Sbuk ker wos ’snon Samaria ḇefrur pyum’ fa nḇairo snonggaku ḇefnoḇek min ḇefandun fafnoḇek sya. Apap nane neknam ro sararḇer Yesus fyawar na. Roro sararḇer ani, Yesus fyarkor ko fandun fa kofnoḇek snonggaku ḇese bo komam si ro er srama ya ḇaido kankenem sena ḇa. a

Fawar ine nari kyarem fakfuken:

•  Sararḇer ḇekur ’snon Samaria ḇefrur pyum’ rosai fawar ḇyeja?

•  Rosai ḇefnai fa Yesus fyawar sararḇer ine?

•  Farkarkor rosai kun ro sararḇer inenya?

•  Manseiso snon Samaria ani?

•  Fawar ḇekur ’snon Samaria ḇefrur pyum’ ine fawar ḇekaku dirya ke?

Fawar ḇeknampu ro sararḇer Yesus fyawar anya isoine snon Yahudi oso ifrur marandan ro Yerusalem ḇe Yerikho. Fafisu ro marandan ya kaker, sifasyar pres i, smun i rawo indokada imar, ramnai sibur i.

Imam Yahudi oso ma manfarkin agama Yahudi oso sumbranuk nyan ya bo sumam snon ḇeparpar ani. Suma snonggaku Yahudi imnis snon ḇepar ani, imboi sumewer sufnoḇek i.

Ramnai ido, snon Samaria oso dakmbranuk nyan ani kako. (Lukas 10:33; 17:16-18) Snar iswar snon Yahudi ani, isbawer mani ro par ḇyena ma pyarek apepen na. Mura dun i ḇe rum seryar ro ya ma fyaduru i. Meser arwo ya, byuk pipi ḇe ḇemamawarek rum ani ma dor i fa fyaduru pyan snon Yahudi ani. Ikofen kyoḇes rawo nasyadi ro pipi ansi ido nari fyadwer si.​—Lukas 10:30-35.

Yesus fyar sararḇer ani faro snon Yahudi oso ḇekara fandun fa ifrur pyum min Yahudi ḇyesi monda. Yesus imarisen fyarkor i insama ifrur pyum snonggaku syakam, faro snonggaku ḇeraker er ma agama ḇemnis kuker i monda ḇa. (Lukas 10:36, 37) Sararḇer anine sfas ro Refo ya fa byukifarkor snonggaku syakam ḇemarisen fa ḇefrur Allah imarisen.​—2 Timotius 3:16, 17.

Sararḇer ani fyarkor ko fandun fa kofnoḇek min koḇesya bo komam si ro ḇaḇeḇarpur sena, keret, ḇaido er sedi ḇa. Fandun fa kofrur pyum si raris moḇ komarisen sifrur pyum ko raya.​—Matius 7:12.

Snonggaku Samaria sḇarek ro moḇ ḇero Yudea bar wambrur. Kawasa Samaria ansine kako sima kpu up ro snonggaku Yahudi ḇefarḇuk kuker snonggaku Yahudi ḇa sya.

Ro abad randak Masehi, Samaria sya sna agama ro manggunsi. Sikyar faro Syap-Syap Ibrani nakam ḇa, sikyar monda syap ri rim ḇerandak ya.

Ro Yesus fafisu ḇyedi, snonggaku Yahudi ḇebor sya sayin kaku snonggaku Samaria ma sḇinggwanbur si. (Yohanes 4:9) Snonggaku Yahudi ono sisya sbuk apap ”snon Samaria” fa sbukikoryae si.​—Yohanes 8:48.

Refo ya ikofenḇair ḇa sararḇer ḇekur snon Samara ḇefrur pyum ani ima fawar ḇekaku dirya. Ḇape, fafisu Yesus byuk farkor snonggaku sya, dapḇair ker rari ma moḇ ḇerower i sya sifawi kwar na. Rarirya, napyan fa sifawi rosai Yesus ikofen na.

Ro sararḇer ḇekur snon Samaria ḇefrur pyum ani, roi ḇeḇeso dap na nasrow kuker fafisu anya. Imnis raris:

• Nyan ro Yerusalem ḇera ḇe Yerikho swaf ya indo kada kilometer ri 20. Yerusalem moḇ ḇyena nakaki syadi meter ri 1.000 ro Yerikho. Inja nyan ro Yerusalem ḇe Yerikho nado fafaya ḇa. Ro sararḇer ani, Yesus doḇe snonggaku sya ’sado ro Yerusalem’ fa simban ḇe Yerikho.​—Lukas 10:30.

• Imam ma manfarkin agama Yahudi ḇesesya ḇeḇarek ro Yerikho na siso ker nyan ine fa sra ḇe Yerusalem.

• Manfasyar sya na siyokef ro nyan snonggaku sya simbran ker ro na ḇa, mura siwaf rawo oso imbran ro manggundi.