Karajan Allah Isya ro Kosnesna Ke?
Kankarem ro Refo
Oroḇa, Karajan Allah ima roi snonggaku Kristen sḇaḇir ro sisnesna ḇa. a Refo ikofen moḇ ḇekaku ḇyeja ma dap i ḇe ’Karajan Nanggi’. (Matius 4:17) Kwara kada rariso Refo fyasnaiḇair Karajan ani ḇe pamarenta ḇekaku ḇero nanggi iyaswa.
Ro Karajan ani manḇepoik ma kawasa sisya, sasoser ma fararur naisya kako insama Manseren Allah marisen Ḇyena ndrarirya ro nanggi ma supswan.—Matius 6:10; Fasasna faro Yohanes (Wahyu) 5:10.
Pamarenta, ḇaido Karajan Allah anine, nari ḇyepoik ”snonggaku syakam ḇeramaker er ma wos sairirya kam” ro supswan. (Daniel 7:13, 14) Ḇaḇepapoik ḇyeja ḇyeknam kaku ro Allah, mboi ro kawasa ḇyesya sisya ḇa.—Mazmur 2:4-6; Yesaya 9:7.
Yesus ikofen ḇe manwawan ḇyesi ḇesoasuser sya siso nari ’ḇekain ro karapesa nasan’ fnoḇek i.—Lukas 22:28, 30.
Karajan Allah nya mbroḇ, mboi nari myun pres si.—Mazmur 2:1, 2, 8, 9; 110:1, 2; 1 Korintus 15:25, 26.
Refo ikofenḇair ḇa Karajan nanggi isya ro sne, isoine ḇyepoik roro snonggaku oso sneri. Imbape, Refo fyasnai kaku ’wos ḇekur Karajan Boiyaswa’ ḇaido ’anggangginem ḇeḇye ro Karajan’ nari nsun kaku ro kosnesna.—Matius 13:19; 24:14.
Wos ḇekofen ’Allah Karajan Ḇyedi isya ro mgo’ kyurfasnai ḇe rosai?
Snonggaku ono sisya sikmom moḇ Karajan Allah isya ro ya fafisu siwasya Lukas 17:21 ro Refo ḇeḇeso. Imnis raris, ro Refo King James Version ikofen ’Allah Karajan Ḇyedi isya ro mgo’. Insama kofawi pyum mnuk anine, fandun fa kokarauser wos ḇero mnuk-mnuk ḇepon na ma ḇepupes na.
Karajan Allah isya ro Yesus mbroḇ ḇyesi ḇerarmomen ma ḇepampum i sya sisnesna ḇa
Yesus isya dawos kuker snonggaku Farisi, raryur manfarkin ḇepampum i sya ma ḇeso fa ḇemun i ra imar. (Matius 12:14; Lukas 17:20) Inja kokara ido nasrow ke Karajan Allah kyur ḇe roi ḇero sne sena ḇepakrek raris karui anna? Yesus ikofen faro si, ”Ro mkodom na nafo kuker ḇarḇor ma sasar.”—Matius 23:27, 28.
Refo ḇeḇeso sifararwe mnis wos ḇero Lukas 17:21 inja ryok radine: ”Karajan Allah isya rofandu mgo.” (Nggoiso ḇefrur fasfas ḇekarandir; ḆAḆEASAS BABO Wos Ḇyak ro Rasras) ”Karajan Allah isya ro fadu mgo.” (Terjemahan Dunia Baru) Karajan Allah isya ”rofandu” ḇaido ”ro fadu” snonggaku Farisi, ine kyurfasnai Yesus, inari Allah kyur i fa ḇye Raja, isya ro barpon sena.—Lukas 1:32, 33.
a Raryur ḇeyap si ḇe Kristen ḇebor sya soḇe Karajan Allah isya ro do snonggaku oso, ḇaido snonggaku oso sneri. Rupa ra, ro Amerika Serikat, Gereja Baptis bar Wamires doḇe Karajan Allah kyur ḇe ”Allah pamarenta Ḇyedi ḇero snonggaku oso sneri ma kankenem ḇyedi”. Ro syap Jesus of Nazareth kako, Paus Benediktus XVI ikofen ”Karajan Allah ryama roro sne ḇemarisen ḇerower”.
Wamarisen Ido Mam Ine Kako
ESSENTIAL BIBLE TEACHINGS
Karajan Allah Ido Rosairirya?
Fafisu Yesus fyarmyan ro supswan, dapḇair ker Karajan Allah isyadi ro roi ḇesena. Ro abad ḇe abad, snonkaku sya senadi fa sor insama Karajan ani ryama.
BARYAS
Manseiso ḇe Raja ro Karajan Allah?
Manfasfas Refo riḇeḇeso sfasepen pyum manseiso Raja ḇero Karajan Allah. Snonkaku oser monda ḇesrow kaku fa ḇepoik ḇe Raja raris rosai manfasfas sya sikofen na.
