Refo bisa fyarkin ko fa kofrur snemuk ḇepyum. Ro Refo ya na kosmai ”fawawinanem ma fawawi”. (Amsal 4:5) Refo ya ikofenḇair roi ḇeḇeso fandun fa kofrur kaku na. Imbape ro roi ḇeḇeso na, Refo ikofen monda wos anun ḇefnoḇek ko fa kofrur snemuk ḇepyum.

Fawar ine nari dawosḇair:

•   Nyan ḇefnoḇek Au fa wafrur snemuk ḇepyum

•   Fandun fa yafadwer snemuk yafrur kwar na ke?

•   Rariso fyor yafrur snemuk ḇeḇye ḇa kwar ma jadi fa yafadwer na ḇa?

•   Wafasaw-saw awer. Refo doḇe, ”Snonggaku ḇena fawawinanem nari kyara kaku nyan ḇyenakam.” (Amsal 14:15) Wafrur snemuk ḇefasaw-saw ido, imbude nari mam ḇa roi ḇefandun na. Inja, kwara pyum kaku roi imbe kwinfir na.​— 1 Tesalonika 5:21.

•   Waso monda awer roi ḇaḇir na. Refo ya byuk swarapepen ḇe ko fa kokyar awer faro kosnesna. (Amsal 28:26; Yeremia 17:9) Fyor koisya komsore, koḇesneso, koḇoryae, ḇaido kombrus kaku, nari kofrur snemuk ḇepyum na ḇa​.​—Amsal 24:10; 29:22.

•   Ḇenadi wor fawawinanem. (Yakobus 1:5) Allah imarisen fyor kor fawawinanem ro I. Ima Kma ḇesaswar, imewer romawa Ḇyesya sismai samswen. Refo doḇe, ”Snar Yahwe iso ḇebuk fawawinanem; Iso knam ro fawawi ma kakara ḇepyum na.” a (Amsal 2:6) Byuk ḇe ko fawawinanem, ḇesyadi byuk na roro Wos Ḇyena, Refo ya.​—2 Timotius 3:16, 17.

•   Swewar fa wafawi nabor syadi wer. Insama wafrur snemuk ḇepyum na, fandun fa swewar anun bisa wakyar na. Refo doḇe, ”Snonggaku ḇefawinanem imarisen ryower pyum ma fyarkor nabor syadi wer.” (Amsal 1:5) Rodiso kosmai anun ḇesrow kuker roi kofandun na ma bisa kokyar na?

   Roi epon kaku yaiso, kosewar rosai Refo ikofen ya. Inja, Wos Ḇyena naser ananun bisa kokyar na. (Mazmur 25:12) Ro roi ḇeḇeso, Refo byuk parenta ḇesnaibos kaku inja kofawi rosai fandun fa kofrur na. (Yesaya 48:17, 18) Ḇape nono ido, Refo byuk monda wos ananun ḇefnoḇek ko fa kofrur snemuk ḇepyum na. Snonggaku oser-oser bisa ifrur snemuk ro manggundi. Roi skinfir na oser-oser naḇesisyeyae kako, imbape roi skinfir na imnis kuker roi Refo ikofen na ido, nama snemuk ḇepyum nairi. Rarirya, moḇsa kosrow mnuk ḇesrow ro Refo ḇemnis kuker roi kosmai na? Swewar pan syap, vidio, ḇaido artikel ḇeḇeknam ro Refo ya, raris ḇesya ro situs web koḇedine. b

   Fyorno ido, fandun fa swewar anun ḇese ḇeḇekyare. Imnis raris, waḇe wakoḇes roebor oso ḇaim bo ḇaḇyak ya nek kaku ido, na swewar fa wafawi resari roebor ani, moḇ sifrur na, roi fandun fa kofrur na fyor rooebor ani iḇye ḇa ma rofyor imbe kobuk kaḇer na. Ma kako, mam mnis ḇepon roebor ani imnis roi wafandun na ke roḇa.

   Refo doḇe, ”Aw na nari nambran pyum ḇa fyor mgawos na baim.” (Amsal 15:22) Inja imbe wafrur snemuk ḇaim, wawos ari kuker snonggaku wakyar kaku fa sbuk wos ananun ḇepyum ḇe Au. Rupa ra, imbe wafrur snemuk ḇekur pararei Bena, bisa wawos resari kuker dokter sya. (Matius 9:12) Au kako bisa wawos na kuker snonggaku ḇesmai roi ḇemnis kuker Au. Ḇape waswarepen, snonggaku ansi sipok sifrur awer snemuk oso ḇe Au. Manggundaw na ḇefrur snemuk ma ḇekamar roi wafrur ani.​—Galatia 6:4, 5.

•   Kwara pyum resari roi imbe wakinfir nakam. Waryur informasi na raposa, bisa wafas kankinfir ḇeḇeso na. Wafuken kaku ḇe manggundaw, kwara pyum kwar fainda ma roi ḇesamswen imbude na wasmai na ro roi imbe kwinfir ya ke. (Ulangan 32:29) Rupa ra, rariso snemuk wafrur na nawyae Au, kina bansi ma snonggaku ḇesesya rai? (Amsal 22:3; Roma 14:19) Rofyor wakara pyum roi nayafa kame, swewar wos anun ro Refo faro roi anna. Rarirya nari wafrur snemuk ḇepyum ya.

•   Wafrur snemuk. Fyorno ido, kofrur snemuk fasaw ḇa rofyor koḇeḇirḇar. Ḇape, kokara radirya ker ido, na kona swaf ḇepyum wer ḇa ḇaido kosmai roi ḇepyum na ḇa. Inja kofasaw ḇa fa kofrur snemuk ido, ima imnis ra koisya kofrur snemuk ḇeḇye ḇa na kwar. Ine imnis ra snonggaku ḇeker mor na. Refo doḇe, ”Mansei ḇewaf isof ro wam ya ibrin kaku ma sup ya ipyum kaku ido, nari dakker mor ḇa ma dakinek ḇa.”​—Pengkhotbah 11:4, Bahasa Indonesia Masa Kini.

 Koswarepen, snemuk ḇemnis kaku ono ḇa. Rosai ḇefnai kokofen radine? Fafisu ono na kobur roi ono fa kofrur snemuk. Oso wer ido, roi kokara ḇa na bisa ndrama kanandor ko. (Pengkhotbah 9:11) Inja, fandun fa kosewar informasi ḇekaku na ramnai kun snemuk ḇepyum.

 Fyorno ido, snemuk ono bisa kofadwer na. Imbude kenem koḇena nefarwe ḇaido snemuk kofrur ro fafisu naiwara rya napyum ḇa. Rarirya ido, bisa kokarapan rosai ḇesya kaker bisa kokinfir na ramnai kofrur snemuk ḇepyum.

 Imbape, snemuk ḇeḇeso jadi fa kofarwe na ḇa. (Mazmur 15:4) Rupa ra asas farḇakḇuk. Allah imarisen insama ḇefarḇuk kwar sya sisouser faro swa sesi imnis asas farḇakḇuk sifrur kwar na. c (Maleakhi 2:16; Matius 19:6) Imbeswa oso susmai samswen ido, fandun fa susewar kaku insama sufrurmnis samswen susmai anna, bo sufrur muk farḇakḇuk suḇena ḇa.

 Kokame nono ido kofrur snemuk ḇeḇye ḇa ma kofasnai fawawinanem ḇa. (Yakobus 3:2) Imbude na kofafko ma kobuk sasar ya ḇe ko. Koḇaḇir radirya ido nama nsasar ḇa. (Mazmur 69:5) Kaku ya, sneḇaḇir ḇeradirya ipyum kako kukro nafnoḇek ko fa kofrur sasar ani wer ḇa. (Amsal 14:9) Imbape, kobuk sasar ker ḇe manggunko bisa nafrur fa koḇesneso ma koḇor koḇerari. Inja, Refo ya byuk wos anun ḇe ko insama koḇaḇir radirya ker awer. d (2 Korintus 2:7) Refo ya ikofen, ”Yahwe ima isawarwar ma ifrur pyum.” (Mazmur 103:8-13) Inja, fafisu wafrur snemuk ḇeḇye ḇa ma jadi fa fadwer na ḇa ido, bisa wafarkor ro sasar ani ma swewar fa wafrur mnis kaḇer roi ani wer.