Imnis Refo ikofen ya, snonggaku ḇefanam kuker Manseren Allah ima imarisen ifrur Allah imarisen ma syewar kaku fa ikenem imnis Allah farkankin Ḇyena kam. Snonggaku ani na syewar kaku fa isouser Allah sasoser Ḇyena ma farkankin ro rur ḇesren ya. a—Roma 8:5; Efesus 5:1.

 Rosai ḇefasnaiḇair snonggaku ḇemarisen ḇeso farkankin ro rur ḇesren siḇese ro ḇemewer ḇeso sya? Refo doḇe snonggaku baken saprop ”nari saksmai rosai Rurya fyasna naḇa”, ḇaido spampum farkarkor ḇeramuma ro Allah. (1 Korintus 2:14-16) Oso wer ido, ansi na simarisen ’simsor ma smamunyae’. Imbape, ḇefanam kuker Mnseren Allah simarisen sfasnai snemura ma sisewar aski ya. (1 Korintus 3:1-3) Ma, snonggaku ḇemarisen ḇefrur pakpek ma ḇeanonef Refo dap si ḇe snonggaku ḇemnis ra aiwan ma ”snonkaku ḇena Allah Rur ḇyedi ḇa”.​—Yudas 19; Amsal 16:28. b

Fawar ine nari dawosḇair:

•  Rosai ḇefrur fa bisa kofanam kuker Manseren Allah?

•  Rosai ḇefnai fandun fa kofanam kuker Manseren Allah?

•  Nyan rariso insama kofanam pdef kuker Manseren Allah?

•  Snonggaku ḇemyaren ḇeso ari na sifanam beri kuker Manseren Allah ke?

•  Kakara ḇekur fanamnam kuker Manseren Allah

•  Mnuk-mnuk ro Refo ḇefasnaiḇair snonggaku ḇefanam kuker Manesren Allah

 Allah ifrur snonggaku sya imnis fanir Ḇyena. (Kejadian 1:27) Iso ḇewar fa snonggaku ḇebor sesyowi ma simarisen faro roi smam na ma nana arasai na monda ḇa, imboi fa sfanam kuker Manseren Allah kako.

 Oso wer ido, fyor snonggaku sya sḇeḇeaḇen sna samambraḇ fa sfasnai rari-rari raris Allah Yahwe c rari Ḇyena, imnis ra aski, sawarwar, ma mamfarfir ḇa. (Yakobus 3:17) Snonggaku oso syewar kaku fyanam kuker Allah ma isouser faro sasoser Ḇyena ido, nari Allah ifnoḇek i roro rur ḇesren Ḇyedi.—Farfyar ro Manwawansya (Kisah) 5:32.

 Snonggaku ḇefanam kuker Allah na ismai ”kankenem ma ḇaḇeaski”. (Roma 8:6) Roi ri suru suine suma fakamaman ḇesyowi kaku ḇeramuma ro Allah.

•   Kankenem: Allah ḇyeasas kwar nari byuk kankenem fyoro faro snonggaku ḇesewar fa sna wis ḇepyum kuker I sya.​—Yohanes 17:3; Galatia 6:8.

•   Ḇaḇeaski: Ine kyurfasnai ḇe wis ḇepyum koḇena kuker Allah I. Snonggaku ḇekara ker marisen baken saprop ḇyena ima Allah mbroḇ Ḇyedirya. (Roma 8:7) Imbape, snonggaku ḇesewar kaku fa sḇe snonggaku ḇefanam kuker Manseren Allah nari sismai fakamaman isoine ”saswar-ḇaḇye ro Allah, ḇesyadi ro kakara”. (Filipi 4:6, 7) Ḇaḇeaski ani nari nafnoḇek si fa sismai payamyum ro kenem sena.​—Matius 5:3.

•   Farkor ma wasouser Allah sasoser Ḇyena. Wafrur na kuker wawasya Refo ya, kukro Refo iser Allah kakara Ḇyena ḇeḇefas ya iso bar snon ḇesmai ’dafdif ro rur ḇesren’. (2 Petrus 1:21) Rosai wafarkor ro Refo ya na nafnoḇek Au fa wasyom Manseren Allah ’kuker rur ma napnapes’ isoine farkankin ro rur ḇesren ma namnis kuker kakaku ro Refo ya, Allah marisen Ḇyena.​—Yohanes 4:24.

•   Ḇenadi wor fafnoḇek ro Allah I. (Lukas 11:13) Allah nari ifnoḇek Au fa nwa rari-rari ro snonggaku ḇefanam kuker Allah I sya. (Galatia 5:22, 23) Oso wer ido, nadi bisa ifnoḇek Au fa wafawawinanem syadi inja swambraḇ fafisu wasmai roi ḇesamswen ro kenem Bena.​—Yakobus 1:5.

•   Ḇebati fanam kuker snonggaku ḇefanam kuker Mansreen Allah sya. Nari sisambraḇser Au fa wakfanam kuker Manseren Allah kako. (Roma 1:11, 12) Imbape, fafisu ḇebati kuker snonggaku ḇena kakara Allah Ḇyena ḇa ido, fyoro mura nari wakmnis si ḇae.​—Yakobus 4:4.

 Snonggaku ḇemyaren ḇeso ari na sfanam beri kuker Mansren Allah ḇa. Refo doḇe, ”Rofyor snon oso kyara mankundiḇe ḇeḇeari nasrawen, ḇape fyarmku ramar ḇyedi ḇa, ḇyeankar mankundi, ma ḇaḇeari ḇyena nefromo”.​—Yakobus 1:26​

 Refo ya fyasnaiḇair snonggaku ḇena wis ḇepyum kuker Allah nari isyom Allah I kuker nyan moḇ Allah imarisen ya. Sisyom Allah ḇe raryur oser, ḇemnis ra ”baken oser”. Sifawi bisa sfaduru pdef ḇaḇeoser ma ḇaḇeaski ro raryur ani snar sismai fafnoḇek ro rur ḇesren.—Efesus 4:1-4.

 Kakara ḇesasar: Allah braur Ḇyesyakam na sfanam kuker Manseren Allah.

 Roi ḇekaku: Allah braur Ḇyesyakam napyum fafayaḇa. (Mazmur 145:10; Roma 1:20) Ḇape, aiwan sya siḇese ro snonggaku koine isoine kona mararisen fa kona wis ḇepyum kuker Mansren Allah ma na kosewar fa kofanam syadi wer kuker Manseren I. Aiwan sya na sipok sḇebati kuker Allah I ḇa. Sima siso monda naluri sena ḇaido marisen sḇaḇir ro baken sena. (2 Petrus 2:12) Iso ḇefnai fa Refo ikofenḇair rari ḇemnis ra aiwan sikada snonggaku ḇena Allah rur Ḇyedi ḇa..​—Yakobus 3:15; Yudas 19.