Imbo, Manseren Allah isya kaku. Refo ya ikofenḇair snai kaku roi ine ḇe ko. Wos Refo ya danunepen ko fa koḇawes kakyar faro Allah. Inja, inema kokyar famfnom monda faro farkarkor agama na ḇa, mboi kobuk samambraḇ ro kakara koḇena ma samambraḇ fawawi koḇena fa kokyar kaku roi ine. (Roma 12:1; 1 Yohanes 5:20) Kwarapan nyan kakara ḇemnis kuker rosai Refo ikofen nane:

•   Sup sansoren ḇekain pyum ḇesaramper roi ḇekenem syakam komam ro komgasna nama roi ḇefasnai kaku nakam naisya ro manggundi ḇa, ḇefrur i isya. Refo ya doḇe, ”Snar snon oso ḇefawinananem ḇaḇawes rum ḇape snon ḇefawinananem ḇaḇawes roi ḇeborkam isoine Allah.” (Ibrani 3:4, Wos Ḇyak ro Rasras) Wos ker ine ryadine monda, fama snonggaku ḇebor ḇena fawawi ḇekaki sya sikyar faro roi nane. a

•   Randak kokenem ya, komarisen kwar fa kofawi roi ḇefnai fa kokenem ine ma faro fandun risai. Kosewar fandun faro baken koḇena fa nasrow kwar, fama fandun oser baken ine isrow ḇaime. Refo dap roi ine ḇe oso ro ”fandun rur” ya, isoine marisen fa komambir Allah ma kosyom I. (Matius 5:3; Fasasna 4:11, Terjemahan Dunia Baru) Fandun rur ine fyasnai kaku snar Manseren Allah ima isya kaku monda ḇa, mboi fyasnai kako ima Manḇefrur ḇesawarwar ḇemarisen fa kosewar fandun ani fa nasrow faro ko.​​—Matius 4:4.

•   Ḇardadi ḇaido roi Refo ikofen ḇepon kwar ro fafisu naiwara, ndarirya kaku kwar. Roi Refo ikofen ḇepon kwar ine syasar ḇa ma ikofen snai na rawo bar ḇekasun na kako. Nane kam nfasnai wos ine ryamuma ro roi ḇesambraḇ syadi ro snonggaku koine.​​—2 Petrus 1:​21.

•   Manfasfas Refo siwara sna fawawi ḇepyum kwar ro fafisu sikenem ya. Rupa ra, ro awar madero, snonggaku ḇebor sya sikyar roi ḇesyopan supswan ine iso aiwan oso, raris gajah, randip, ḇaido sapi. Fama, Refo ya doḇe Manseren Allah ”kyaf supswan ro moḇ ḇemkei”. (Ayub 26:7) Refo ya ikofen mnis kako ḇo doḇe supswan ine ”isyapdupen”. (Yesaya 40:22) Snonggaku ḇebor sya sikyar roi manfasfas ansya sikofen anya ima roi famfnom risya ḇa, mboi ryarirya kukro sismai kafkofen anna ro Manseren Allah manggundi.

•   Refo ya kyarem fakfuken ḇebor ḇesamswen na, isoine fakfuken ḇefrur fa snonggaku sya sisewar rawo spapum kwar ido, sikyar faro Allah ḇa. Rupa ra soḇe: Manseren Allah isawarwar ma ḇyepoik syadi ido, rosai ḇefnai fa kandera ma ḇarḇor na naisya ro dunya ine kaker? Rosai ḇefnai fa roi ḇeḇye ḇa sifrur ro agama na nabor syadi ro roi ḇepyum na?​—Titus 1:​16.