Manseren Allah ifrur snon ma bin ḇerandak raposa, Allah ḇye su fa suḇeoser ro farḇakḇuk ya. Allah fyasos farḇakḇuk ḇe fasfesepen ḇepyum kaku ro fandu snon oser ma bin oser insama suḇawes kina suḇedi.​—Kejadian 1:27, 28; 2:18.

 Manseren Allah imarisen fa snonswa ma binswa sumarisen. (Amsal 5:18) Iso ḇewar fa, ro Refo ya Allah byuk farkankin faro ḇeḇe imbeswa kwar sya insama sismai payamyum ro farḇakḇuk sena.

Fawar ine na kyarem fakfuken:

•  Rosai Allah marisen Ḇyena faro farḇakḇuk ya?

•  Ḇeḇe imbeswa kwar bisa suburyae ḇaido suḇesisye ke?

•  Fandun fa sfasepen fakawin ya ro pamarenta ke? Moḇsa Allah myam na rai?

•  Rosai fakamamar Allah byuk faro snonswa ma binswa?

•  Manseren Allah dor kaku imbeswa ḇero baboine fa sna romawa ke?

•  Rariso Refo na ifnoḇek farḇakḇuk yedi rai?

•  Mnuk-mnuk ro Refo faro farḇakḇuk ya

 Ro randak kaku, Allah fyesepen snon oser ma bin oser ro farḇakḇuk ya. (Kejadian 2:24) Allah imewer faro farḇakḇuk sapsaper, sifrur farḇuk snon kuker snon ḇaido bin kuker bin, ḇaido snon ma bin ḇeḇarek kayam mboi suḇe imbeswa ḇaime. (1 Korintus 6:9; 1 Tesalonika 4:3) Yesus fyarkor manfamyan ḇyesi fa sisouser farkankin Allah byuk faro farḇakḇuk ya.​—Markus 10:6-8.

 Ro Allah mamam Ḇyena, farḇakḇuk ima fasfesepen ḇekain fyoro. Rofyor snon ma bin sufakawin, suḇeasas fa suswaryae ma suḇe kayamyam ro fafisu sukenem ya. Allah imarisen insama sufrur imnis roi suḇeasas kwar anna.​—Markus 10:9.

 Fafisu ono roi riḇeso nafnai ra imbeswa subarek ḇesisye mboi kawan ḇa. Imnis ra, sumin ya rya fasaw fa myam fandun ro kina ḇyedi. Ḇape, Refo ikofen imbeswa suma supok suḇesisye awer snar samswen susmai ro farḇakḇuk suḇena. Imboi, fandun fa susewar insama sukain pyum kaḇer.​—1 Korintus 7:10.

 Refo doḇe knam oser monda efrur fa imbeswa suḇesisye iso oso fyarḇuk wer. (Matius 19:9) Inja, imbeswa suyun snemuk suburyae ḇaido suḇesisye snar oso fyarḇuk wer ḇa ido, Refo doḇe supok sufrur fasfes kuker ḇese ya wer awer ḇaido sufarḇuk wer awer.​—Matius 5:32; 1 Korintus 7:11.

 Allah dor insama snonggaku Kristen sisouser sasoser pamarenta sifrur faro farḇakḇuk ya. (Titus 3:1) Ipyum fa imbeswa sufasnai syowi faro pamarenta kuker sufasepen fakawin suḇedi ro kantor pamarenta sfasos kwar. Sufrur rarirya ido sufasnai suḇesyowi pamarenta monda ḇa, imboi sufasnai sumam farḇakḇuk ya ḇe fasfesepen ḇekain fyoro imnis moḇ Allah imarisen na. a

•   Sufararur kayam. Snonswa ma binswa fandun fa suswar ma susyowi yae su. (Efesus 5:33) Na sumam fandun suḇena faro aneffasfus ya kuker nyan saswar ya. (1 Korintus 7:3; Ibrani 13:4) Suna romawa kwar ido, fandun fa sufararur kayam fa sufaduru pyum si.​—Amsal 6:20.

   Refo ya ikofenḇair mnis oser-oser ḇa moḇsa snonswa ma binswa na surwas fararur suyuf ro kina suḇedi rai, rupa ra susewar pipi ḇaido sufrur fararur ro rum na. Suyun snemuk ro manggunsu rosai ḇepyum faro kina suḇedi.

•   Fakamamar ro snonswa. Refo ikofen ’snonswa ḇyebru faro binswa’ ya. (Efesus 5:23) Ḇyebru ine ḇyairo na fyarkin kina ḇyedi ma dun snemuk ḇeyun payamuym faro swari ma romawa ḇyesi.

   Na syewar insama swari ma romawa ḇyesi san pyum fa siprei, simarisen, ma sfanam ḇe Manseren Allah. (1 Timotius 5:8) Oso wer ido, fafisu ifrur snemuk na fyararur kayam kuker swari kuker ryower pyum rofyor swari ikofenḇair kakara ma sneḇaḇir ḇyena. Rarirya, fyasnai ḇyesyowi rari-rari ḇepyum ma samambraḇ swari ḇyena. (Amsal 31:11, 28) Refo doḇe snonswa fandun fa imbran pyum fakamamar ḇyedi ro kina ya dori kuker nyan saswar ya.​—Kolose 3:19.

•   Fakamamar ro binswa. Refo doḇe ”bin oser-oser iḇye kada ḇyesyowi swa ḇyedi”. (Efesus 5:33) Binswa oso ifrur imnis mnuk ine ikofen ya ido, na ifrur Allah imarisen, kukro iso ḇeyap kwar snonswa ima ḇyebukor ro kina ya dori.

   Binswa iso na ḇesaramper swari. Inja binswa oso fandun fa isaramper swari fa dun snemuk ḇepyum ma ifnoḇek i duf fakamamar ḇyedi fa ḇebukor kina ya. (Kejadian 2:18) Binswa nya fakamamar ḇefandun kaku ro kina ya. Refo byuk wos sandik ḇe binswa ḇeyuf pyum fararur ḇyena.​—Amsal 31:10.

 Oroḇa. Ro fafisu iwara, Allah iwan kwar manfamyan ḇyedi ḇeḇeso fa sna romawa. (Kejadian 1:28; 9:1) Ḇape, snonggaku Kristen sismai wawan fa sifrur rarirya ḇa. Yesus ikofen ḇaberi insama manfamyan ḇyesi sakna romawa. Yesus iwan manfamyan ḇyesi ḇero abad randak sya fa sna romawa ḇa. Imbeswa oser-oser na sun snemuk ro manggunsi imbe sna romawa ke oroḇa.

 Refo fyasepen anun nabor na ḇefnoḇek snon ma bin ḇefarḇuk babo sya. Oso wer ido, Refo ya na ifnoḇek imbeswa Kristen syakam fa sḇinggwanbur ḇaido sifrur mnis samswen ro farḇakḇuk sena.

 Wos anun ro Refo na ḇefnoḇek snonswa ma binswa fa . . .

•   sufasnai saswar ḇekaku.​—1 Korintus 13:4-7; Kolose 3:14.

•   suna wos oser.​—1 Korintus 10:24.

•   sumarisen surower yae.​—Yakobus 1:19.

•   sufasnai syowi.​—Roma 12:10.

•   sumarisen subuk ampun.​—1 Petrus 4:8.

•   susoasuser.​—Markus 10:9.

•   sukaḇaḇaḇ.​—Efesus 4:2, 3.

•   sufararur kayam.​—Pengkhotbah 4:9.

•   susambraḇser farḇakḇuk suḇedi.​—Kidung Agung 8:7.