Sfadwer Fasfas ro Refo ya Kwar Ke?

NAFNAK

Oroḇa. Sfas kaḇer ker Wos Refo ya ro rofasfas ḇepokem fasaw ma ine imbran ro swaf taun syaran-syaran kwar. Imbape, komam na kuker fasfas Refo ḇekwar naiwara kada, fasfas ro Refo ya sfadwer na ḇaḇeri.

Inja fafisu sfas kaḇer Refo ine, sifrur sasar ro fasfas sena ḇaḇeri ke?

Fasfas Refo ḇebor ḇekwar naiwara sisrow na kwar. Komam na kuker fasfas ḇesena kada, roi ḇesnai ḇese naisya. Inja kofawi fafisu sfas na, sfas sasar. Mboi, fasfas ḇesisye anya ima roi ḇeba risya ḇa kukro knam ḇyena namnis kuker fasfas ḇekaku ḇyena kaker. Fama, fasfas ḇesnai ḇesisye kaku naisya kako. Roi ine ryadine kukro fyor naiwara sia siso marisen sena monda ḇo sfadwer fasfas ro Refo na. Mam roi suru suine:

Refo ḇekwar riḇeso sfas wos ro 1 Yohanes 5:7 ya ryadine: ”ro nanggi dori: Kma, Wos ma Rur Ḇesren; ma skoine seoser”. Imbape, fasfas ḇekwar sikyar kaku nfasnai bos snar wos nane naisya ro fasfas ḇekaku ḇyena ḇa. Ḇarpur ya, insape srir wos nane na fa nawarpu. a Inja, Refo ḇebor sikyar kwar ro baboine naser wos nane ḇa.
Ro fasfas Refo ḇekwar kaku, Manseren Allah snonsnon Ḇyedi isasyar rarwan ri syaran. Fama, ro Refo ḇebor ḇero baboine sfadwer snonsnon Ḇyedi ḇe ”Manseren” ḇaido ”Allah” monda.

Moḇsa na kokyar kaku sasar ḇese naisya ro Refo ya wer ḇa?

Baboine, sisrow roi sor ḇe manuskrip ḇaido fasfas ḇekwar na nabore. b Roi ine isaramper ko fa kofawi pyum moḇ sasar ya isya ro ya. Fafisu komam fasfas anna kwar ido, rosai kofawi ḇekur manasnis ro Refo koḇena ḇero baboine na?

Manfawawi oso ḇenir ḇe William H. Green ikofen ḇekur Syap-Syap Ibrani (sap ker ḇe ”Ḇaḇeasas Ḇekwar”). Doḇe, ”Fasfas ḇekwar ḇese sfas na fa namnis kaku ro baboine raris Refo ine, naisya ḇa.”
Manfawawi Refo oso ḇenir ḇe F. F. Bruce, dakkofen ḇekur Syap-Syap Yunani Kristen, ḇaido sor ḇe ”Ḇaḇeasas Babo”. Fyas radine, ”Roi ḇefasnai bos snar fasfas ro Ḇaḇeasas Babo ima kyaku, naisya nabor syadi ro fasfas sikyar kaku ḇesena, fama snonggaku syakam sikyar faro fasfas ḇese anna ḇae.”
Pakar faro fasfas Refo ḇekwar ḇenir ḇe Sir Frederic Kenyon, doḇe snonggaku oso ”na dufepen Refo ya ma ikofen bos kaku ḇo doḇe inema Manseren Allah Wos Ḇyenairi. Komam Refo ya isya ro fafisu sinan siwara rawo ko ro baboine, mboi fasfas ḇero dori na namnis kaku”.

Roi ḇese rosai wer ḇefrur fa kokyar kaku sfas kaḇer ker Wos Refo ya mboi fasfas anna namnis?

Snonggaku Yahudi ma snonggaku Kristen sya sfas kaḇer fawar ḇekur Allah kawasa Ḇyesi sasar sena. c (Bilangan 20:12; 2 Samuel 11:2-4; Galatia 2:11-14) Sfas kako fawar ḇekur snonggaku Yahudi ḇesoasuser ḇa sya. Oso wer ido, manfasfas ansya sipyos ḇa wos ro Refo ḇeyoḇe farkarkor ḇeraker snonggaku nama nsasar. (Hosea 4:2; Maleakhi 2:8, 9; Matius 23:8, 9; 1 Yohanes 5:21) Manfasfas ḇefas kaḇer fawar anna sfas na fa namnis kaku. Roi ine ḇyeḇair manfasfas ansya sikyar ma sesyowi kaku Manseren Allah Wos Ḇyena.
Inja kokyar Manseren Allah iso ḇefarkin manfasfas sya fa sfas Refo ine, nari myamwarek fasfas ro Refo fa sfadwer na ḇa. d (Yesaya 40:8; 1 Petrus 1:24, 25) Manseren Allah imarisen insama Wos Refo ya byuk payamyum faro snonggaku ḇekenem ro fyor naiwara serer ḇa, mboi ko ro baboine kako. (1 Korintus 10:11) Ḇekaku ya, ’fasfas ro Refo ya kam nfarkor ko. Snar farkarkor kosmai ro Refo ya nafrur fa kodworen ma kosambraḇ isof kokyar’.—Roma 15:4.
Yesus ma manfamyan ḇyesi sap kaḇer fasfas ro Syap-Syap Ibrani kako ma sikyar kaku roi manfasfas sfas kaḇer anna namnis kaku.—Lukas 4:16-21; Farfyar 17:1-3.

a Sisewar kwar mboi sisrow wos nane ḇa ro Kodeks Sinaitikus, Kodeks Aleksandrinus, Manuskrip Vatikanus 1209, fasfas ḇekaku Vulgata Latin, Philoxenian-Harclean ro wos Siria, ḇaido Pesyita Siria.

b Rupa ra, fasfas Yunani ḇekwar sap ḇe Ḇaḇeasas Babo, ḇaido Syap-Syap Yunani Kristen sisrow kwar barbor ya 5.000.

c Refo ya ikofenḇair ḇa snar snonggaku Manseren Allah kyinfir fa sfas kaḇer Wos Refo ya sima sinapes kaku. Refo ya doḇe, ”Snonggaku oso ḇaḇeri ḇesasar ḇa.”—1 Raja 8:46.

d Refo ya ikofenḇair ḇa Manseren Allah dap wos na oser-oser ḇo manfasfas sya sfas kaku na radiri, mboi Manseren Allah fyarkin manfasfas sya kakara sena ḇo sfas Refo ya.—2 Timotius 3:16, 17; 2 Petrus 1:21.