Ro Refo ya, wos ”kaḇakḇok” naisya ro Syap-Syap Yunani, ḇaido sap na kako ḇe Ḇaḇeasas Babo, ine ryama ro wos Yunani a·naʹsta·sis. Snonggaku ḇesmai kaḇakḇok, nari ḇyawes kaḇer ro marmar ya ma ikenem wer ḇe snonggaku ani.​—1 Korintus 15:12, 13.

 Ro Syap-Syap Ibrani ḇaido syap Ḇaḇeasas Ḇekwar, wos ”kaḇakḇok” naisya ro dia ḇa. Rarirya mboi, farkarkor ḇekur kaḇakḇok naisya ro syap anna. Imnis raris, roro nabi Hosea i, Allah Ḇyeasas, ”Nari yafaspar kawasa Yesi bur Kubir ya. Nari yamkei si ro marmar ya.”​—Hosea 13:14; Ayub 14:13-​15; Yesaya 26:19; Daniel 12:​2, 13.

 Ro moḇ risai snonggaku ḇesmai kaḇakḇok sya na sikenem ro ya? Ḇeḇeso sya na sisma kaḇakḇok fa sikenem ro nanggi fa sḇepoik ḇe raja fnoḇek Kristus i. (2 Korintus 5:1; Fasasna farpo Yohanes (Wahyu) 5:​9, 10) Refo dap kaḇakḇok ḇeradine ḇe ”kaḇakḇok ḇepon” ma ’ḇaḇeaḇiḇer ḇerandak kaku’. Wos suine sufasnaiḇos nari kaḇakḇok ḇese naisya wer. (Fasasna 20:6; Filipi 3:​11) Kaḇakḇok ḇese wer iso kaḇakḇok faro snonggaku ḇebor syadi fa sikenem kaḇer ro supswan ine.​—Mazmur 37:29.

 Moḇsa na snonggaku sya sismai kaḇakḇok ya rai? Allah byuk papoik ḇe Yesus i fa ḇyawes snonggaku ḇemar kwar sya. (Yohanes 11:25) Yesus nari ḇyawes ”snonggaku ḇeḇor ḇero ureren [swarapepen] na dona”, imnis roi ḇeḇair ḇe manggunsi, rari-rari, kenem, ma swarapepen sena oser-oser. (Yohanes 5:​28, 29) Ḇesma kaḇakḇok fa sikenem ro nanggi sya, nari sismai ḇaken rur. Ḇesma kaḇakḇok fa sikenem ro supswan sya nari sismai ḇaken saprop ḇemnis kaku, siprei, ma sisambraḇ.​—Yesaya 33:24; 35:​5, 6; 1 Korintus 15:42-​44, 50.

 Mansei na ḇesmai kaḇakḇok ya? Refo ikofen snar ”nari aḇiḇer ya isya faro snonggaku ḇeḇor ḇemar sya, iḇye snonggaku ḇenapes sya ma ḇenapes ḇa sya”. (Kisah. 24:15) Snonggaku ḇenapes sya siso snonggaku ḇena kakyar sya, raris Nuh, Sara, ma Abraham (Ibrahim). (Kejadian 6:9; Ibrani 11:11; Yakobus 2:​21) Snonggaku ḇenapes ḇa sya ine kyur ḇe snonggaku ḇesouser faro Allah sasoser Ḇyena ḇa kukro sifawi mnis ḇaim na.

 Imboi, snonggaku ḇeḇarḇor kaku sya ma ḇemewer ḇembror sya nari sismai kaḇakḇok ya ḇa. Rofyor simar ya, snonggaku ḇerarya sya nari sisma saneraro ḇaḇeri fa sikenem wer.​—Matius 23:33; Ibrani 10:26, 27.

 Ras risai na kaḇakḇok ya isya? Refoya ikofen, ḇekenem ro nanggi sya na sisma kaḇakḇok ya ro fafisu rarama Kristus ḇyedi, ine ḇyerak ro taun 1914. (1 Korintus 15:21-​23) Ḇekenem ro supswan sya na sismai kaḇakḇok ya ro fafisu Ḇaḇepapoik Taun Syaran Oser ro Yesus Kristus i, rofyor supswan ine ḇyefirdaus kwar.​—Lukas 23:43; Fasasna 20:​6, 12, 13.

 Rosai ḇefnai fa kokyar kaku faro kaḇakḇok ya? Refo fyasḇair mnis fawar ri siw ro snonggaku ḇesmai kaḇakḇok sya, ma kawasa ḇebor smam na. (1 Raja 17:17-​24; 2 Raja 4:​32-​37; 13:20, 21; Lukas 7:​11-​17; 8:​40-​56; Yohanes 11:38-​44; Farfyar ro Manwawansya (Kisah) 9:​36-​42; 20:​7-​12; 1 Korintus 15:​3-6) Fawar ḇekur Lazarus kaḇakḇok ḇyedi napyum kaku kukro Yesus ifrur mujisat ani fafisu Lazarus imar ras ri fyak kwar, ma kawasa ḇebor smam mujisat anine. (Yohanes 11:39, 42) Ḇesyadi ya, Yesus mbroḇ ḇyesi sifawi kako mujisat Yesus ifrur na, inja sḇe sneoser fa imbe smun Yesus ma Lazarus su.​—Yohanes 11:47, 53; 12:​9-​11.

 Refo ya fyasnaḇair snar Allah nya samambraḇ ma imarisen kaku fa byawes snonggaku ḇemar sya fa sikenem wer. Allah nya papoik ḇeba kaku fa iswarepen roi nakam. Iswarepen roi oser-oser ro snonggaku ḇemar ansya, nari byuk kaḇakḇok ḇe si kuker papoik ḇeba Ḇyedi. (Ayub 37:23; Matius 10:30; Lukas 20:37, 38) Allah nya samambraḇ fa byuk kankenem faro snonggaku ḇemar kwar sya, ma imarisen fa ifrur kaku na! Rofyor sfasḇair moḇsa kaḇakḇok ine isya rai, Refo ikofen kuker Allah I, ”Nari wamander aya kukro Auso ḇefrur aya.”​—Ayub 14:15.

Kakara ḇesasar ḇekur kaḇakḇok ḇekur snonggaku ḇemar kwar sya

 Roi ḇekaku ḇa: Kaḇakḇok iso sḇe jiwa ma ḇaken fa suḇeoser kaḇer.

 Roi ḇekaku: Refo fyarkor ko snar jiwa inema kyurfasnai ḇa ḇe bar oso ro snonggaku na ikenem pdef fyor imar kwar, imboi jiwa kyur ḇe snonggaku ani isiper. (Kejadian 2:7; Yehezkiel 18:4) Snonggaku ḇesmai kaḇakḇok ya ḇyeoser kaḇer kuker jiwa ḇyedi ḇa, mboi ḇyeḇefrur kaḇer fa ḇye jiwa ḇekenem.

 Roi ḇekaku ḇa: Siya sismai kaḇakḇok raposa fyor ya ḇeri smun si.

 Roi ḇekaku: Refo ikofen, ”faro ḇeḇarḇorsya nari siḇersi fa sisma samamyai” ḇaido semankara si. (Yohanes 5:29) Ḇape, semankara si imnis rosai sifrur na rofyor simar ḇaim anya ḇa mboi rofyor sisma kaḇakḇok ya kwar. Yesus ikofen, ”Snonggaku ḇemarsya simnaf rumkun ḇyedi mkarenya, ma ḇemnafi sya, nari sikenem.” (Yohanes 5:25) Rofyor snonggaku oso ’imnaf’, ḇaido isouser roi fyarkor fyor isma kaḇakḇok ya kwar ido, nari snonsnon ḇyedi sfasi ro ’syap kankenem’.​—Fasasna 20:12, 13.

 Roi ḇekaku ḇa: Rofyor snonggaku oso isma kaḇakḇok ya kwar, nari nya ḇaken ḇemnis raris randak imar ḇaim anya.

 Roi ḇekaku: Rofyor snonggaku oso imar ya, na ḇaken ḇyena napokem kwar.​—Pengkhotbah 3:​19, 20.