Mamun Armagedon kyur ḇe mamun ḇepupes ro pamarenta snonggaku kuker Allah. Ro kirine kako, pamarenta ansine ma ḇesaramper si sya spampum ker Allah bo simewer sikunem faro ḇaḇepapoik Ḇyedi. (Mazmur 2:2) Mamun Armagedon nari ifrur pamarenta snonggaku simnai fa sḇepoik.​—Daniel 2:​44.

 Wos ”Armagedon” ḇaido ”Harmagedon” sfas i rarwan oser monda ro Refo ya, ro Fasasna faro Yohanes (Wahyu) 16:16. Ro ḇardadi oso, syap Fasasna fyasnaiḇair bo doḇe ”ro moḇ oso, ro wos Ibrani sniriḇe Harmagedon” nari ’raja syakam ro supswan ḇesiper’ seḇefanjur fa ”se embroḇ ro Ras ḇebaya, isoine ro Allah Ras ḇyedi Ḇepoik syadiya”.​—Fasasna 16:14.

 Mansei nari ḇemamunmun ro Armagedon ya? Yesus Kristus nari ḇyebukor sordade ḇero nanggi sya fa smun Allah mbroḇ Ḇyesi. (Fasasna 19:11-​16, 19-​21) Mbroḇ ansine siso snonggaku ḇepampum Allah ḇaḇepapoik Ḇyedi ma ḇeanonef I isya.​—Yehezkiel 39:7.

 Mamun Armagedon ine nari ikpef ro sup Timur Tengah iwara ke? Oroḇa. Mamun Armagedon ine nari ḇejadi ro moḇ oso ḇa, imboi ro supswan ine ḇesiper.​—Yeremia 25:32-​34; Yehezkiel 39:17-​20.

 Fyorno ido sfas Armagedon ḇe ”Har–​Magedon” (Wos Ibrani Har Meghiddohnʹ), knam kaku ya iso ”Bon Megido”. Megido ḇepon iwara iso kota oso ḇero Israel. Sejarah fyasnaiḇair mamamun ḇeba ḇebor na nejadi ro dine, ine kako mamamun sfas ro Refo ya. (Hakim-Hakim 5:​19, 20; 2 Raja-Raja 9:​27; 23:29) Imbape, Armagedon kyur kaku ḇe moḇ ḇero Megido ḇepon iwara ḇa. Bon ḇeba ma ḇekaki syadi naisya ro diwa ḇa, ma Moḇ Ḇepyom nakam ḇero Yizreel kako na nasrow faro snonggaku nari ḇemamunmun kuker Allah sya ḇa. Ḇape, Armagedon iso fafisu er-er ḇero dunya ine siryur fa sembroḇ Allah ḇaḇepapoik Ḇyedi.

 Ro ras mamun Armagedon moḇsa fafisu ya ḇye rai? Koma kofawi mnis ḇa moḇsa Yahwe nari byuk papoik Ḇyena rai, mboi kofawi ima nya romamun byuk kwar ro fafisu iwara na​—mekem es, tatawai, mekem ḇeba, for ma belerang, karadu, ma dafduf. (Ayub 38:22, 23; Yehezkiel 38:19, 22; Habakuk 3:​10, 11; Zakharia 14:12) Ro fafisu ḇenapnap, na Allah mbroḇ ḇyesi ono smunyae si, mboi barpur ya sifawi kaku Allah iso ḇemamunmun kuker si.​—Yehezkiel 38:21, 23; Zakharia 14:13.

 Mamun Armagedon iso pupes ro dunya ine ke? Ro fyor mamun Armagedon ya, supswan koḇedine na imgok ḇa kukro supswan ima moḇ faro snonggaku sya fa sḇarek isof fyoro-fyoro. (Mazmur 37:29; 96:10; Pengkhotbah 1:4) Mamun Armagedon na myun pres snonggaku sya ḇa, imboi byuk fasaspar faro si, kukro ’raryur ḇeba’ ro Allah manfamyan Ḇyesi nari sismai ḇaḇye.​—Fasasna 7:​9, 14; Mazmur 37:34.

 Wos ”dunya” nono ido kyur ḇe supswan, ḇape kyur kako ḇe kawasa snonggaku ḇeḇarḇor ḇembroḇ Allah sya. (1 Yohanes 2:​15-​17) Rarirya ido, Armagedon nari dun ”papupes supswan” ḇaido dunya.​—Matius 24:3, ḆAḆEASAS BABO Wos Ḇyak ro Rasras.

 Fafisu risai Armagedon na ḇejadi? Rofyor Yesus dawos ḇekur ”wayam ḇefnak ḇa” nari pupes ya iso mamun Armagedon, Yesus ikofen, ”Ḇape ras ma fafisu ani snonkaku oso ipok ifawiḇa beri, ma malaikat-malaikat ro boiyaswa kako roḇa, ma Rumkun ya kako roḇa, derer Mami mankundi.” (Matius 24:21, 36) Rarirya mboi, Refo fyasnaiḇair Armagedon nari ḇejadi ro fafisu Yesus raramuma ḇyedi, irandak ro taun 1914 anya.​—Matius 24:37-​39.