Ro fafisu ḇepon naiwara, snonggaku Israel sya siwan si fa sbuk perpuluhan, a isoine rarwas bar ḇeḇesamfur ro ḇaḇenana sena ro taun iser. Ine iso nyan oser fa sisaramper kaku farsamsyom faro Allah. Allah ikofen ḇe si, ”Ro taun ḇe taun, fandun fa mgobuk rarwas bar ḇeḇesamfur mgosmai ro mor mgoker ro yaf mgoḇena.”​—Ulangan 14:22.

 Snonggaku Israel ro ḇeponiwara, sbuk farsarser perpuluhan ine snaro nanema parenta ro Sasoser Moses (Taurat), naiso Sasoser Allah byuk faro si. Ḇape, Sasoser Moses ḇyenanema neḇefesepen kuker snonggaku Kristen ḇa. Inja, fandun ḇa fa sbuk perpuluhan. (Kolose 2:13, 14) Imbape, snonggaku Kristen oser-oser bisa sbuk farsarser ”imnis marisen ḇyedi. Ḇyuk kuker fafardun awer roba snar ḇaḇedafdifer, snar Allah iswar snonkaku ḇeḇuk kuker marisensya”.​—2 Korintus 9:7.

•  Perpuluhan sap ro Refo sifawi na ḇe Ḇaḇeasas Ḇekwar

•  Perpuluhan sap ro Refo sifawi na ḇe Ḇaḇeasas Ḇabo

 Ro Ḇaḇeasas Ḇekwar ya, sap perpuluhan ine kali ri ḇeḇeso, sap ker na fyor Sasoser Moses ine neḇebuk kwar faro er Israel. Ḇape, ono wer sap na ro fafisu ani ḇaim.

Rofyor Sasoser Moses Isya Ḇaime

 Ro Refo, snonggaku ḇepon kaku ḇebuk perpuluhan isoine Abram (Abraham). (Kejadian 14:18-20; Ibrani 7:4) Ḇape, byuk rarwan oser monda faro raja ḇeḇe imam kako ḇerama ro mnu Salem. Ḇarpur mura, wos oḇaberi ḇekofen Abraham ma romawa ḇyesya sbuk perpuluhan wer.

 Snonggaku ḇeḇesuru ḇeḇeyap snar byuk perpuluhan isoine Yakub i, Abraham kpu ḇyedi. Ḇyeasas snar, fyor Allah ḇyebarakas i ido, nari byuk ”rarwas bar ḇeḇesamfur ro roi ismai nakam” faro Allah. (Kejadian 28:20-22) Manfawawi Refo ḇeḇeso sya soḇe, perpuluhan byuk na imbude farsarser aiwan rirya. Yakub ifrur imnis asas ikofen na raryano, idif kina ḇyesi ḇa fa sakbuk perpuluhan kako

Rofyor Sasoser Moses Naisya Kwar

 Snonggaku Israel ḇero ḇepon siwara sor si fa sbuk perpuluhan fa siksomser ḇaḇesamsyom sena.

•   Farsarser nane sḇuk na faro snonggaku Lewi sya, ma imam sya kako, kukro sbuk swaf senakam fa sbuki frur roi ḇefesepen kuker samsyom ya, snar sakna saprop oḇa fa sakkaker ro na. (Bilangan 18:20, 21) Snonggaku Lewi ḇe imam ḇa sya, fandun fa sbuk rarwas bar ḇeḇesamfur ine ro perpuluhan sismai na faro imam sya, ma fandun fa roi sbukna nama roi ḇepyum nairi.​—Bilangan 18:26-29.

•   Imbude, ro taun iser sifrur perpuluhan ḇesena wer, ma fainda ḇyena faro snonggaku Israel syakame bo snonggaku Lewi sya monda ḇa. (Ulangan 14:22, 23) Perpuluhan annane sbukna ma nun payamyum faro kina ḇeso ro munara ḇeba ḇefandun kaku. Ma kako, ro taun-taun ḇeḇeso na, perpuluhan ansine sbuk na faro snonggaku ḇesabarar sya.​—Ulangan 14:28, 29; 26:12.

 Rariso perpuluhan annane neḇekor rai? Ro taun ḇe taun snonggaku Israel sikram rarwas bar ḇeḇesamfur ro roi sinek ro yaf sena. (Imamat 27:30) Simarisen syadi sbuk kumpan ro sbuk roi sinek ro yaf sena ido, pipi sbuk na ḇarbor ḇyena fandun fa namnis kuker roi sinek anna mura sbuk bar eḇe rim ya wer. (Imamat 27:31) Sikako fandun fa sbuk rarwas bar ḇeḇesamfur ro ”sapi, kambing, ḇaido domba nai ” sesya.​—Imamat 27:32.

 Aiwan sbuk ḇe perpuluhan isoine aiwan ḇesamfur ḇesae ro padwar. Ro Sasoser Moses doḇe, sipok smamkukeḇ aiwan ani awer, sfadwer i kuker aiwan ḇese ḇa, ḇaido sfadwer kuker pipi ḇa. (Imamat 27:32, 33) Mboi, perpuluhan sfanjur faro munara na bisa sfadwer na kuker pipi. Inja, snonggaku Israel ḇeḇarek ḇinggwan sya, simor awer fa sun rofanfan sena ḇe munara ani.​—Ulangan 14:25, 26.

 Fafisu risai snonggaku Israel sya sbuk perpuluhan? Taun ḇe taun. (Ulangan 14:22) Ḇape, taun ri fik rarwan oser, sifrur na ḇa, isoine ro taun Sabat. Snaro ima taun fa simnaisu rirya, inja sker roino wer ḇa. (Imamat 25:4, 5) Inja, ro taun ani, sbuk perpuluhan roro roḇean sismai ro yaf sena ḇa. Taun ḇeḇe kyor ma ḇeḇe wonem ya ro swaf taun ri fik anine, perpuluhan ḇesena naisya sbuk na faro snonggaku ḇesaḇarar sya ma kako faro snonggaku Lewi sya.​—Ulangan 14:28, 29.

 Samamyai rosai nari sismai ya fyor sbuk perpuluhan ḇa? Ro Moses Sasoser ḇyedi fyas roi ani ḇa. Snonggaku Israel sya sbuk perpuluhan kuker snewar ḇesiper monda ono ḇedif si ḇa. Ramnai, sikofen ro Yahwe ḇarpon Ḇyedi snar sbuk farsarser sena kwar, ma sor barakas. (Ulangan 26:12-15) Ḇape, snonggaku oso byuk perpuluhan ḇa ido, Manseren myam si ḇe snonggaku ḇekaraw roi Nya na.​—Maleakhi 3:8, 9.

 Perpuluhan annane nmarḇak faro si ke? Oroḇa. Allah ḇyeasas snar nari byuk barakas ḇebor ḇe si, ma nari sesusa royo ḇa, fyor sbuk perpuluhan ya. (Maleakhi 3:10) Imbape, sifrur na ḇa ido, nari er sesi kam sekandera. Manseren nari byuk barakas ḇe si ḇa. Oso wer ido, snar snonggaku Lewi ma imam sya sismai perpuluhan ḇa, inja fandun fa sifararur fa sisewar anan faro si ma nari sifararur kuf ḇa fa sifnoḇek snonggaku Israel ro samsyom sena ḇa.​—Nehemia 13:10; Maleakhi 3:7.

 Fafisu Yesus ikenem ro supswan ine kaker, Allah manfamyan Ḇyesya fandun fa sbuk perpuluhan kaker. Mboi, fyor Yesus imar kwar, sbuk perpuluhan ya wer ḇa.

Ro Yesus fafisu ḇyedi

 Ro Ḇaḇeasas Babo ya, kofawi snar ro Yesus fafisu ḇyedi kako snonggaku Israel sbuk perpuluhan kaker. Ikofen snar perpuluhan ima roi fandun fa sbuk na. Imbape, isonek manfarkin agama sya, ḇebuk perpuluhan isof ro roi ḇekasun na mboi ’roi ḇeḇefandun syadi ro sasoser Refo Yahudi kamdwerna, isoine: napnapes ma sawarwar ma ḇaḇeuser’.​—Matius 23:23.

Fafisu Yesus imar kwar

 Parenta fa sbuk perpuluhan naisya wer ḇa fafisu Yesus imar kwar, kukro ”sor rarwas ḇar ḇeḇesamfur” ima Sasoser Moses rirya. Sasoser ani isya wer ḇa fafisu Yesus imar ḇe farsarser—Ibrani 7:5, 18; Efesus 2:13-15; Kolose 2:13, 14.