Fakfuken ḇekur rosai ḇefnai fa kokenem ine naisya nabore, rupa ra, Rosai ḇefnai koisya rodine? ḇaido Rosai ḇefnai kaku yakenem ine? Refoya fyasnaiḇair roi ḇefnai kaku kokenem iso insama kona wis ḇepyum kaku kuker Manseren Allah. Rwama komam roi ḇeḇeso ḇefandun kaku ro Refo ya.

•   Manseren Allah ima Manḇefrur koḇedirya. Refo doḇe, ”[Manseren] lso ḇefrur ko, ko isya ro manggun ko ḇa.”​—Mazmur 100:3; Fasasna faro Yohanes (Wahyu) 4:11.

•   Manseren Allah ifawi roi imarisen kaku faro ḇraur ḇramin Ḇyena kam, ma faro snonggaku koine kako.—Yesaya 45:18.

•   Manseren Allah ifrur snonggaku koine kofandun farkankin Ḇyena, inja imbe kofawi rosai ḇefnai kaku fa kokonem ine. (Matius 5:3) Imarisen insama kosmai sneprei snar kofawi na.—Mazmur 145:16.

•   Marisen koḇena fa kofanam ḇe Manseren Allah nari ndarirya fafisu kosewar kaku fa koḇebati kuker I. Snonggaku ḇeḇeso skara bo soḇe snonggaku koine na kopok fa koḇebati fanam kuker Manseren Allah I ḇa, imbape Refo ya byuk kakakyar ḇe ko, ”Mkofanam faro Allah, ma nari Allah fyanam faro mko.”​—Yakobus 4:8; 2:23.

•   Insama koḇebati kuker Manseren Allah, fandun fa kosouser marisen Ḇyena. Refo ya ikofenḇair rosai Manseren Allah roi imarisen na. Refo ikofen marisen Ḇyenane ro Pengkhotbah 12:13, ”Mgomgak faro Allah ma mgoḇeuser sasoser Ḇyenakam, kukro roi iso ḇefnai kaku Ifrur snonggaku sya.”—Bahasa Indonesia Masa Kini.

•   Nari koḇaḇir kaku marisen Ḇyena ndarirya kwar ro fafisu iyama, fyor ipyos kandera ma byuk kankenem ḇekain fyoro faro bati Ḇyesi kam, isoine snonggaku ḇesyom I sya.—Mazmur 37:10, 11.