Snon ḇenana ma Lazarus suiso snon ri suru ḇeyap ro sararḇer Yesus byuk na. (Lukas 16:19-31) Suḇeḇair ḇe raryur ri suru, isoine: (1) manfarkin Yahudi ḇeararer ro Yesus fafisu ḇyedi sya ma (2) kawasa ḇebor smamkyof si mboi simarisen srower Yesus anun ḇyena.

Fawar ine na kyarem fakfuken:

•  Rosai Yesus ikofen ḇekur snon ḇenana ma Lazarus?

•  Ine fawar ḇekaku dirya ke?

•  Fawar ine fyasnai for ḇembrer ḇa fa sbukirap snonggaku sya naisya kaku ke?

•  Sararḇer ḇekur snon ḇenana ma Lazarus kyur ḇe rosai?

 Ro Lukas fasal 16, Yesus fyarḇair snon ri suru ḇesmai fararwei ḇeba kaku ro kenem suḇena.

 Fawar ḇyeja ryadine: Snon ḇenana oso ikenem ro payamyum kaku. Snon ḇesabarar oso snori Lazarus sun ker i ḇe ḇarpon snon ḇenana ani rum ḇyedi. Lazarus ikyar kaku fa daksmai roḇean ḇedawer ḇesapi murḇaḇ ro snon ani meja ḇyedi. Mura ido, Lazarus imar ma malaikat sya sun i ḇe Abraham ris ḇyedi. Snon ḇenana ani kako dakmar ma sikram i. Ro Yesus fawar ḇyedine, rya snon suine sukenem kaker fafisu sumar kwar. Snon ḇenana ani ismai wayam ro for ḇembrer ḇa. Dor insama Abraham iwan Lazarus i fa syowen brampin ḇyesi ro war fa ipnunek ramar ḇyedi. Abraham imewer ifrur na. Doḇe kankenem suḇena naḇese kaku kwar ma kirine ḇron ḇeba oso isya pyandwas su ma jadi fa sunuk mura muma ḇa.

 Oroḇa. Inema sararḇer Yesus fyar na fa byukifarkor ko. Ḇefawinanem Refo sya sikofen kako ine fawar ḇekaku dirya ḇa. Imnis raris, Refo terjemahan Martin Luther edisi taun 1912 doḇe inema sararḇer monda diri. Refo Katolik The Jerusalem Bible, fasfas kasun sifrur na nekofenḇair ine iso oso ro ”sararḇer imnis fawar, ma snonggaku sap ro dine sisya kaku ḇa”.

 Yesus ikofen fyor marmar ya raposa kankenem naisya kaker ke? Yesus isya fyasnaiḇair Abraham ma Lazarus suro nanggi ma ono srap si ro for ḇepok ḇemḇrer ḇa fafisu simar kwar ke? Roi ḇeḇeso naisya ḇefasnai naiso Yesus kakara ḇyedi isya ḇa.

 Imnis raris:

•   Srap snon ḇenana ani ro for ḇepok ḇemḇrer ḇa ido, war ḇero Lazarus brampin pum ḇyedi nari napromes beri.

•   War kerno naisya kaker ido, na napnunek ramar snon ḇesam kaku ro for ani ke?

•   Abraham ikenem ro nanggi ḇa, kukro rofyor Yesus ryo supswan ine kaker ikofenbos kwar, oso ḇeyek ḇe nanggi ḇaim.​—Yohanes 3:13.

 Oroḇa. Ḇape imbude ono skara bo soḇe, ’Imbo ine fawar ḇekaku risya ḇa. Ine ḇyeḇair ḇe snonggaku ḇefrur pyum nari ḇera ḇe nanggi ma snonggaku ḇeḇarḇor nari srap si ro for ḇembrer ḇa.’ a

 Kakara ḇeradirya nkaku ke? Oroḇa.

 Farkarkor ḇekur for ḇepok ḇembrer ḇa naḇese kuker rosai Refo ikofen ḇekur snonggaku ḇemar kwar sya. Rupa ra, Refo ikofen ḇa fyor simar kwar snonggaku ḇefrur pyum syakam nari sikenem kuker marisen ro nanggi ma snonggaku ḇeḇarḇor syakam nari srap si ro for ḇembrer ḇa. Fama Refo ikofenḇair, ”Snonggaku ḇekenem sifawi nari simar, ḇape snonggaku ḇemar sya sifawi royo ḇaḇeri.”​—Pengkhotbah 9:5.

 Sararḇer ani fyasnaiḇair ro Yesus fafisu ḇyedi, raryur snonggaku ri suru suisya nari kenem sena nefarwe kaku.

 Snon ḇenana kyur ḇe manfarkin agama Yahudi sya ”sewomen faro pipiya”. (Lukas 16:14) Srower rosai Yesus byaryas na mboi spampum na. Smamkyof kawasa ḇebor sya.​—Yohanes 7:49.

 Lazarus kyur ḇe kawasa ḇebor ḇemarisen faro Yesus anun ḇyena. Manfarkin agama Yahudi sya sayin si.

 Raryur ri suru suine susmai fararwe ḇeba kaku.

•   Manfarkin agama Yahudi sya skara Allah imarisen faro si. Ḇape snar simewer anun Yesus byaryas na, Allah kyurpum si ma imarisen faro samsyom sena ḇa. Inja ro fyor anya, rya simar kwar. Ma fafisu srower anun Yesus byaryas na rya newayam si.​—Matius 23:29, 30; Farfyar ro Manwawansya (Kisah) 5:29-33.

•   Kawasa ḇebor sya ro Yesus fafisu ḇyedi, manfarkin agama sya sfandun si ḇa, mboi kirine sḇebati kuker Allah. Sibor simarisen faro Yesus anun byuk na inja sismai payamyum nabor. Saksmai kako swaf fa sḇebati kuker Allah isof fyoro-fyoro.​—Yohanes 17:3.