Refo ya ikofen snar roma inai ḇeba kuf kwar sya fandun fa sfasnai samsyom sena ḇe Allah kuker smam ma sfaduru ”kina mankunsi sena ma smunsu syowi kma ma kpu sesi, snar naiso ḇefrur marisen faro Allah”. (1 Timotius 5:4) Inja, roma inai ḇeba kuf kwar sya sna fakamamar ḇefandun kaku, isoine smam mnis insama sna kma sesi ḇesinan kaku kwar sya smamfaduru pyum si. Sifrur na ido, ine nfasnai sisouser anun ro Refo fa sesyowi sinan sesi.​—Efesus 6:2, 3.

 Ro Refo ya, sfas akurfasnai oser-oser ḇa ḇekur moḇsa sfaduru sna kma ḇesinan kaku kwar sya rai. Ḇape, Refo fyawar snonggaku ḇena kakyar ḇefasnai nyan ḇepyum ro roi ine. Refo ya byuk kako anun ḇepyum faro romawa ḇefaduru sinan ḇyedi.

•  Ro fafisu awar Refo ya, moḇsa min ḇero kina sya smam faduru sna kma sesi ḇesinan kaku kwar sya rai?

•  Anun rosai ḇero Refo na ḇefnoḇek romawa ḇemam faduru sinan sesi?

•  Refo ya ikofen fandun fa smamwarek sinan sya ro rum monda ke?

 Nyan na naḇeseyae, imnis fandun sena oser-oser. Imnis raris:

•   Yusuf ḇyarek ḇinggwan ro sinan ḇyedi ḇemansar kwar, isoine Yakub i. Fafisu Yusuf ismai swaf ḇepyum mura, fyasos insama Yakub ryama ḇyarek fanam kuker i. Yusuf fyasos kako roḇean ma rum faro kmari insama myamwarek pyum i.​—Kejadian 45:9-11; 47:11, 12.

•   Rut rya fa ḇyarek ro imbanyori sup marin ḇyedi ma fyararur marḇak fa fyaduru i.​—Rut 1:16; 2:2, 17, 18, 23.

•   Yesus, ro swaf bepupes kenem byedi, fyasos insama ono smamwarek snari, Maria i, rofyor anya imbude ḇyekabom kwar.​—Yohanes 19:26, 27. a

 Romawa ḇemamfaduru sinan byedi ḇemansar binsar kwar fyorno ido na simbrus ma sibrusna naduf kaku. Imboi, wos farkin ro Refo na nafnoḇek si fa smam samswen ine.

•   Ḇesyowi sinan Bedi.

   Wos farkin ro Refo: ”Mgoḇesyowi kma ma sna mgoḇesi.”​—Keluaran 20:12.

   Nyan fa waso wos farkin ine: Swewar pan ma sumarisen ido, rwir fa sinan bansu sumam manggunsu ro roi nayafakam ro kenem suḇena, sukinfir kako perawatan kesehatan ro manggunsu. Ḇape, fandun fa swewar wafnoḇek su kako. Rarirya, fasnai snar ḇesyowi su.

•   Ḇesewar fa mamḇir pyum ma buk maf.

   Wos farkin ro Refo: ”Snonggaku ḇena fawawi nari imasasor fasaw ḇa, ma nari ismai sanandik snar imarisen byuk ampun sasar na.”​—Amsal 19:11.

   Nyan fa waso wos farkin ine: Sinan Besu bemansar binsar kwar sukofen roi ḇepyum ḇa, ḇaido suḇesyowi roi wafrur kwar na ḇa ido, kwarapan roi ine: ’Yakna samswen ma roi ḇedwarek imnis su ido, moḇsa na yaḇaḇir rai?’ Swewar fa mambir pyum snebabir subena ma buk maf ḇe su insama mgokain kuker payamyum.

•   Wor wos anun ro ḇesesya.

   Wos farkin ro Refo: ”Aw sena nari nbuk bon oḇa rofyor sawos asuser ḇepon na ḇa, ḇape nambran pyum rofyor ḇebuk wos anun sya sibore.”​—Amsal 15:22.

   Nyan fa waso wos farkin ine: Sinan Bedi nya dafduf oso ido, swewar informasi ḇeḇair nyan fa mam samswen ismai ine. Swewar pan roi risai monda ro moḇ Bedi, na ḇefnoḇek Au fa buk fafnoḇek faro sinan Bedi. Wafuken pan ro snonggaku ḇesesya ḇemam faduru sinan sesi kako. Nwa eba ḇaido ḇeknik ido, wor si fa mgawos rosai monda fandun ro sinan mgoḇedi, moḇsa na mgorwas tugas na oser-oser.

•   Wafawi samambraḇ Bena.

   Wos farkin ro Refo: ”Fawawinanem isya ro snonggaku ḇefawi samambraḇ sena.”​—Amsal 11:2.

   Nyan fa waso wos farkin ine: Wafawi samambraḇ Bena. Imnis ra, snonggaku oser-oser sna swaf ma samambraḇ ḇemnis kam ḇa. Inja, roi na wafrur ḇe sinan Bedi kako na nabor syadi ḇa. Wamor kaku ro mam faduru sinan ḇemansar binsar kwar ido, wor pan fafnoḇek ro anggota kina Bansi ḇaido perawat.

•   Mamkyof awer fandun manggun Bena.

   Wos farkin ro Refo: ”Snar snonkaku oso dayin baken mankundi ḇyedi ḇaim, mboi fyaduru ma ḇyemanmin i.”​—Efesus 5:29.

   Nyan fa waso wos farkin ine: Nwa fakamaman fa mam faduru sinan sya mboi, wafarḇuk kwar ido fandun fa mam fandandun manggun Bena ma kina ḇesya kako. Wafandun roḇean ḇepyum na, wamnaisu, ma wenef pyum. (Pengkhotbah 4:6) Fyor swaf ono naisya ido buk na faro roi besena. Bon ya, na wasmai payamyum, kwara pyum, waprei syadi ma na mam faduru pyum sinan Bedi kako.

 Ro Refo ya, akurfasnai ḇesnai ono ḇa ḇebair fandun fa romawa sya sfaduru sinan sesi ro rum monda. Kina ono sisewar insama sinan sesi bisa sḇarek kawan ro rum. Ḇape ḇarpur mura, imbude skara ipyum syadi fa sinan sesi sḇarek monda ro panti wreda [rum faro ḇesinan kaku kwar sya]. Bero kina syakam fandun fa siryur ma sun snemuk rosai ḇepyum faro sikam.​—Galatia 6:4, 5.