Imbo. Manseren Allah iswar kawasa Ḇyesi ḇeduf sya. Refo ya doḇe, ”Yahwe nari syambraḇser i fafisu denef kukro iduf.” (Mazmur 41:3) Ausya wasmai dafduf ḇemarḇak ido, nyan ri kyor nane bisa nasaramper Au:

1.   Wanadi wor samambraḇ insama swambraḇ ro kenem Bena. Nari wasmai ”saswar-ḇaḇye ro Allah, ḇesyadi ro kakara”. Nari wamgakwarek syadi ḇa ma nari swambraḇ.​​—Filipi 4:6, 7.

2.   Nwa kakara ḇepyum monda. Refo ya doḇe, ”Sne ḇemarisen ima aryawin ḇepyum, mboi raryaḇ ḇekar nafnai fa kor na nasyor.” (Amsal 17:22, Terjemahan Baru) Wafarfnak monda kada, nari roi nane nafrur fa waryaḇ syadi monda ḇa, mboi nari nbuk payamyum ḇe Au kako.

3.   Swewar fa wakyar ras ḇarpon iyama nari nakam napyum. Wakyar payamyum ro ras ḇarpon iyama isya kada, nari waryaḇ monda ro fafisu waduf marḇak. (Roma 12:12) Refo ya doḇe ro ras ḇarpon iyama, ”Snonggaku oso ḇaḇeri ḇeḇarek ro diwa nari ikofen, ’Yadufe.’” (Yesaya 33:24) Ro fafisu ine, snonggku sya fawawi ḇebabo sena jadi fa sipyos dafduf ḇemarḇak na ḇa. Imbape ro fafisu iyama, Manseren Allah nari ipyos dafduf ḇemarḇak nakam. Rupa ra, Refo isya ikofen kaku snar snonggaku sya nari sbabo kaḇer. Doḇe, ”Iḇye kada baken ḇyeja iprei syadi ro fafisu byabo anya; iḇye kada syambraḇ wer raris fafisu byabo anya.”​—Ayub 33:25.

 Angginem: Saksi-Saksi Yahwe sikyar Manseren Allah isaramper si, mboi sisewar nyan kako fa siprei ro dafduf marḇak sena ro baboine. (Markus 2:17) Fama, nggoma nggofasnai nyan fa swewar pararei faro dafduf Bena ḇa; manggunko oser-oser kun snemuk fa kosewar nyan risai nari kofrur kaku fa koprei.