Oroba, supswan ine nari ipok ipromes ḇa, ḇyeḇerap kuker for, ḇaido planet ḇesena nefadwer i ḇa. Refo ikofen snar Allah ifrur supswan ine fa koḇarek ro diwa isof fioro.

•   ”Snonggaku ḇefrur roi ḇenapes siso nari ḇena supswan, ma sḇarek ro dia isof fyoro-fyoro.”​—Mazmur 37:29.

•   ”Ifrur fa supswan ine dores ro araref ḇyedi, supswan ine nari iwawa ḇaḇeri.”​—Mazmur 104:5.

•   ”Supswan ine na isya pdef isof fyoro.”​—Pengkhotbah 1:4.

•   ”Manḇefrur supswan, Allah ḇedaw supswan ma ḇefrur fa idworen, ifrur i fa ḇyeḇei monda ḇa, ḇape ifrur i fa sḇarek ro ya.”​—Yesaya 45:18.

 Nari Allah myam supswan ine ipromes ḇa snar roi snonggaku sya sifrur na. Imnis ra, polusi, mamamun ḇaido roi ḇesena. Mboi, nari myun snonggaku ḇefrur supswan ine iḇye ḇa sya. (Wahyu 11:18) Rosai nari Allah ifrur ya?

 Pamarenta ḇero supswan ine nari sifrur mnis kaḇer supswan ine ḇa. Inja, nari Allah fyadwer pamarenta ḇero supswan inekam kuker Allah pamarenta Ḇyedi ḇero nanggi. (Daniel 2:​44; Matius 6:​9,10) Nari ḇeḇeraja ro pamarenta ine iso Yesus Kristus, Allah Roma Ḇyedi. (Yesaya 9:​6, 7) Randak ya, rofyor Yesus ikenem ro supswan kaker, bisa ifrur fa roi ḇero farsyos nakunem faro i. (Markus 4:​35-​41) Inja, fafisu Yesus ḇyeraja ro Karajan Allah nari ḇyepoik faro supswan ma roi nakam ḇero supswan ma farsyos ine. Nari ifrur supswan ine fa ipyum kaḇer imnis Yaf Eden ro randak ani. (Matius 19:28; Lukas 23:43)

 Snonggaku bebor skara sasar wos ḇero 2 Petrus 3:7, ḇekofen, ’Farsyos ma supswan ḇero baboine nari neḇerap pres kuker for.’ Mgomampan roi risuru nari ḇefnoḇek ko fa kofawi knam ro mnuk ani:

1.   Ro Refo yadori, wos ”farsyos”, ”supswan”, ma ”for” nya knam ri ḇeḇeso. Rupa ra, Kejadian 11:1 ikofen, ”Ro supswan ḇesiper sawos wos ma mkarem ḇemnis kam.” Ro dine wos ”supswan” kyurfasnai ḇe kawasa snonggaku sya.

2.   Ro 2 Petrus 3:5, 6, bisa kofawi knam kaku ro wos farsyos, supswan ma for. Ro mnuk suya subuki mnis rosai nari ḇeḇejadi ro fafisu iyama kuker faḇruḇ ḇeba ro Nuh fafisu ḇyedi. Dunya ḇaido ”supswan” ro fafisu ani ḇyeḇemun. Ḇape kaku ya, ine kyur ḇe snonggaku ḇeḇarḇor sya, mboi supswan ine isya pdef. (Kejadian 6:11) Faḇruḇ ḇeba ya kako myun pres ”farsyos” isoine snonggaku ḇepoik faro kawasa ḇeḇarḇor sya. Inja ḇeḇemun iso snonggaku ḇeḇarḇor sya, mboi supswan ine ḇa. Nuh ma kina ḇyesi simkei ro faḇruḇ ḇeba ani ma sḇarek pdef ro supswan.​—Kejadian 8:​15-​18.

 Faḇruḇ ḇeba ro Nuh fafisu ḇyedi myun snonggaku ḇeḇarḇor sya. Wos for ḇeyap ro 2 Petrus 3:7 nari myun kako snonggaku ḇeḇarḇor sya, mboi supswan ine ḇa. Allah ḇyeasas ḇekur ’farsyos ḇebabo ma supswan ḇebabo’ rodia ”snonggaku sya nari sifrur roi ḇekaku”. (2 Petrus 3:13) ’Supswan ḇebabo’ kyurfasnai ḇe snonggaku nari ḇeḇarek ro supswan isof fyoro-fyoro. ’Farsyos ḇebabo’ kyurfasnai ḇe pamarenta ḇebabo, isoine Karajan Allah. Karajan ine nari fyadwer supswan ine ḇe firdaus ḇefo kuker aski ma payamyum.​—Wahyu 21:1-4.