Yesus fyaspar snonggaku ḇekyar sya rofyor byuk kankenem ḇyedi ḇe farsarser fasaspar ya. (Matius 20:28) Inja, Refo dap Yesus ḇe ’Manfaspar dunya ine’. (1 Yohanes 4:​14) Refo ikofen kako, ”Ma koreri isya ro snonkaku oso ḇeseḇa demir kuker Yesus, snar ro supswan ḇesiper ine snonsnon oso ḇeso isya ḇa ḇesma kwar papoik ro Allah fa ḇeḇuk koreriya maḇeko.”​—Farfyar ro Manwawansya (Kisah) 4:​12.

 Yesus ”ifawi marmari faro snonkakusya kam” ḇekyar faro i sya. (Ibrani 2:9; Yohanes 3:​16) Mura, ”Allah ḇyawes i ro munaiḇui”, ma Yesus kyaḇer ḇe nanggi ḇe manggun rur. (Farfyar 3:​15) Ro diwa, Yesus ipok fa ”ḇyuk aski fyoro-fyoro faro kawasa ḇerama faro Allah snar i. Yesus ifrur rarirya snar ikenem fyoro-fyoro fadun fararyor kawasa sena faro Allah”.​—Ibrani 7:​25.

Rosai ḇefnai kofandun Yesus i fa ifrur fararyor faro Allah?

 Koinekam snonggaku ḇesasar si ko. (Roma 3:​23) Sasar ya ḇye roi ḇedwarek ko kuker Manseren Allah. Sasar ya kako ifnai marmar ya. (Roma 6:​23) Ḇape, Yesus ”ḇeyawoswarek” snonggaku ḇekyar faro farsarser fasaspar byuk anya. (1 Yohanes 2:1, fasfas kasun, NW) Snar byuk kenem ḇyedi ḇe farsarser kwar, inja na ifrur fararyor faro fandun ro snonggaku ḇekyar sya. Yesus dor Manseren Allah insama ryowerepen nadi sena ma byuk ampun faro sasar sena. (Matius 1:​21; Roma 8:​34) Allah imarisen faro Yesus fararyor ḇyena kukro namnis marisen Ḇyena. Allah iwan Yesus fa ryama ḇe supswan insama ’fyaspar’ dunya ine.​—Yohanes 3:​17.

Kokyar monda faro Yesus nama nasrow kwar fa kosmai ḇaḇye ke?

 Oroḇa. Insama kosmai ḇaḇye fandun fa kokyar faro Yesus bae, mboi namnai ro dia monda ḇa. (Farfyar 16:30, 31) Refo ikofen, ”Imnis baken ḇena rur ḇa irya kakyar ḇemar rirya, rarirya kako kakyar fnoḇek fararur ḇa irya kakyar ḇemar rirya kako.” (Yakobus 2:​26) Insama kosmai ḇaḇye, fandun fa:

•   Komamḇir Yesus ma Kmari, Yahwe I.​—Yohanes 17:3.

•   Kona kakyar faro su.​—Yohanes 12:44; 14:1.

•   Kofasnai kakyar koḇena kuker kosouser faro parenta subuk ḇe ko na. (Lukas 6:​46; 1 Yohanes 2:​17) Yesus fyarkor ko bo doḇe snonggaku syakam ḇa ḇeyor i ḇe ’Tuan’ nari sismai ḇaḇye, imboi si ’ḇefrur Kmari ro nanggi marisen Ḇyena sikada’.​—Matius 7:​21.

•   Kofasnai pdef kakyar koḇena ro fafisu ḇesamswen na. Yesus ikofen kaku roi ine, ”Ḇape mansei ḇemku epen isof ḇarpur ya kada nari isma aski.”​—Matius 24:13.