel sya sisyom faro Allah ḇekaku mboi siso kayaryar ḇese ma nyan sisyom I raya sun na ro samsyom faro manseren ḇekaku ḇa sya. Fama, Yahwe pyampum snonggaku ḇeyoḇe sro agama ḇekaku mboi siḇyaren na kuker samsyom ḇekaku ḇa ḇeradine na. (Keluaran 32:8; Ulangan 12:2-4) Manseren Yesus dawos bos manfarkin agama ḇero fafisu naiwara kukro soḇe sisyom faro Allah, rya ro bandi sisnai ḇe snonggaku ḇefrur pyum, mboi sanggar si bo ’roi ḇefandun syadi ro sasoser Refo Yahudi sfandun na ḇa, isoine: napnapes ma sawarwar ma ḇaḇeuser’.​—Matius 23:23.

 Baboine kako, agama ḇeyufepen kakaku iso nari ḇefara snonggaku sya faro Allah ḇekaku. Kakaku ine isya ro Refo ya. (Yohanes 4:24; 17:17; 2 Timotius 3:16, 17) Mboi agama ḇeyufepen farkarkor ḇero bondi ima ifnai fa snonggaku sya sḇinggwan ro Allah ḇekaku. Farkarkor ḇebor skara ndramuma ro Refo​—raris Tritunggal (Allah ri kyor), kenem ḇepok ḇemar ḇa, samamyai ro for ḇembrer ḇa​—nama sun na ro snonggaku ḇesyom allah-allah ḇekaku ḇa. Samsyom ḇena fasfes kuker farkarkor ḇerarirya nbuk ”fainda oso ḇa”, ḇaido nadawer monda kukro sfadwer Manseren Allah marisen Ḇyena bo soḇe ima roi sifrur ker ro agama sena ro fyor iwara kwar nairi.​—Markus 7:7, 8.

 Manseren Allah dayin kaku agama ḇeanggarkar. (Titus 1:16) Agama oso imbe isaramper snonggaku sya fa srama sfanam faro Allah ido, na snonggaku ḇero agama ani seari fa smam si ro bondi monda ḇa mboi fandun fa sfasnai kenem ḇepyum ro ras ḇe ras. Rupa ra, Refo ya doḇe, ”Rofyor [snonggaku oso kyara isyom Allah], ḇape fyarmku ramar ḇyedi ḇa, ḇyeankar mankundi, ma ḇaḇeari ḇyena nefromo. Ḇaḇeari ḇekaku ma ḇefarorewḇa ro Allah, Kma koḇedi ḇarpon ḇyedi, isoine ryakaki awak param ma kabomsya ro ananjar sena, ma ḇyesasor mankundi insa supswan ine ifrur mamas aweri.” (Yakobus 1:26, 27) Refo Kitab Suci Komunitas Kristiani fyarwei wos ine ḇe ”agama ḇesren” kukro samsyom ḇeradinema samsyom ḇesren dirya, naser anggarkar oḇa.