Rur ḇesren ima Manseren Allah papoik Ḇyeja, samambraḇ ḇekenem Ḇyena. (Mikha 3:8; Lukas 1:35) Manseren Allah fyarem rur ḇesren Ḇyeja kuker byuk samambraḇ Ḇyena ḇe moḇ risai monda fa ifrur rosai imarisen na.​—Mazmur 104:30; 139:7.

 Ro Refo ya, sfarwei wos ”rur” ine ro apap Ibrani ḇyeja ruʹakh ma apap Yunani ḇyeja pneuʹma. Wos suine skur ker ḇe Allah samambraḇ ḇekenem Ḇyena, ḇaido rur ḇesren Ḇyeja. (Kejadian 1:2) Imbape, Refo dun wos nane kako fa kyur na faro:

•   Knaref.​—Habakuk 2:​19; Fasasna 13:15.

•   Wam.​—Kejadian 8:1; Yohanes 3:8.

•   Samambraḇ, ḇaido roi ḇedafdif, kankenem ro roi ḇekenem.​—Ayub 34:14, 15.

•   Snonggaku oso kenem ḇaido rari ḇyena.​—Bilangan 14:24.

•   Kankenem rur, Allah ma malaikat sya kako.​—1 Raja 22:21; Yohanes 4:​24.

 Roi sap ro diasne kam nya roi ḇemnis, isoine roi kopok komam na ḇa, fama nya samambraḇ fa ifnai roi bisa komam ro komgasna. Imnis rarirya kako, Allah rur Ḇyeja, ima ”imnis wam, komam na ḇa, nasnai ḇe robebor ḇa ma nafo papoik”.​—Fasfas An Expository Dictionary of New Testament Words, ḇeraker W. E. Vine.

Refo dap Allah rur ḇesren Ḇyeja kako ḇe Allah ”ḇramin” ḇaido  ”ḇrampin” Ḇyena. (Mazmur 8:3; 19:1; Lukas 11:20; mam kako Matius 12:28.) Raris snonggaku ḇekir ro fararur ḇyena na ḇye ḇramin ma ḇrampin ḇyena fa ikfararur, rarirya kako Manseren Allah ḇye rur ḇesren Ḇyeja fa ifrur roi nane:

•   Farsyos sansoren.​—Mazmur 33:6; Yesaya 66:​1, 2.

•   Refo.​—2 Petrus 1:​20, 21.

•   Mujisat ro manfamyan Ḇyesi sifrur ro fafisu naiwara ma rur ḇesren nane naiso ḇefrur si fa simyaren sbaryas wos Ḇyena.​—Lukas 4:​18; Farfyar 1:8; 1 Korintus 12:​4-​11.

•   Rari-rari ḇepyum ro snonggaku ḇesoasuser faro I.​—Galatia 5:​22, 23.

Rur ḇesren ima manggun oso ḇese risya ḇa

 Refo dap rur ḇesren ḇe Allah ”ḇramin”, ”ḇrampin”, ḇaido ”knaref” Ḇyena. Korower apap nane ido, kofawi rur ḇesren ima manggun oso ḇese risya ḇa. (Keluaran 15:8, 10) Raris snonggaku ḇekir ro fararur, na ḇramin ḇyeja ipok fyararur ro manggundi ḇa ḇoi ḇye swaruser ḇyena ma baken ḇyena kam fa nakwarpu mande. Rarirya kako, Allah rur ḇesren Ḇyeja na ipok fyararur ro manggundi ḇa rofyor iso ḇefara na kada. (Lukas 11:13) Refo ya dapḇair Allah rur Ḇyeja kako ḇe war, ma dap kayamyam na kuker kakyar ma fawawi. Apap Refo dap nane kam nfasnai kaku snar rur ḇesren ima manggun oso ḇese risya ḇa.​—Yesaya 44:3; Farfyar 6:5; 2 Korintus 6:6.

 Refo ikofenḇair snonsnon ro Allah Yahwe ma Roma Ḇyedi, Yesus Kristus i monda; mboi, snonsnon ro rur ḇesren ima isya ḇaḇeri. (Yesaya 42:8; Lukas 1:31) Fafisu Stefanus i, sifawi kako i ḇe saksi Kristen, ismai mujisat kuker myam nanggi, isya myam roi ri kyor ḇa mboi suru monda. Refo ya ikofen ḇo doḇe, ”Stefanus, ḇefo kuker Rur Ḇesren iwakwaker ḇe nanki ma myam payamyum Allah ma Yesus dores ro ḇar raku Ḇyedi.” (Farfyar 7:55, Wos Ḇyak ro Rasras) Rur ḇesren ima Allah papoik Ḇyena ḇefararur fa bisa Stefanus myam mamam ani.

 Kakara ḇesasar: ”Rur Ḇesren” ima manggun oso ḇese ma daksun ro roi sor ḇe Tritunggal, raris sfas ro 1 Yohanes 5:7, 8 ro Refo Wos Ḇyak ro Rasras.

 Roi ḇekaku: Refo Wos Ḇyak ro Rasras faro 1 Yohanes 5:7, 8 ya doḇe, ”(ro boiyaswa: Kmaya, Wosya ma Rur Ḇesrenya; sko kam skoḇeoser. Ma saksi rikior skoḇuk ḇaḇesaksi ro supswan ine)”. Mboi, manfawawi sya soḇe wos nanema manwawan Yohanes roi fyas risya ḇa ma ipyum ya siser warpu awer na ro Refo ya dori. Profesor Bruce M. Metzger fyas radine, ”Kokyar kaku wos nane nkaku ḇa ma ipyum ḇa kaku fa siser na ro Ḇaḇeasas Babo.”—Syap A Textual Commentary on the Greek New Testament

 Kakara ḇesasar: Refo ya dap rur ḇesren rya ima manggun oso ḇese, inja kokyar rur ḇesren ima manggun oso ḇese dirya.

 Roi ḇekaku: Kaku ḇae, fafisu ono ido Refo dap rur ḇesren ima rya manggun oso ḇese dirya, fama roi ine ḇyeḇair snar rur ḇesren ima manggun rur oso ḇese kaku dirya ḇa. Refo isya ikofen kako ḇo doḇe fawawinanem, marmar, ma sasar imnis rya manggun oso ḇese sirya. (Amsal 1:20; Roma 5:17, 21) Imnis ra, Refo doḇe fawawinanem nya ’fararur’ ma nya ’romawa’, ma dap sasar ya naser dafdif, myamun, ma nafnai marisen faro snonggaku ḇesesya nana sena.​—Matius 11:19; Lukas 7:35; Roma 7:8, 11.

 Oso wer ido, fafisu manwawan Yohanes dap kaḇer roi Yesus ikofen na, ḇyair rur ḇesren ya ḇe ’ḇebuk sneprei’ kukro iso na ḇekofenḇair roi ḇekaku, ḇefarkin, ḇeyawos, ḇerower, ḇefasnai, ḇesandik, ma ḇesmai. Dap ’ḇebuk sneprei’ ine kuker ḇyepake apap faro snon fa byukidap wos ’i’. (Yohanes 16:7-15) Imbape, roi ḇefnai ya iso snar wos Yunani faro ’ḇebuk sneprei’ (pa·raʹkle·tos) ima apap sbukidor snon sya ma ro wos Yunani moḇ sawos raya, wos sbukifadwer roi ine fandun fa skur na faro snon kako. Fama, fafisu Yohanes fyasḇair rur ḇesren ya, myam kaku apap fyas anna kyur faro manggun oso ḇese ḇa. Inja, ḇyepake apap pneuʹma, fafisu dap wos ”ani”.​—Yohanes 14:16, 17.

 Kakara ḇesasar: Refo doḇe sebaptis kuker snonsnon rur ḇesren, inja kokyar rur ḇesren ima manggun oso ḇese.

 Roi ḇekaku: Fafisu ono ido Refo ḇyepake wos ”snonsnon” fa ḇyeḇair faro papoik ḇaido ḇeyuf papoik sya. (Ulangan 18:5, 19-22; Ester 8:10) Roi ine imnis ra soḇe ”kuker snonsnon sasoser”. Roi ine ḇyeḇair ḇa snar sasoser ani ima manggun oso ḇese ḇaido snonggaku dirya. Inja, snonggaku ḇebaptis ’kuker snonsnon’ rur ḇesren ima ikyar papoik ma fararur ro rur ḇesren ḇedif i fa ifrur Allah marisen Ḇyena.​—Matius 28:19.

 Kakara ḇesasar: Yesus manwawan ḇyesi ma manfamyan ḇyesi ro randak siwara sikyar rur ḇesren ima manggun oso ḇese dirya.

 Roi ḇekaku: Refo ma fawar ro sarisa sukofen roi ine ḇaḇeri. Syap Encyclopædia Britannica doḇe, ”Fawawi ḇeyoḇe Rur Ḇesren ima Manggun oso ḇese imnis kuker Allah . . . ima insape ryama ro Konsili Konstantinopel taun 381 Masehi ya.” Kokor ido, inema manwawan ḇepupes imar kwar rawo swaf taun ri 250 syadi ḇe ḇarpon insape fawawi ine isya.