Kona bati ido na nafrur fa kenem koḇena nun marisen. Bati ḇefrur pyum nari ifnoḇek ko fa koḇe snonggaku ḇefrurpyum kako ma na ifnoḇek ko fa kona kakara ḇemnis.​—Amsal 27:17.

 Imbape, Refo ikofenḇair ḇe ko fandun fa kokinfir pyum mansei na koḇebati kuker sya. Refo byuk swarapepen ḇe ko ḇekur samswen na kosmai na fafisu koḇebati kuker snonggaku ḇeḇye ḇa sya. (Amsal 13:20; 1 Korintus 15:33) Bati ḇeḇye ḇa ansi nari sawyae ko fa kofrur snemuk ḇeḇye ḇa kako. Oso wer ido, fyoro mura rari ḇepyum koḇena bisa napromes.

Fawar ine nari dawosḇair:

•  Bati ḇepyum ima imnis rariso?

•  Fawar ḇekur ḇaḇebati ḇekaku riḇeso naisya ḇeḇefas ro Refo ya ke?

•  Bisa kakḇe Manseren Allah bati Ḇyedi ke?

•  Mnuk-mnuk ro Refo ḇekur kona bati

 Refo doḇe bati ḇepyum ima snonggaku ḇena hobi ḇemnis ra ko monda ḇa. Imnis ra, rosai manfasfas Refo fyas ro Mazmur 119:63, ”Yaḇebati kuker snonggaku ḇesyowi Au sya a ma ḇembranser farkankin Bena kam.” Manfasfas ani ikofen ima kyinfir bati ḇemarisen ḇefrur Allah imarisen ma ḇeso parenta Ḇyena kam.

 Refo ikofen bati ḇepyum ima imnis rariso. Rupa ra:

•   ”Bati ḇekaku isawarwar ro fafisu nakam, ma ḇye naek rofyor samswen isya.”​—Amsal 17:17.

•   ”Bati ono sisya siḇe sifrur susa oso ma ḇesesya, ḇape bati ono sisya ḇefanam syadi ro naek.”​—Amsal 18:24.

 Mnuk-mnuk anane nfasnaiḇair bati ḇepyum ima nari isouser, isaswar, ifurpyum, ma fyasnai snemura. Bati ḇekaku imarisen isaramper ko ro fafisu kosmai samswen. I kako imgak ḇa fa isonek ko fyor kofrur roi ḇesasar ḇaido kun snemuk ḇepyum ḇa na.​—Amsal 27:6, 9.

 Refo fyas snonggaku ḇena rari ma kenem ḇesisye, sna umur ḇesisye, moḇ srama ya ma budaya sena naḇese yae mboi bisa sḇebati ḇepyum kaku. Rwama kawos fawar ri kyor ro ḇaḇebati ḇeradirya.

•   Rut ma Naomi. Rut ima Naomi inbikin ḇyedi. Inja umur suḇena nari naḇese kaku. Oso wer ido, Rut ima ryama ro er ḇeḇese ro Naomi i. Rarirya mboi, suḇebati fanam kaku ma suswar yae su.​—Rut 1:16.

•   Daud ma Yonatan. Rya Yonatan ḇyeumur syadi taun ri 30 ro Daud i. Imbape Refo ikofen Daud ma Yonatan ”suḇe bati fanam kaku”.​—1 Samuel 18:1.

•   Yesus ma manwawan ḇyesi. Yesus ima guru ma tuan faro manwawan ḇyesi. (Yohanes 13:13) Ḇape kyara ḇaḇeri manfamyan ḇyesine sima sisyus ḇa fa sḇe bati faro i. Ḇesyaḇo, Yesus fyanam kaku kuker snonggaku ḇemarisen ḇeso farkarkor byuk na. Doḇe, ”Yor mkoḇe bati, snar yakofen ḇadir faro mko kwar roi ḇeḇor nakam yamnaf kwar ro Mami na.​”—Yohanes 15:14, 15.

 Imbo, snonggaku sya bisa sḇebati kuker Allah ḇae. Refo doḇe, ”[Allah] ima fyanam faro snonggaku ḇefrur roi ḇenapes.” (Amsal 3:32) Ine kyurfasnai, Allah imarisen ḇyebati kuker snonggaku ḇesewar fa sḇe snonggaku ḇefrur pyum, sisouser, sawos kakaku, ma simarisen siso parenta Ḇyena. Imnis raris, Refo dap Abraham, snon bena kakyar ani, ḇe Allah bati Ḇyedi.​—2 Tawarikh 20:7; Yesaya 41:8; Yakobus 2:23.